កៀវ៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ក្នុងថ្ងៃអង្គារសប្តាហ៍នេះ បានចុះត្រួតពិនិត្យដោយផ្ទាល់នៅទីក្រុងជួរមុខ Bakhmut ក្នុងតំបន់ Donetsk ភាគខាងកើតនៃប្រទេសអ៊ុយក្រែន។ នេះបើតាមការចេញផ្សាយរបស់សារព័ត៌មានប្រធានាធិបតីអ៊ុយក្រែន។

ក្នុងអំឡុងដំណើរទស្សនកិច្ចការងាររបស់ខ្លួន លោក ហ្សេលេនស្គី បានជួបជាមួយមន្រ្តីនៃកងពលតូចមេកានិច ដែលពាក់ព័ន្ធនឹងការប្រឈមមុខដាក់គ្នាជាមួយកងកម្លាំងរុស្ស៊ីនៅលើផ្លូវទៅកាន់ទីក្រុង។

នាឱកាសនោះដែរ លោក ហ្សេលេនស្គី បានស្តាប់របាយការណ៍របស់មេបញ្ជាការ ស្តីពីស្ថានភាពប្រតិបត្តិការនៅសមភូមិជួរមុខ ហើយបានថ្លែងអំណរគុណដល់យោធាអ៊ុយក្រែន ចំពោះភាពក្លាហាន ភាពអត់ធ្មត់ និងការលះបង់ញើសឈាមរបស់ពួកគេក្នុងអំឡុងពេលប្រយុទ្ធនឹងកងកម្លាំងរុស្ស៊ី។

ស្របពេលជាមួយគ្នានោះដែរ ប្រធានាធិបតីអ៊ុយក្រែនរូបនេះក៏បានផ្តល់រង្វាន់លើកទឹកចិត្តដល់កងទ័ពមេកានិច កងថ្មើរជើង កងវាយលុកលើភ្នំ កងរថក្រោះ និងកងកាំភ្លើងធំជាដើម ជាមួយនឹងរង្វាន់ថ្នាក់រដ្ឋ។ ក្នុងប៉ុន្មានសប្តាហ៍ថ្មីៗនេះ ទីក្រុងBakhmut បានក្លាយជាចំណុចកណ្តាលនៃការប្រយុទ្ធគ្នារវាងទាហានអ៊ុយក្រែន និងរុស្ស៊ី៕ ប្រភព៖ ស៊ីនហួរ ដោយ៖ ទីណា និងបុត្រា