កំពង់ចាម៖ កំណត់ផ្លូវជាតិលេខ៧ ចាប់ពីរង្វល់មូលស្គន់ ទីរួមស្រុកជើងព្រៃ រហូតដល់ទីរួមខេត្តកំពង់ចាម ត្រូវបានបើកការដ្ឋានសាងសង់ពង្រីក និងលើកម្រិតគុណភាព ក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា នៅព្រឹកថ្ងៃចន្ទ ៣រោច ខែបុស្ស ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី៩ ខែមករា ឆ្នាំ២០២៣ នេះ ។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូនបានឲ្យដឹងថា គម្រោងពង្រីក និងលើកកម្រិតគុណភាពកំណាត់ផ្លូវជាតិលេខ៧នេះ មានប្រវែងសរុបជាង ៤៥គីឡូម៉ែត្រ ចាប់ពីរង្វង់មូលស្គន់ ទីរួមស្រុកជើងព្រៃ ទៅដល់រង្វង់មូលគល់ស្ពានគីហ្សូណា ក្រុងកំពង់ចាម នឹងត្រូវស្ថាបនាជាប្រភេទផ្លូវ ក្រាលបេតុងកៅស៊ូ (AC) កម្រាស់ ៩សង់ទីម៉ែត្រ និងពង្រីកទទឹងតួផ្លូវពី ២គន្លង ទៅ ៤គន្លង ដោយគន្លងនីមួយៗមានប្រវែង ៣.៧៥ម៉ែត្រ និងសួនពុះទ្រូងផ្លូវ ១.៥ម៉ែត្រ។ គម្រោងនេះ នឹងរួមបញ្ចូលការ សាងសង់ស្ពានថ្មី ចំនួន ១កន្លែង ប្រវែង ៤០ម៉ែត្រ មានទទឹង ២៤ម៉ែត្រ ស្ពានថ្មីចំនួន ៦កន្លែងផ្សេងទៀត ប្រវែងសរុប ១០៦ម៉ែត្រ មានទទឹង ១២ម៉ែត្រ និងពង្រីកបន្ថែមស្ពានចាស់ ដែលមានស្រាប់ចំនួន ១កន្លែង ទទឹង ១០.៥ម៉ែត្រដាក់លូគ្រប់ប្រភេទចំនួន ៣៣០កន្លែង បំពាក់កាមេរ៉ា ត្រួតពិនិត្យ ល្បឿនរថយន្ត ២កន្លែង បំពាក់ស្ថានីយជញ្ជីងថ្លឹងរថយន្ត ដឹកជញ្ជូនលើសទម្ងន់កម្រិតកំណត់វៃឆ្លាត និងត្រួតពិនិត្យដោយស្វ័យ ប្រវត្តិ (AI and Weigh-in-Motion) ចំនួន ២កន្លែង និងបំពាក់ស្លាក សញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោល សុវត្ថិភាពទៅតាមបទដ្ឋានបច្ចេកទេសផ្លូវថ្នល់។ គម្រោងនេះ នឹងត្រូវអនុវត្ដការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន(CRBC) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សា បច្ចេកទេសក្វាងចូវវ៉ានអាន ប្រើប្រាស់រយៈពេលសាងសង់ចំនួន ៤០ខែ នឹងបញ្ចប់នៅក្នុងឆ្នាំ២០២៦ គ្រោងចំណាយថវិកាសរុបជាង ១១៧លានដុល្លារអាមេរិក ដែលជាឥណទានសម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ។

ឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា បានអបអរសាទរចំពោះបងប្អូនប្រជាពលរដ្ឋនៅខេត្តកំពង់ចាមក៏ដូចជាអបអរសាទរចំពោះកម្ពុជាដែលទទួលបានសមិទ្ធផលហេដ្ឋារចនាសម្ព័ន្ធថ្មីៗជាបន្តបន្ទាប់។ ឯកឧត្តមបានមានប្រសាសន៍ថា ចិននៅតែបន្តជួយដល់កម្ពុជាជាបន្តបន្ទាប់ទៀតទៅលើការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា និងវិស័យផ្សេងៗជាច្រើនទៀតទៅតាមលទ្ធភាពដែលអាចជួយទៅបាន តាមរយៈកិច្ចសហប្រតិបត្តិការដ៏ល្អរវាងប្រទេសទាំងពីរ ហើយតាមរយៈសមិទ្ធផលកំណាត់ផ្លូវជាតិលេខ ៧នៅថ្ងៃនេះ នឹងរួមចំណែកធ្វើឲ្យការធ្វើដំណើររបស់ប្រជាពលរដ្ឋកាន់តែមានភាពល្អប្រសើរងាយស្រួល ព្រោះផ្លូវនេះត្រូវបានពង្រីកអោយធំទូលាយជាមុន។

សម្តេចតេជោនាយករដ្ឋមន្ត្រីបានមានប្រសាសន៍ថា ចុងឆ្នាំ២០២២ និងដើមឆ្នាំ២០២៣ សម្តេច និងឯកអគ្គរដ្ឋទូតចិន បានអញ្ជើញរួមគ្នាបើកការដ្ឋានសាងសង់ផ្លូវ និងស្ពាន ចំនួន៤គម្រោង ដែល គម្រោងទាំង៤នោះរួមមាន ការដ្ឋានសាងសង់ផ្លូវជាតិលេខ៤១, ផ្លូវជាតិលេខ៣១ និង៣៣, ស្ពានឆ្លងទន្លេមេគង្គ ខេត្តក្រចេះ និងកំណាត់ផ្លូវជាតិលេខ៧ ពីស្គន់ ទៅក្រុងកំពង់ចាមនាថ្ងៃនេះ។

សម្តេចតេជោ ហ៊ុន សែន បានថ្លែងអំណរគុណរដ្ឋាភិបាល និងប្រជាជនចិន ដែលបានចូលរួមចំណែកយ៉ាងសំខាន់ក្នុងការអភិវឌ្ឍប្រទេសកម្ពុជា។ សម្តេចតេជោពិតជារីករាយចំពោះការក្លាយជាដៃគូយុទ្ធសាស្ត្រគ្រប់ជ្រុងជ្រោយជាមួយចិន ដែលនាំឲ្យកម្ពុជាទទួលបាននូវប្រយោជន៍យ៉ាងច្រើន។ សម្តេច ថា ការកសាងហេដ្ឋារចនាសម្ព័ន្ធ និងការរកវ៉ាក់សាំងបង្ការកូវីដ១៩ មកចាក់ជូនប្រជាពលរដ្ឋកន្លងមកនេះ បើមិនឱ្យកម្ពុជាពឹងចិន តើឱ្យកម្ពុជាពឹងនរណា។

សម្តេចតេជោ ហ៊ុន សែន បានមានប្រសាសន៍រំលឹកថា ឆ្នាំ១៩៩៨ មុនការដាក់ចេញនូវយុទ្ធសាស្ត្រចតុកោណក្នុងការអភិវឌ្ឍន៍ប្រទេសជាតិនោះ រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រត្រីកោណ ដែលក្នុងនោះរួមមាន០៣មុំ ទី១គឺការធ្វើសន្តិភារូបនីកម្ម ,ទី២គឺ ការធ្វើសមាហរណកម្មឆាប់បំផុតរបស់កម្ពុជាទៅក្នុងសហគមន៍អន្តរជាតិ និងទី៣គឺ ការប្រមូលផ្ដុំកម្លាំងផ្ទៃក្នុងដើម្បីកសាងអភិវឌ្ឍន៍ប្រទេសជាតិឡើងវិញ។

ជាមួយគ្នានេះ សម្តេចតេជោ ហ៊ុន សែន បានមានប្រសាសន៍ថា កំណាត់ផ្លូវជាតិលេខ៧នេះ គឺជាការតភ្ជាប់ដ៏មានសារៈសំខាន់ មិនត្រឹមតែក្នុងខេត្តកំពង់ចាមទេ តែមានការតភ្ជាប់ទៅកាន់ខេត្តជាច្រើនផ្សេងទៀតផងដែរ។ សម្តេចតេជោ បានកោតសរសើរចុះពោះក្រសួងសាធារណការ និងដឹកជញ្ជូន ព្រមទាំងអាជ្ញាធរពាក់ព័ន្ធទាំងអស់ ដែលបានប្រឹងប្រែងរួមគ្នាឱ្យគម្រោងពង្រីក និងលើកកម្ពស់កម្រិតផ្លូវជាតិលេខ៧នាពឹលនេះ។

ពាក់ព័ន្ធទៅនឹងសារនយោបាយនៅថ្ងៃនេះ សម្តេចតេជោ ហ៊ុន សែន បានអំពាវនាវឱ្យគណបក្សនយោបាយ ដែលចង់ឈ្នះឆ្នោតឱ្យបញ្ឈប់ការវាយប្រហារលើបក្សប្រជាជនកម្ពុជា។ គណបក្សនយោបាយនីមួយៗអាចឃោសនាពីបក្សរបស់ខ្លួនឯងបានហើយ កុំវាយប្រហារមកលើគណបក្សប្រជាជន។ សម្តេចតេជោក៏បានដាសតឿនដល់បក្សនយោបាយប្រឆាំងថា បើនៅតែបន្តវាយប្រហារលើបក្សប្រជាជនកម្ពុជា នោះសម្តេចនឹងប្រើសិទ្ធិការពារខ្លួនហើយ។

សម្តេចតេជោបានមានប្រសាសន៍ថា សម្តេចនឹងបញ្ចប់ការនិយាយមូលបង្កាច់របស់បក្សប្រឆាំង ចោទគណបក្សប្រជាជនកម្ពុជាថាជា ចោរលួចសន្លឹកឆ្នោត នៅក្រោយពេលបោះឆ្នោត ដោយការប្រើយន្តការច្បាប់។ សម្តេចតេជោក៏បានឆ្លើយតបនឹងការចោទប្រកាន់ និងវាយប្រហារបក្សប្រជាជនកម្ពុជា ពីសំណាក់បក្សប្រឆាំងថា ជម្រើសមានតែពីរទេ គឺវិធានការច្បាប់ និងដំបង។ តើរើសយកមួយណា? ។សម្តេចតេជោក៏បានធ្វើការព្រមានចំពោះលោក គង់ គាំ ផងដែរ ចំពោះរឿងវាយប្រហារមកលើបក្សប្រជាជនកម្ពុជា។

សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានបង្ហើបថា មន្ត្រីជាន់ខ្ពស់របស់គណបក្សភ្លើងទៀន លោក ថាច់ សេដ្ឋា បានទៅជួប ឯកឧត្តម ហ៊ុន ម៉ាណែត បេក្ខភាពអនាគតនាយករដ្ឋមន្ត្រីរបស់គណបក្សប្រជាជនកម្ពុជា កាលពីប៉ុន្មានថ្ងៃមុន ខណៈសម្ដេចតេជោ មិនបានជម្រាបលំអិតនោះទេ។

សម្ដេចតេជោ ហ៊ុន សែន បញ្ជាក់ថា លោក ថាច់ សេដ្ឋា បាននិយាយពីរឿងចាប់ខ្លួនសមាជិកបក្សខ្លួនទៅឯកឧត្តម ហ៊ុន ម៉ាណែត ខណៈឯកឧត្តម ហ៊ុន ម៉ាណែត បានឆ្លើយតបវិញថា បើមិនចង់ឱ្យចាប់ខ្លួន លុះត្រាតែសមាជិកបក្សលោក ថាច់ សេដ្ឋា កុំធ្វើខុសច្បាប់ គឺបានហើយ។

សម្តេចក៏បានប្រកាសដែរថា នឹងពិចារណា តម្រូវឲ្យមន្ត្រីរាជការ កងកម្លាំងប្រដាប់អាវុធ និងអ្នកនយោបាយត្រូវមានសញ្ជាតិតែមួយ។ សម្តេចតេជោ បញ្ជាក់ថា យើងត្រូវតែគិតធ្វើរឿងសញ្ជាតិនេះដែរ តើនៅក្នុងអាស៊ីអាគ្នេយ៍នេះមានប្រទេសប៉ុន្មានដែលអនុញ្ញាតឲ្យមានសញ្ជាតិពីរធ្វើនយោបាយ?។ សម្តេចតេជោ បានបង្ហាញការធុញទ្រាន់នឹងជនបរទេស ពោល គឺអគ្គរដ្ឋទូតបរទេសដែលជួបជាមួយសម្តេច ហើយបញ្ចេញទស្សនការពារអ្នកនយោបាយខ្មែរដែលមានសញ្ជាតិបរទេសដែរនោះ ។ សម្តេច បានបញ្ជាក់ថា គណបក្សប្រជាជនកម្ពុជាមានលទ្ធភាពធ្វើវិសោធនកម្មដើម្បីដាក់ចេញការអនុវត្តសញ្ជាតិមួយសម្រាប់អ្នកធ្វើនយោបាយនៅស្រុកខ្មែរ ដើម្បីបញ្ចប់ជាស្ថាពរនូវអ្វីដែលពាក់ព័ន្ធ។

ជាមួយគ្នានេះ សម្តេចតេជោ ហ៊ុន សែន បានថ្លែងថា ប្រសិនបើអគ្គរដ្ឋទូត ដែលការពារអ្នកនយោបាយដែលខុសច្បាប់ យើងនឹងពិចារណារឿងនេះ ខណៈនៅកម្ពុជា បច្ចុប្បន្ន បានហាមឃាត់មនុស្ស ១៣នាក់ទេ មានសញ្ជាតិតែមួយ គឺគណៈកម្មាធិការជាតិរៀបចំការបោះឆ្នោតទាំង ៩នាក់ ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ។

បន្ទាប់មក សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា បានអញ្ជើញបញ្ជាគ្រឿងចក្រជានិមិត្តរូប បើកការដ្ឋានសាងសង់លើកម្រិតគុណភាពផ្លូវជាតិលេខ៧ ចាប់ពីពេលនេះតទៅ៕ ដោយ ៖ វណ្ណលុក