ភ្នំពេញ៖ ឯកឧត្តម ស សុខា អនុប្រធានក្រុមការងាររាជរដ្ឋាភិបាល ចុះមូលដ្ឋានខេត្តព្រៃវែង ខេត្តបន្ទាយមានជ័យ និងជាអនុប្រធានគណ:កម្មាធិការ គ.២៧៨ បានអញ្ជើញដឹកនាំ កិច្ចប្រជុំបូកសរុបលទ្ធផលការងារប្រចាំឆ្នាំ២០២២ និងលើកទិសដៅអនុវត្តបន្ត ឆ្នាំ២០២៣ របស់ក្រុមការងារយុវជនខេត្តព្រៃវែង បាត់ដំបង និងខេត្តបន្ទាយមានជ័យ នៅព្រឹកថ្ងៃព្រហស្បតិ៍ ទី២ ខែកុម្ភៈ ឆ្នាំ២០២៣។

ក្នុងរបាយការណ៍នៃកិច្ចប្រជុំ បានលើកឡើងថា សមិទ្ធផល ដែលក្រុមការងារសម្រេចបានក្នុងឆ្នាំ ២០២២ គឺជាភាពជោគជ័យគួរជាទីមោទន ក្រោមការដឹកនាំតម្រង់ទិសរបស់ឯកឧត្តម ស សុខា និងកិច្ចខិតខំប្រឹងប្រែងពីសមាជិក សមាជិកាគ្រប់លំដាប់ថ្នាក់។ ចំពោះបញ្ហាប្រឈមនានា ក្រុមការងារ នឹងរិះរកដំណោះស្រាយ ដើម្បីសម្រេចឱ្យបានជាវិជ្ជមាន ស្របតាមគោលនយោបាយរបស់ថ្នាក់ដឹកនាំ ។

ជាមួយគ្នានេះ ក្រុមការងារអភិវឌ្ឍយុវជនខេត្តព្រៃវែង ខេត្តបាត់ដំបង និងខេត្តបន្ទាយមានជ័យ បានប្តេជ្ញាធ្វើយ៉ាងណា សម្រេចឱ្យបាន នូវសមិទ្ធផលនានាជាច្រើនបន្ថែមទៀត ដើម្បីរួមចំណែកជាមួយរាជរដ្ឋាភិបាល ក្នុងការចូលរូមអភិវឌ្ឍធនធានមនុស្ស សង្គម-សេដ្ឋកិច្ច ៕

ដោយ វណ្ណលុក