ប៉េកាំង៖ ប្រធានាធិបតីចិន លោក ស៊ី ជីនពីង បានជួបពិភាក្សាជាមួយប្រធានក្រុមប្រឹក្សាអឺរ៉ុប លោក ឆាល មីឈែល ក្នុងរដ្ឋធានីប៉េកាំង នៅថ្ងៃព្រហស្បតិ៍ទី០១ ខែធ្នូ ឆ្នាំ២០២២ ផ្តោតសំខាន់លើការពង្រឹងទំនាក់ទំនងទ្វេភាគី។

ថ្លែងក្នុងកិច្ចប្រជុំនៅវិមាន Great Hall of the People លោក ស៊ី បានបញ្ជាក់ថា ដំណើរទស្សនកិច្ចរបស់លោក មីឈែល មកកាន់ប្រទេសចិន គឺតាងនាមឱ្យរដ្ឋជាសមាជិកសហភាពអឺរ៉ុបទាំងអស់ ដើម្បីបង្ហាញពីឆន្ទៈដ៏ល្អរបស់អឺរ៉ុប ចំពោះការអភិវឌ្ឍន៍ទំនាក់ទំនងជាមួយចិន។

លោកថា ទំនាក់ទំនងចិន-សហភាពអឺរ៉ុប នឹងបន្តផលប្រយោជន៍ទៅវិញទៅមក ខណៈដែលស្ថានភាពអន្តរជាតិកាន់តែមានភាពចលាចល ហើយបញ្ហាប្រឈមសកលក៏កាន់តែលេចធ្លោ ដូច្នេះហើយសារៈសំខាន់ជាសកលនៃទំនាក់ទំនងចិន-សហភាពអឺរ៉ុបនឹងកាន់តែមាន។

បន្ថែមលើនេះ លោក ស៊ី បានបញ្ជាក់ថា ភាគីទាំងពីរគួរតែមានការយោគយល់គ្នា និងការគាំទ្រគ្នាទៅវិញទៅមក ហើយថាប្រទេសចិនសង្ឃឹមថា EU នឹងក្លាយជាដៃគូដ៏សំខាន់ក្នុងការស្វែងរកផ្លូវរបស់ចិនទៅកាន់ទំនើបកម្ម និងចែករំលែកឱកាសដែលផ្តល់ដោយទីផ្សាររបស់ប្រទេសចិន ការបើកស្ថាប័ន និង ពង្រឹងកិច្ចសហប្រតិបត្តិការអន្តរជាតិ។

ជាមួយគ្នានេះ លោក មីឈែល បាននិយាយថា សហភាពអឺរ៉ុបត្រៀមខ្លួនរួចជាស្រេច សម្រាប់ការពិភាក្សាស៊ីជម្រៅជាមួយចិន លើបញ្ហាសំខាន់ៗជុំវិញទំនាក់ទំនងអឺរ៉ុប-ចិន ក្នុងស្មារតីនៃការគោរពគ្នាទៅវិញទៅមក និងដោយស្មោះស្ម័គ្រ ក្នុងគោលបំណងបង្កើនការយល់ដឹងគ្នាទៅវិញទៅមក លើកកម្ពស់កិច្ចសន្ទនា និងកិច្ចសហប្រតិបត្តិការ ក៏ដូចជាគ្រប់គ្រងភាពខុសគ្នាឱ្យបានត្រឹមត្រូវ។

ប្រធានក្រុមប្រឹក្សាអឺរ៉ុបរូបនេះបន្ថែមថា សហភាពអឺរ៉ុបប្រកាន់ខ្ជាប់នូវគោលនយោបាយចិនតែមួយ និងគោរពអធិបតេយ្យភាព ព្រមទាំងបូរណភាពទឹកដីរបស់ចិន។ លោកថា អឺរ៉ុបនឹងមិនជ្រៀតជ្រែកចូលកិច្ចការផ្ទៃក្នុងរបស់ប្រទេសចិនឡើយ ហើយសហភាពអឺរ៉ុបត្រៀមខ្លួនជាស្រេច ដើម្បីក្លាយជាដៃគូសហប្រតិបត្តិការដែលអាចទុកចិត្តបាន និងអាចព្យាករណ៍បានសម្រាប់ប្រទេសចិន៕ ប្រភព៖ ស៊ីនហួរ ដោយ៖ ទីណា និងបុត្រា