ខេត្តសៀមរាប៖ ផ្កាឈូករត្នដ៏ស្រស់ស្អាតដែលត្រូវបាន ក្រសួងបរិស្ថាន ដាំនៅបរិវេណ មជ្ឈមណ្ឌល ស្រាវជ្រាវ និងអភិរក្សសួនកេសរកូល(ផ្កាអ័រគីដេ) សុខអាន ភ្នំគូលែន បាននឹងកំពុងរីកស្គុះស្គាយគួរជាទាក់ទាញភ្ញៀវទេសចរចូលកម្សាន្ត និងថតផ្តិតយករូបភាពមិនចេះនឿយណាយ។

សួនផ្កា ឈូករត្ន ដ៏ស្រស់ស្អាតនេះត្រូវបានគេដាំយ៉ាងមានរបៀបរៀបរយប្រកបដោយប្រណិតភាពនៅបរិវេណមជ្ឈមណ្ឌល ស្រាវជ្រាវ និងអភិរក្សសួនកេសរកូល សុខអាន ភ្នំគូលែន ខេត្តសៀមរាប។

គិតរហូតមកដល់លពេលនេះផ្កាឈូករត្នដ៏ស្រស់ស្អាតនេះត្រូវបានទាក់ទាញភ្ញៀវទេសចរចូលកម្សាន្ត និងផ្តល់នូវអត្ថប្រយោជន៍ដល់ប្រជាសហគមន៍ក្នុងការរកប្រាក់ចំណូលសម្រាប់ផ្គត់ផ្គង់ជីវភាពតាមរយៈវិស័យទេសចរណ៍ជាបន្តបន្ទាប់។

លោកជំទាវ ចាន់ សុម៉ាលី អនុរដ្ឋលេខាធិការក្រសួងបរិស្ថាន ទទួលបន្ទុកមជ្ឈមណ្ឌលស្រាវជ្រាវ និងអភិរក្សសួនកេសរកូល សុខអាន ភ្នំគូលែនបានបញ្ជាក់ប្រាប់ថា៖ មូលហេតុដែលក្រសួងបរិស្ថាន និងមជ្ឈមណ្ឌលស្រាវជ្រាវ និងអភិរក្សសួនកេសរកូល សុខអាន ភ្នំគូលែន ជ្រើសរើសដាំផ្កាឈូករត្ននេះឡើង ហើយមិនជ្រើសរើសដាំផ្កាផ្សេងទៅវិញទាំងនេះដោយសារថាផ្កាឈូករត្ន មានសារៈសំខាន់ ៣យ៉ាងដែលយើងមិនអាចមើលរំលងបាន ទី១គឺ ផ្កាប្រភេទនេះវាបានផ្តល់នូវសម្រស់ជាងគេដោយសារវាមានផ្កាធំប្រកបទៅដោយភាពស្រស់ឆើតឆាយអាចទាក់ទាញភ្នែកទេសចរដែលទោះអស់កម្លាំងបែបណា ពេលបានឃើញផ្កាទាំងនេះហើយ ក៏មានអារម្មណ៍ស្រស់ស្រាយដែរ។ ហេតុនេះវាបានក្លាយជាទីទាក់ទាញដល់ភ្ញៀវទេសចរណ៍ចូលកម្សាន្ត ដើម្បីធ្វើយ៉ាងណាផ្សារភ្ជាប់រវាងទេសចរន៍និងទឹកដី ។ ទី២គឺ ដោយសារផ្កាឈូករដ្ឋបានផ្តល់នូវលំអងទាក់ទាញនូវសត្វល្អិតពិសេសសត្វឃ្មុំ ដែលសត្វទាំងអស់នេះជាអ្នកនាំលម្អងសម្រាប់ពង្រីក ក៏ដូចជាបង្កាត់ពូជដល់រុក្ខជាតិនិងដើមឈើដទៃទៀត ។ និង ទី៣ គឺដោយសារតែ គ្រាប់ផ្កាឈូករដ្ឋមានវីតាមីនច្រើន មានប្រូតេអ៊ីនខ្ពស់ និងអាចព្យាបាលជំងឺផ្សេងៗដូច្នេះហើយគោលគំនិតរបស់ក្រសួងបរិស្ថានពិសេស ឯកឧត្តមរដ្ឋមន្រ្តី សាយ សំអាល់ ចង់ឃើញពលរដ្ឋដាំផ្កាឈូករដ្ឋនៅតាមផ្ទះ និងមានគ្រាប់ផ្កានេះ ហូបជាអាហារសម្រាប់បំប៉នសុខភាព ។ ផ្កាទាំងអស់នេះងាយដាំទេ យើងដាំហើយយកគ្រាប់វាមកលីងសម្រាប់ជំនួយដល់សុខភាពផង និងអាហាររូបបឋមផ្សេងៗផង។

លោកជំទាវបានមានប្រសាសន៍ថាផ្កាឈូករដ្ឋនេះត្រូវបានដាំទំហំចំនួន ២ហិកតា ហើយបើយើងមើលពីលើវិញគេនឹងឃើញរូបរាងជាអក្សរគូលែនដែលតំណាងឱ្យទីតាំងកន្លែងភ្នំគូលែនតែម្តង។សម្រាប់ផ្តាឈូករដ្ឋនេះក្នុងរយៈពេលត្រឹមតែ៣ខែគឺបានទទួលផលហើយដែរ។

គួរបញ្ជាក់ថា សូមបញ្ជាក់ថាមជ្ឈមណ្ឌលស្រាវជ្រាវ និង អភិរក្សកេសកូលសុខអានភ្នំគូលែនស្ថិតនៅក្នុងស្រុកបន្ទាយស្រី ខេត្តសៀមរាបពោលគឺស្ថិតនៅជើងភ្នំគូលែន ក្បែរ ច្រកចូលឡើងទៅ លើ រមណីយដ្ឋានខ្នងភ្នំគូលែន។មជ្ឈមណ្ឌលមួយនេះ ត្រូវបានគេរៀបចំនូវផែនការមេ១៦តំបន់ ។ក្រៅពីនេះមជ្ឈមណ្ឌលនេះ ក៏កំពុងបានប្រែក្លាយជាការបែងចែកតំបន់អភិវឌ្ឍន៍ ដូចជាការរៀបចំហេដ្ឋារចនាសម្ព័ន, ការសិក្សាស្រាវជ្រាវ, ការអប់រំផ្សព្វផ្សាយ, ការរៀបចំចិញ្ចឹមសត្វ និងយន្តការអភិវឌ្ឍន៍៕ដោយ៖ម៉ាដេប៉ូ