ភ្នំពេញ៖ រំដេងព្រៃ (wild ginger) ជារុក្ខជាតិដែលត្រូវបានគេ ចេះកែច្នៃសម្រាប់ធ្វើម្ហូប និងគេបានយកមកប្រើប្រាស់ធ្វើជាឱសថព្យាបាលរោគជំងឺពិសេសរោគឆ្អល់ពោះ និងហើមពោះក្រោយស្រ្តីសម្រាលទារក យូរយាមកហើយ ។

បើយោងតាមក្រសួងបរិស្ថានបានឱ្យដឹងថា៖រំដេងព្រៃមានដើមកម្ពស់ ០,៦០-២ម មើមរាងមូលវែងមិនសូវបែកខ្នែង ស្លឹកវែង ២០-៣០x១-៥ស.ម។ ផ្កាជាចង្កោម នៅចុងដើម។ ផ្កាមានទងខ្លីៗ ត្របកផ្កាពណ៌បៃតងខ្ចី រាងជាបំពងមានធ្មេញ៣ ស្រទាប់ផ្កាស ឬខៀវខ្ចីលាយបៃតង។ ស្រទាប់ធំពណ៌ស មានឆ្នូតពណ៌ក្រហម។

កេសរឈ្មោលមានពណ៌លឿង។ ផ្លែរាងមូលពណ៌បៃតងទៅជាក្រហមដល់ស្ងួត ហើយមានរាងទ្រវែង។ គ្រាប់មាន ៣-៥ ក្លិនក្រអូប។ មើមមានក្លិនឈ្ងុយប្រហើរ និងរសជាតិហឹរ មានជាតិប្រេងសំខាន់ៗជាច្រើន។ ផ្លែអាចយកទៅបរិភោគបាន។ ដុះតំបន់មានអាកាសធាតុក្តៅ នៅដីសើម។

ការប្រើប្រាស់បានជា គ្រឿងទេស និងឱសថ៖
គ្រឿងទេស បង្កើនរសជាតិ និងក្លិនឈ្ងុយ ឱសថ គេយកមើម និងស្លឹកថ្មីៗ មកដាំទឹកព្យាបាលរោគឆ្អល់ពោះ ឬហើមពោះក្រោយពេលសម្រាលកូន ៕ ដោយ ៖ ម៉ាដេប៉ូ