វៀតណាម​ ៖ ក្រុមហ៊ុន​ផលិត​រថយន្ត​អគ្គិសនី​របស់​វៀតណាម​ VinFast ​បាន​ឱ្យ​ដឹង​នៅ​​ថ្ងៃ​អង្គារ​ទី​៦ ខែ​ធ្នូ​ ​ថា​ ខ្លួន​បាន​ដាក់​ពាក្យ​ស្នើ​សុំ​ការ​ផ្តល់​ជូន​ជា​សាធារណៈ​លើក​ដំបូង​ (IPO) ​នៅ​សហរដ្ឋ​អាមេរិក​ ដើម្បី​ចុះ​បញ្ជី​​​នៅ​លើ​ផ្សារ​​ភាគ​​ហ៊ុន​ Nasdaq ​ក្រោម​និមិត្ត​សញ្ញា​ «​VFS»​ ​ក្នុង​គោល​បំណង​ពង្រីក​​ទីផ្សារ​​លើ​ពិភព​លោក​​​របស់​ខ្លួន​ បន្ថែម​​ពី​លើ​គម្រោង​​សង់​រោងចក្រ​​ផលិត​រថយន្ត​​​នៅ​រដ្ឋ​​ North Carolina ។ នេះ​បើ​តាម​ការ​រាយការណ៍​របស់​ទីភ្នាក់ងារ​សារព័ត៌មាន​រ៉យទ័រ​។

ក្រុម​ហ៊ុន​​ដែល​​ចាប់​ផ្តើម​ប្រតិបត្តិការ​ក្នុង​ឆ្នាំ​ ២០១៩ មួយ​នេះ​​ ​កំពុង​ត្រៀម​ពង្រីក​ទីផ្សារ​សហរដ្ឋ​អាមេរិក​ ​​ជា​កន្លែង​ដែលខ្លួន​​​​សង្ឃឹម​ថា​​ នឹង​ប្រកួត​ប្រជែង​ជាមួយ​ក្រុមហ៊ុន​ផលិត​រថយន្តជើង​​ចាស់​​ និង​​ក្រុម​ហ៊ុន​ទើប​នឹង​​ចាប់​ផ្តើម​អាជីវកម្ម​ផ្សេង​ទៀត​ ​ដោយ​ដាក់​​លក់​​​រថយន្ត​អគ្គិសនីរបស់​ខ្លួន​ ​ម៉ាក​ VF8 ​និង​ម៉ាក​​ VF9 ​រួម​ទាំង​ការ​ជួល​ថ្ម​​ដើម្បី​កាត់​បន្ថយ​តម្លៃ​ទិញ​។​

ចំពោះ​ការ​ចុះ​បញ្ជី​ IPO ​ក្រុម​ហ៊ុន​បាន​និយាយ​ថា​ ខ្លួន​នឹង​បំប្លែង​ទៅ​ជា​ក្រុម​ហ៊ុនលីមី​ធីត​​សាធារណៈ​​របស់​សិង្ហបុរី​ ​ដោយ​មាន​ឈ្មោះ​​ថា​ VinFast Auto Ltd ​ខណៈ​ដែល​ចំនួន​ភាគ​ហ៊ុន​ដែល​ត្រូវ​ផ្តល់​ជូន​ និង​​​តម្លៃ​សម្រាប់​ការ​ផ្តល់​ជូន​ដែល​បាន​ស្នើ​ឡើង​ មិន​ទាន់​ត្រូវ​បាន​កំណត់​នៅ​ឡើយ​ទេ​។

យោង​តាម​​ឯកសារស្នើ​​របស់​ក្រុម​ហ៊ុន​ VinFast ដដែល​ មាន​ក្រុម​ហ៊ុន​ និង​ធនាគារ​ធំ​ៗ​ដូច​ជា​ Citigroup Morgan Stanley, Credit Suisse និង JP Morgan ​​ដែល​ធ្វើ​ការ​រួម​គ្នា​​​នៅ​ពី​ក្រោយ​កិច្ច​ព្រម​ព្រៀង​នេះ​​​ ហើយ​​​ប្រសិន​បើ​ជោគ​ជ័យ​ នោះ​ក្រុម​ហ៊ុន​ VinFast ​នឹង​ក្លាយ​ជា​ក្រុមហ៊ុន​​​វៀតណាម​តំបូង​គេ​​ដែល​​ចុះ​បញ្ជី​នៅ​សហរដ្ឋ​អាមេរិក​។​

ការ​​ដាក់​ស្នើ​​កាល​ពី​ថ្ងៃ​អង្គារ​ ធ្វើ​ឡើង​​បន្ទាប់​ពី​ក្រុមហ៊ុន​ VinFast បាន​​​​​បញ្ជូនសំណើ​​សម្ងាត់​ទៅ​កាន់​គណៈកម្មការ​មូលបត្រ​អាមេរិក​ (SEC) ​ក្នុង​ខែ​មេសា ​ពោល​គឺ​មួយ​ខែ​បន្ទាប់​ពី​​ក្រុម​ហ៊ុន​នេះ​​បាន​អះ​អាង​​​ថា​ ខ្លួន​នឹង​សាង​សង់​រោងចក្រ​ផលិត​​នៅ​រដ្ឋ​ North Carolina ​ជាមួយ​នឹង​​គម្រោង​​​ផលិត​រថយន្ត​អគ្គិសនី​​​ដំបូង​ឱ្យ​​ ១៥០ ០០០  គ្រឿង​​ក្នុង​មួយ​ឆ្នាំ​។​

ក្រុមហ៊ុន​ VinFast ​បាន​ដាក់​ទង់​ជា​លើក​ដំបូង​របស់​ខ្លួន​លើ​​ IPO ​របស់​សហរដ្ឋ​អាមេរិក​កាល​ពី​ខែ​​មេសា​ឆ្នាំ​មុន​ ក្នុង​​បំណង​ប្រមូល​ប្រាក់​ចំនួន​ពីរ ប៊ីលាន​ដុល្លារ​ ជាមួយ​នឹង​តម្លៃ​ប្រហែល​ ៦០ ​ប៊ីលាន​ដុល្លារ​។​

គួរ​គូស​បញ្ជាក់​ថា​ ​ការ​វាយ​តម្លៃ​ទីផ្សារ​សម្រាប់​ការ​ចាប់​ផ្តើម​អាជីវកម្ម​រថយន្ត​អគ្គីសនី​ ​បាន​ធ្លាក់​ចុះ​យ៉ាង​ខ្លាំង​ក្នុង​រយៈ​ពេល​មួយ​ឆ្នាំ​កន្លង​មក​ បន្ទាប់​ពី​ក្រុមហ៊ុន​មួយ​ចំនួន​ដែល​មាន​ការ​វាយ​តម្លៃ​ខ្ពស់​ បាន​ប្រឈម​មុខ​នឹង​ការ​ត្រួត​ពិនិត្យ​ ​ខណៈ​​សេដ្ឋកិច្ច​ពិភព​លោក​​ក៏​ប្រឈម​មុខ​នឹង​ភាព​​ដ៏​អាប់​អួរ​​។​

​​​​កាល​ពី​​ចុង​ខែ​វិច្ឆិកា​  ក្រុម​ហ៊ុន​ VinFast​ បាន​ដឹក​ជញ្ជូន​រថយន្ត​ចំនួន​ ៩៩៩ ​គ្រឿង​ដំបូង​របស់​ខ្លួន​ទៅ​កាន់​សហរដ្ឋ​អាមេរិក​ ដោយ​កំណត់​​គម្រោង​​​​រយៈ​ពេល​ ៥​ ឆ្នាំ​ដើម្បី​អភិវឌ្ឍ​មជ្ឈមណ្ឌល​ផលិត​រថយន្ត​នៅ​ក្នុង​ប្រទេស​វៀតណាម​ សម្រាប់​ទីផ្សារ​នៅ​អាមេរិក​ខាង​ជើង​ និង​អឺរ៉ុប​។ ក្រុម​ហ៊ុន​​បាន​​អះ​អាង​ថា​ បច្ចុប្បន្ន​នេះ​ ខ្លួន​មាន​ការ​បញ្ជា​ទិញ​​រថយន្ត​អគ្គីសនី​ជិត​​  ៦៥ ០០០ គ្រឿង​នៅ​​​ទូទាំង​ពិភព​លោក ​ហើយ​រំពឹង​ថា​នឹង​លក់​រថយន្ត​​ប្រភេទ​នេះ​ចំនួន​ ៧៥០ ០០០ គ្រឿង​ក្នុងឆ្នាំ​នៅ​ឆ្នាំ​ ២០២៦​៕

ដោយ៖ ហួន ឌីណា  ​ ប្រភព៖ Vietnam’s EV maker Vinfast files for U.S. IPO to fuel global expansion