ម៉ានីល៖ ប្រទេសហ្វីលីពីនគ្រោងនឹងផ្តល់ការបង្វិលសងពន្ធលើតម្លៃបន្ថែម (VAT) ដល់ភ្ញៀវទេសចរបរទេសនៅឆ្នាំ២០២៤។

ការិយាល័យទំនាក់ទំនងរបស់ ប្រធានាធិបតីហ្វីលីពីន បានឲ្យដឹងកាលពីថ្ងៃអាទិត្យថា លោកប្រធានាធិបតីហ្វីលីពីន ហ្វឺឌីណាន ម៉ាកូស (Ferdinand Marcos) បានអនុម័តកម្មវិធីបង់ពន្ធតម្លៃបន្ថែម (VAT) សម្រាប់ភ្ញៀវទេសចរបរទេសនៅឆ្នាំ ២០២៤ ដើម្បីទាក់ទាញអ្នកទស្សនាកាន់តែច្រើន។

រដ្ឋាភិបាលប្រមូលពន្ធលើតម្លៃបន្ថែម (VAT) ១២% លើទំនិញប្រើប្រាស់ ក្នុងប្រទេសអាស៊ីអាគ្នេយ៍មួយនេះ ហើយផែនការនេះគឺដើម្បីអនុញ្ញាតឱ្យជនបរទេសទទួលបានប្រាក់សំណងពន្ធលើតម្លៃបន្ថែម (VAT) លើទំនិញដែលពួកគាត់យកចេញពីប្រទេសហ្វីលីពីន ស្រដៀងទៅនឹងអ្វីដែលប្រទេសជាច្រើនទៀតផ្តល់ជូន។

ការិយាល័យបានឲ្យដឹង តាមរយៈសេចក្តីថ្លែងការណ៍មួយថា វិធានការនេះគឺស្ថិតក្នុងចំណោមសំណើដែលក្រុមប្រឹក្សាផ្តល់យោបល់ផ្នែកឯកជនដែលបានបង្ហាញដល់លោក លោកម៉ាកូស នាពេលថ្មីៗនេះ ដើម្បីជំរុញឧស្សាហកម្មទេសចរណ៍ រួមទាំងការកែលម្អហេដ្ឋារចនាសម្ព័ន្ធព្រលានយន្តហោះ និងប្រតិបត្តិការ និងការលើកកម្ពស់ការវិនិយោគទេសចរណ៍។

លោក ម៉ាកូស ក៏បានយល់ព្រមលើការដាក់ឱ្យដំណើរការទិដ្ឋាការ តាមអនឡាញ នៅឆ្នាំនេះ សម្រាប់ភ្ញៀវទេសចរចិន ឥណ្ឌា កូរ៉េខាងត្បូង និងជប៉ុនផងដែរ៕ ប្រភពពី Reuters ប្រែសម្រួលដោយ៖ សារ៉ាត