ការអភិវឌ្ឍសហគមន៍មូលដ្ឋាន ចូលរួមលើកកម្ពស់ជីវភាព សហគមន៍មូលដ្ឋាន និងសហគមន៍តំបន់ការពារធម្មជាតិ
ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន បានលើកឡើងថា ការអភិវឌ្ឍសហគមន៍មូលដ្ឋាន ចូលរួមលើកកម្ពស់ជីវភាពសហគមន៍មូលដ្ឋាន និងសហគមន៍តំបន់ការពារធម្មជាតិ។ ការលើកឡើងរបស់មន្រ្តីជាន់ខ្ពស់ក្រសួងបរិស្ថានរូបនេះ បានធ្វើឡើងក្នុងពិធីបិទវគ្គបណ្តុះបណ្តាលជំនាញមគ្គុទ្ទេសក៍ទេសចរណ៍ បដិសណ្ឋារកិច្ច និងជំនាញចុងភៅ សម្រាប់សហគមន៍តំបន់ការពារធម្មជាតិក្នុងខេត្តកំពង់ធំ ដែលបានប្រព្រឹត្តទៅនៅក្នុងថ្ងៃទី០៦ ខែកុម្ភៈ ឆ្នាំ២០២៣ នៅមន្ទីរបរិស្ថានខេត្តកំពង់ធំ។
![](https://asset.ams.com.kh/central/media/2023/02/329146536_885901362614780_1494788486314891059_n-1024x682.jpg)
ឯកឧត្តម អនុរដ្ឋលេខាធិការ បានបន្ថែមថា បច្ចុប្បន្នតំបន់ការពារធម្មជាតិនៅកម្ពុជា មានចំនួនរហូតដល់ ៧៣តំបន់ គ្របដណ្តប់លើផ្ទៃដីប្រមាណ ៧,៣ លានហិកតា ដែលជាមូលដ្ឋានក្នុងការបង្កើតសហគមន៍ការពារធម្មជាតិ ដើម្បីចូលរួមការពារធនធានធម្មជាតិ បានល្អប្រសើរសម្រាប់កូនចៅតជំនាន់។
![](https://asset.ams.com.kh/central/media/2023/02/329577462_491530412958018_7726283178221473900_n-1024x682.jpg)
ជាមួយគ្នានេះ ក្រសួងបរិស្ថានបានអនុវត្តន៍ និងសហការអនុវត្តន៍ជាមួយស្ថាប័នរដ្ឋ ឯកជន និងដៃគូអភិវឌ្ឍន៍មួយចំនួនលើការលើកកម្ពស់ជីវភាព រស់នៅរបស់សហគមន៍មូលដ្ឋាន ដើម្បីផ្តល់ឱកាសដល់គ្រួសារសហគមន៍ ស្វែងរកចំណូលគ្រប់គ្រាន់សម្រាប់ចិញ្ចឹមគ្រួសារ ជាពិសេសបង្កលលទ្ធភាពបញ្ជូនកូនចៅទៅសាលារៀន ដែលផ្តល់នូវក្តីសង្ឃឹម ថាកូនចៅជំនាន់ក្រោយ នឹងលែងអាស្រ័យផល និងប្រើប្រាស់ធនធានធម្មជាតិមកបង្កើនជីវភាពតាមរយៈមុខរបរថ្មី ហើយទន្ទឹមនោះ នឹងកាត់បន្ថយការដាក់សម្ពាធន៍មកលើធនធានធម្មជាតិ និងជីវចម្រុះ ហើយបង្កើនក្តីស្រឡាញ់ជាតិ មាតុភូមិរបស់ខ្លួនកាន់តែខ្លាំង។
![](https://asset.ams.com.kh/central/media/2023/02/327165774_659746502568620_2591033875299686412_n-1024x934.jpg)
ឯកឧត្តម ខ្វៃ អាទិត្យា បានបន្ថែមថា កម្ពុជាបានពង្រឹងការគ្រប់គ្រងធនធានធម្មជាតិ និងអភិរក្សជីវៈចម្រុះ ការលើកកម្ពស់ជីវភាពសហគមន៍មូលដ្ឋាន ការអប់រំផ្សព្វផ្សាយស្មារតី «កម្ពុជាមាតុភូមិខ្ញុំ» ដែលបានប្រែក្លាយវិស័យបរិស្ថានទៅជា «ក្រវ៉ាត់បៃតង» និងសំដៅធានាបាននូវឧត្តមប្រយោជន៍ជាតិយូរអង្វែង ទាំងផ្នែកបរិស្ថាន សេដ្ឋកិច្ច សង្គម វប្បធម៌ និងនយោបាយ។
![](https://asset.ams.com.kh/central/media/2023/02/329535857_1905913153080989_1332310325742294679_n-1024x682.jpg)
ឯកឧត្តមបានចាត់ទុកថា វគ្គបណ្តុះបណ្តាលជំនាញមគ្គុទ្ទេសក៍ទេសចរណ៍ បដិសណ្ឋារកិច្ច និងជំនាញចុងភៅ សម្រាប់សហគមន៍តំបន់ការពារធម្មជាតិ ក្នុងខេត្តកំពង់ធំ ដែលបានប្រព្រឹត្តទៅចាប់ពីថ្ងៃទី១ ដល់ថ្ងៃទី៥ ខែ ខែកុម្ភៈ ឆ្នាំ២០២៣ នៅមន្ទីរបរិស្ថានខេត្តកំពង់ធំ គោលបំណងតែមួយគឺឆ្លុះបញ្ជាំង ពីភាពចាំបាច់នៅក្នុងការអភិវឌ្ឍជំនាញវិជ្ជាជីវៈ ដើម្បីលើកកម្ពស់សមត្ថភាពរបស់ប្រជាពលរដ្ឋគ្រប់រូប ក្នុងការចាប់យកឱកាសកាងារល្អ និងលើកស្ទួយកម្រិតជីវភាពរបស់ពួកគាត់ កាន់តែប្រសើរឡើង តាមរយៈផ្តល់ជូននូវជម្រើសមុខរបរ បន្ថែមទៀតក្រៅពីអ្វី ដែលធ្លាប់ប្រមូលផល អាស្រ័យផល លើធនធានធម្មជាតិ ក៏ដូចជាព្រៃឈើ។
![](https://asset.ams.com.kh/central/media/2023/02/329040613_1363324871150353_3208400425703230614_n-1024x576.jpg)
សូមបញ្ជាក់ថា វគ្គបណ្តុះបណ្តាលជំនាញវគ្គមគ្គុទេសក៍ទេសចរណ៍ បដិសណ្ឋារកិច្ច និងជំនាញចុងភៅ សម្រាប់ការពារតំបន់ការពារធម្មជាតិ ក្នុងខេត្តកំពង់ធំ រយៈពេល៥ថ្ងៃចាប់ពីថ្ងៃទី១ ដល់ថ្ងៃទី៥ ខែកុម្ភៈ ឆ្នាំ២០២៣ ដែលត្រូវបានបែងចែកចេញជា ២ផ្នែក ក្នុងនោះមាន មគ្គុទេសក៍ បដិសណ្ឋាការកិច្ច ការស្វាគមន៍ ក៏ដូចជាការការអត្ថាធិប្បាយ ជូនភ្ញៀវទេសចរណ៍ និងទី២ គឺផ្នែកចុងភៅ ដែលមានគ្រូឧទ្ទេសពីខាងក្រសួងទេសចរណ៍ និងមានសិក្ខាកាមចំនួន ២០នាក់ មកពីសហគមន៍តំបន់ការពារធម្មជាតិចំនួន៧ នៅក្នុងខេត្តកំពង់ធំ។
![](https://asset.ams.com.kh/central/media/2023/02/329236043_1790681841333191_814277983602619916_n-1024x768.jpg)
ក្រសួងបរិស្ថានបានបង្កើតគម្រោងពិព័រណ៍សហគមន៍ គម្រោងពិព័រណ៍សហគមន៍ជាគម្រោងទី១ ក្រោមការណែនាំរបស់ឯកឧត្តមរដ្ឋមន្ត្រី ក្នុងគោលដៅជំរុញលើកកម្ពស់សហគមន៍តំបន់ការពារធម្មជាតិ ឲ្យមានជីវភាពរុងរឿង តាមរយៈការបង្កើតមុខរបរដល់គ្រួសារសហគមន៍។ គម្រោងនេះត្រូវយកមកអនុវត្តមុនគេក្នុងខេត្តកំពង់ធំ។
![](https://asset.ams.com.kh/central/media/2023/02/329376121_746746573508272_1846819245754987915_n-1024x576.jpg)
លោក សេង សោត អគ្គនាយករង នៃអគ្គនាយកដ្ឋានសហគមន៍មូលដ្ឋាន និងជាប្រធានគម្រោងពិព័រណ៍សហគមន៍ បានឲ្យដឹងថា តាមរយៈគម្រោងពិព័រណ៍សហគមន៍ ដែលគាំទ្រដោយមូលនិធិបរិស្ថាន និងសង្គម ក្រុមការងារអនុវត្តគម្រោងបានសម្របសម្រួលបើកវគ្គបណ្តុះបណ្តាលចំណេះជំនាញដល់សហគមន៍តំបន់ការពារធម្មជាតិទាំង ១៧ ក្នុងខេត្តកំពង់ធំ ក្នុងនោះសហគមន៍ចំនួន ១១នាក់បានរៀនភ្លេងប្រពៃណីដោយសហការជាមួយមន្ទីរវប្បធម៌ខេត្ត សហគមន៍ចំនួន ២នាក់បានរៀនចប់វគ្គជួសជុលម៉ូតូដោយសហការជាមួយវិទ្យាស្ថានពហុបច្ចេកទេសកំពង់ធំ សហគមន៍ចំនួន ១៤នាក់ បានរៀនចប់វគ្គភ្នាក់ងារពេទ្យសត្វភូមិដោយសហការជាមួយមន្ទីរកសិកម្មខេត្ត និងសហគមន៍ចំនួន ២០នាក់ និងមន្ត្រីនៃមន្ទីរបរិស្ថាន ៤នាក់ បានរៀនចប់វគ្គមគ្គុទេសក៍ទេសចរណ៍ បដិសណ្ឋារកិច្ច និងធ្វើម្ហូប (១៣មុខ) ដោយសហការជាមួយក្រសួងទេសចរណ៍។ ប្រជាពលរដ្ឋមកពីសហគមន៍តំបន់ការពារធម្មជាតិ អាចទទួលបានជំនាញ និងអាចប្រកបរបរនៅក្នុងសហគមន៍ រកចំណូលសម្រាប់បង្កើនជីវភាពគ្រួសារផងដែរ៕ក្រសួងបរិស្ថាន
![](https://asset.ams.com.kh/central/media/2023/02/329526252_722758579430711_4044391306925713052_n-1024x576.jpg)