សម្ដេចតេជោ ហ៊ុន សែន៖ យ៉ាងយូរដើមឆ្នាំក្រោយ យុវជនក្រីក្រ នឹងទទួលបានការបណ្ដុះបណ្ដាលវិជ្ជាជីវៈដោយឥតគិតថ្លៃ ហើយទទួលបានប្រាក់ខែទៀត
ភ្នំពេញ៖ សម្ដេចតេជោ ហ៊ុន សែន បានថ្លែងថា៖ យ៉ាងយូរដើមឆ្នាំក្រោយ កម្ពុជានឹងអនុវត្ដន៍គោលនយោបាយថ្មីមួយគឺផ្ដោតលើការបណ្ដុះបណ្ដាលជំនាញបច្ចេកទេសវិជ្ជាជីវៈដល់យុវជនក្រីក្រ ដោយឥតគិតថ្លៃ ហើយថែមនឹងផ្ដល់ប្រាក់ខែឲ្យថែមទៀត។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងដូចនេះ នៅព្រឹកថ្ងៃទី២៣ ខែមករា ឆ្នាំ២០២៣ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់ ដែលពិធីនេះធ្វើឡើងនៅ មជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ OCIC រាជធានីភ្នំពេញ។
សម្ដេចតេជោ ហ៊ុន សែន បានលើកឡើងថា គោលដៅនោះ គឺប្រមូលសិស្សដែលក្រីក្រ មិនបានបន្តការសិក្សាអប់រំ ឲ្យទទួលបានការបណ្ដុះបណ្ដាលជំនាញវិជ្ជាជីវៈក្នុង១ឆ្នាំ យ៉ាងហោច ១លាន ៥សែននាក់។
សម្ដេចបន្តថា៖ បើយើងដោះស្រាយក្នុង ១លាន ៥សែននាក់ និងធ្វើឲ្យសេដ្ឋកិច្ចក្រៅប្រព័ន្ធ ធ្វើសមាហរណកម្មជាមួយសេដ្ឋកិច្ចខាងក្នុង ។ សម្ដេចតេជោ នាយករដ្ឋមន្ត្រី បានបញ្ជាក់ថា នេះគឺជាគំនិតរបស់សម្ដេច ហើយការដាក់អនុវត្តគឺនឹងអាចចាប់ផ្ដើមនៅចុងឆ្នាំនេះ ឬនៅដើមឆ្នាំក្រោយ ៕ ដោយ វណ្ណលុក