ខេត្ត្បូងឃ្មុំ ៖ «ក្រុមការងារគណបក្សចុះមូលដ្ឋានស្រុកអូររាំងឪ សូមអរគុណដល់សន្តិភាព និងគោរពដឹង គុណដល់ ស្ថាបនិកសន្តិភាព បើគ្មានសន្តិភាពគឺយើងគ្មានអ្វីៗទាំងអស់ដូចសព្វថ្ងៃនេះទេ សន្តិភាពគឺគ្រឺះនៃអាយុជីវិត ការអភិវឌ្ឍ និង សិទ្ធិទទួលបានការអប់រំ ហេតុនេះ ៧មករា ជាថ្ងៃកំណើតទី២ របស់យើង គាប់ជួនស្រុកអូររាំងឪយើងពេលនេះ ទទួលបានសិស្សនិទ្ទេស A ចំនួន ៧នាក់ គឺជាមុខមាត់របស់ស្រុកអូររាំងឪ ក្នុងការអបអរសាទរ ទិវាជ័យជម្នះ ៧មករា ខួបលើកទី៤៤ ឆ្នាំ២០២៣ » នេះជាការលើកឡើងរបស់ ឯកឧត្តម អ៊ាង សុផល្លែត សមាជិកគណៈកម្មាធិការកណ្តាលគណបក្សប្រជាជនកម្ពុជា និង ជាប្រធានក្រុមការងារគណបក្សចុះមូលដ្ឋានស្រុកអូររាំងឪ ខេត្តត្បូងឃ្មុំ ក្នុងពិធីសំណេះសំណាលជាមួយសិស្សនិទ្ទេស A និងសិស្សប្រលងសញ្ញាបត្រចំនួន ៣៩៤នាក់ នៅស្នាក់ការគណបក្សស្រុកអូររាំងឪ នៅថ្ងៃទី០៥ ខែមករា ឆ្នាំ២០២៣ ។

ឯកឧត្តមប្រធាន បានកោតសរសើរ និងវាយតម្លៃខ្ពស់ចំពោះការចូលរួម របស់លោកគ្រូ អ្នកគ្រូ បុគ្គលិកអប់រំសិក្សា អាជ្ញាធរដែនដី និងក្រុមការងារទាំងអស់ ក្នុងបុព្វហេតុកសាងជាតិមាតុភូមិ តាមរយៈ ការអប់រំបណ្តុះបណ្តាល ធនធានមនុស្សសម្រាប់ត្រៀមបន្តវេន និងបង្កលក្ខណៈអោយសង្គមកម្ពុជា មានធនធានមនុស្ស ប្រកបដោយគុណភាព ។

តាមរយៈសុខសន្តិភាព ស្ថេរភាពនយោបាយ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន កម្ពុជាទទួលបានកិត្តិយស ស្មើមុខស្មើមាត់លើឆាកអន្តរជាតិ តាមរយះសមិទ្ធិផលធំៗ
១-ការរក្សាបាននូវសុខសន្តិភាពស្ថេរភាពនយោបាយ
២-ជោគជ័យក្នុងនាមជាប្រធានអាស៊ាន ឆ្នាំ២០២២
៣-ជោគជ័យក្នុងការទប់ស្កាត់ជំងឺកូវីដ១៩ និងបើកដំណើរការប្រទេសក្នុងប្រក្រតីភាពឡើងវិញ ដើម្បីស្តារសេដ្ឋកិច្ចជាតិ
៤-ជោគជ័យក្នុងការបោះឆ្នោតក្រុមប្រឹក្សាឃុំសង្កាត់អាណិត្តទី៥ ឆ្នាំ២០២២
៥-ភាពលេចធ្លោក្នុងកិច្ចការងារបរិស្ថាន ដែលប្រធានាធិបតីបារាំង បានកោតសរសើរ តាមរយៈ ការដាក់នូវរបាយការណ៍អធ្យាក្រឹតកាបូន ។

សម្រាប់ឆ្នាំ២០២៣នេះ ឯកឧត្តមប្រធាន និងក្រុមការងារ សូមជូនចំនងដៃ ចំនួន ៤ ធំៗ នៅក្នុងឱកាសចូលឆ្នាំខ្មែរខាងមុខ
១-ដាំផ្កាស្បៃរឿង នៅតាមបណ្តោយទន្លេស្ងួត និងនៅ តាមវត្តអារាម ដើម្បីបង្កើនសោភណ្ឌ័ភាព បរិស្ថាន អនាម័យ នៅស្រុកយើងឱ្យមានភាពបៃតងស្រស់
២-«យុទ្ធនាការផ្លូវរលោង »ដំណាក់កាលទី២ នៅទូទាំងស្រុក
៣-កសាងសាលារៀនចំនួន ១២បន្ទប់ នៅវិទ្យាល័យ ហ៊ុន សែន ហេង សំរិន ចក ជាចំនងដៃដែលវិទ្យាល័យដណ្តើមបានជ័យលាភី សិស្សនិទ្ទេស A ចំនួន ៣នាក់ នៃសិស្សនិទ្ទេស A ចំនួន ៧នាក់ នៅទូទាំងស្រុក
៤-«យុទ្ធនាការ សាលាមួយ អណ្តូងមួយ យ៉ាងតិច» ដោយផ្តើមចេញពីឃុំដំរិល ដើម្បីលើកកម្ពស់សុមាលភាព លោកគ្រូអ្នកគ្រូ និង សិស្សានុសិស្ស ។

អញ្ជើញចូលរួមក្នុងឱកាសនោះមាន ឯកឧត្តម ឡាន់ ឆន សមាជិកព្រឹទ្ធសភា និងជាអនុប្រធានក្រុមការងារគណបក្សចុះមូលដ្ឋានស្រុក ឯកឧត្តម លោកជំទាវ លោក លោកស្រី ប្រធាន និង អនុប្រធាន ក្រុមការងារគណបក្សចុះមូលដ្ឋានឃុំទាំង៧ នៃស្រុកអូររាំងឪ ខេត្តត្បូងឃ្មុំ ៕ ដោយ ៖ ម៉ាដេប៉ូ