កំពង់ចាម៖ ថ្លែងក្នុងពិធីបើកការដ្ឋានសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ៧ ចាប់ពីរង្វង់មូលស្គន់ ទីរួមស្រុកជើងព្រៃ រហូតដល់ទីរួមខេត្តកំពង់ចាម នៅព្រឹកថ្ងៃទី៩ ខែមករា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានព្រមានចំៗទៅអ្នកនយោបាយ ចាស់វស្សាម្នាក់ ពោលគឺលោក គង់ គាំ ដែលបច្ចុប្បន្នជាឧត្តមទីប្រឹក្សាគណបក្សភ្លើងទៀន ឱ្យបញ្ឈប់ការរិះគន់គណបក្សប្រជាជនកម្ពុជា នាពេលឃោសនានយោបាយគណបក្សរបស់ខ្លួន។

សម្តេចតេជោ ហ៊ុន សែន បានកត់សម្កាល់ថា ពីអតីតសមាជិកគណបក្សប្រជាជនកម្ពុជា រហូតដល់ក្លាយជារដ្ឋមន្ត្រីក្រសួងការបរទេស លោក គង់ គាំ បានចេញចូលចុះឡើងញឹកញាប់ ដោយបានចូលរួមជាមួយគណបក្សប្រឆាំង ហើយក្រោយមកលោក គង់ មុនីកា ដែលជាកូន ប្រុស បាន បង្កើតបក្សឆន្ទៈខ្មែរ ហើយ ចូលរួមជាមួយរដ្ឋាភិបាលតាមរយៈក្រុមប្រឹក្សាពិគ្រោះយោបល់។

សម្ដេចមានប្រសាសន៍ដូច្នេះថា៖ ខ្ញុំសូមដាស់តឿន ដាស់តឿន ដាស់តឿន ជាការព្រមានបន្ថែម កុំឲ្យសោះអ្នកឯងវាយប្រហារអ្វី វាយទៅ អ្នកឯងអួត។ អ្នកឯងវាយគណបក្សប្រជាជន អ្នកឯងដឹងថា គេឈឺទេ?។ អាត្មាមិនខន្តីទេញោម! សម្តេច ហ៊ុន សែន ព្រមានបែបនេះ ទៅកាន់លោក គង់ គាំ ដោយសម្តេចលើកឡើងថា លោក គង់ គាំ ឃោសនានយោបាយដោយចោទ/ជេរ គណបក្សប្រជាជនកម្ពុជា ដើម្បីបំពេញចិត្តបុគ្គលម្នាក់នៅក្រៅប្រទេស។

ជាមួយគ្នានេះ សម្តេចតេជោ ក៏បានរំលឹកលោក គង់ បូរ៉ា ផងដែរ ឲ្យមានការប្រយ័ត្នប្រយែងចំពោះនិន្នាការរបស់ខ្លួន។ លោក គង់ បូរ៉ា ដែលជាកូនប្រុសមួយរូបរបស់លោក គង់ គាំ បានចូលរួមជាមួយគណបក្សប្រជាជនកម្ពុជា ហើយបច្ចុប្បន្នជាអនុរដ្ឋលេខាធិការក្រសួងមហាផ្ទៃ។

សម្តេចបានប្រាប់ទៅកាន់លោក គង់ បូរ៉ា ថា ត្រូវបម្រើគណបក្សប្រជាជនកម្ពុជា ក្នុងនាមជាសមាជិកបក្ស ដោយមិនអាចងាករេទៅគណបក្សរបស់ប្អូនប្រុសខ្លួននោះឡើយ ៕ ដោយ ៖ វណ្ណលុក