ភ្នំពេញ៖ លោក ហាក់ ម៉ុងហួត អភិបាល នៃគណអភិបាលស្រុកតាំងគោក បានផ្ញើសារទៅបងប្អូនប្រជាពលរដ្ឋ និងយុវជន ក្នុងស្រុកតាំងគោក និងទូទាំងប្រទេសថា សុខសន្តិភាព បានធ្វើអោយកម្ពុជាទទួលធ្វើជាម្ចាស់ផ្ទះព្រឹត្តការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ នាថ្ងៃទី០៥ ខែឧសភា ឆ្នាំ២០២៣ ខាងមុខនេះ។
នេះជាការបញ្ជាក់របស់លោកអភិបាលស្រុក ក្នុងពិធីបើកការប្រកួតបាល់ទាត់ដណ្តើមពានរង្វាន់ យុវជនស្រុកតាំងគោក ឆ្នាំ២០២៣ ដែលប្រសិទ្ធនាមថា កីឡារស់ក្នុងសន្តិភាព នាវិទ្យាល័យតាំងគោក ស្រុកតាំងគោក ខេត្តកំពង់ធំ។

លោកអភិបាលស្រុក បន្តថា ពានរង្វាន់យុវជនស្រុកតាំងគោកនេះ បង្កើតឡើងក្នុងគោលបំណង អោយយុវជនតាមឃុំនីមួយៗ ក្នុងស្រុកតាំងគោក បង្កើននូវមិត្តភាព សាមគ្គីភាព និងបង្កើននូវកិច្ចសហការគ្នាអោយកាន់តែល្អប្រសើរក្រោមដំបូលសុខសន្តិភាព ជាពិសេសផ្តល់ឪកាសអោយយុវជនកសាងសមត្ថភាព និងលើកស្ទួយវិស័យកីឡាបាល់ទាត់ អោយកាន់តែរីកចំរើនបន្ថែមទៀត។ លោក ហាក់ ម៉ុងហួត បន្ថែមថា ការប្រកួតនេះ មានភាពគគ្រឹកគគ្រេង បង្កនូវលក្ខណសប្បាយរីករាយជូនបងប្អូនប្រជាពលរដ្ឋបានចូលរួម និងផ្តល់ឪកាសយុវជនជាកីឡាករដើម្បីបញ្ចេញស្នាដៃ អាចក្លាយជាកីឡាករល្អក្លាយជាជម្រើសរើសជាតិ ឬក៏ជម្រើសរើសក្រុមណាមួយនាពេលខាងមុខ។ ហើយការប្រកួតនេះ ក៏ចង់បង្ហាញអោយទស្សនិកជន ក៏ដូចជាប្រជាពលរដ្ឋក្នុងស្រុកតាំងគោកអោយឃើញថា ក្នុងបរិបទ នៃសុខសន្តិភាពទើបធ្វើអោយយើងអាចបង្កើតព្រឹត្តការណ៍ធំៗបាន ដូច្នេះសូមអោយប្រជាពលរដ្ឋ ក៏ដូចយុវជន ចូលរួមថែរក្សាសុខសន្តិភាព ដែលសម្តេចតេជោ ហ៊ុនសែន បានខិតខំប្រឹងប្រែងស្វែងរក អោយបានគង់វង្សតទៅទៀត។ ………….. ដាក់សម្ភាសន៍ លោក ហាក់ ម៉ុងហួត …១នាទី…
ដោយឡែកកីឡាករ ទុយ សុភា និងឡេង សុចិត្រា បានបង្ហាញអារម្មណ៍រីករាយ និងថ្លែងអំណរគុណដល់លោក ហាក់ ម៉ុងហួត អភិបាលស្រុក ដែលបង្កើតពានរង្វាន់នេះ ធ្វើអោយពួកគាត់សប្បាយរីករាយបានស្គាល់គ្នា លេងកីឡាជាមួយគ្នា ជាពិសេសបងប្អូនប្រជាពលរដ្ឋចូលរួមគាំទ្រយ៉ាច្រើន។ …. សម្ភាសន៍ កីឡាករ …៣៩វិនាទី……….. ។

តាមរបាយការណ៍លោក អៀង ប៊ុនហាន ប្រធានការិយាល័យកីឡាស្រុកតាំងគោក បានអោយដឹងថា ការប្រកួតបាល់ទាត់ពានរង្វាន់យុវជន ស្រុកតាំងគោក ដែលប្រសិទ្ធនាមថា កីឡារស់ក្នុងសន្តិភាព ឆ្នាំ២០២៣នេះ មានក្រុមបាល់ទាត់យុវជនមកពី៨ឃុំចូលរួម ចែកចេញជា២ពូល ដោយក្នុងមួយពូលៗមាន៤ក្រុម ធ្វើការប្រកួតសន្សំពិន្ទុរកក្រុមដែលមានពិន្ទុខ្ពស់ជាងគេ លេខ១ និងលេខ២ បន្តទៅវគ្គខ្វែងរួចប្រកួតចាញ់ ធ្លាក់ ឈានទៅវគ្កផ្តាច់ព្រ័ត្ររកជើងឯកតែម្តង។ ការប្រកួតនេះ ចាប់ផ្តើមពីថ្ងៃទី០៧ ខែមករា ដល់ថ្ងៃទី១ ខែមេសា ឆ្នាំ២០២៣និងបញ្ចប់៕ ចាន់ វិចិត្រ