កាលីហ្វ័រញ៉ា៖ នគរបាលប្រចាំទីក្រុងឡូស អេនជឺឡេស បាននិយាយថា មនុស្ស១០នាក់បានស្លាប់នៅក្នុងការបាញ់ប្រហារដ៏ធំមួយ នៅក្នុងទីក្រុង Monterey Park រដ្ឋ កាលីហ្វ័រញ៉ា។

ក្រៅពីស្លាប់មនុស្ស១០នាក់ហើយ នៅមានមនុស្ស ១០ នាក់ផ្សេងទៀតត្រូវបានបញ្ជូនទៅមន្ទីរពេទ្យក្នុងតំបន់ ដើម្បីព្យាបាលរបួស ហើយយ៉ាងហោចណាស់ មានម្នាក់ស្ថិតក្នុងស្ថានភាពធ្ងន់ធ្ងរ។

នគរបាលនិយាយនៅក្នុងសេចក្តីថ្លែងការណ៍ខ្លីមួយថា “អ្នកស៊ើបអង្កេតឃាតកម្ម របស់ប៉ូលីសខោនធី Los Angeles កំពុងឆ្លើយតបដើម្បីជួយនាយកដ្ឋានប៉ូលីស Monterey Park ជាមួយនឹងការស៊ើបអង្កេតការបាញ់ប្រហារ ដោយមានអ្នកស្លាប់ ចំនួនដប់នាក់” ។

នគរបាលបានឲ្យដឹងថា ជនសង្ស័យជាបុរសម្នាក់ ប៉ុន្តែមិនច្បាស់ថាតើ ជានរណាឲ្យប្រាកដនៅឡើយទេ គ្រាន់តែកំពុងតាមរកចាប់ខ្លួន។ ការបាញ់ប្រហារនេះបានកើតឡើងក្រោយម៉ោង១០យប់ ថ្ងៃសៅរ៍ ចុងសប្តាហ៍។ ប្រព័ន្ធផ្សព្វផ្សាយអាមេរិកបានរាយការណ៍ថា ទីតាំងកើតហេតុការណ៍ នៅកន្លែងការប្រារព្ធពិធីបុណ្យចូលឆ្នាំចិន នៅក្នុងឧទ្យាន Monterey ៕ ប្រភពពី Reuters ប្រែសម្រួលដោយ៖ សារ៉ាត