ភ្នំពេញ ៖ ពិព័រណ៌លក់សៀវភៅធំបំផុតលើពិភពលោក បានវិលត្រលប់មកប្រទេសកម្ពុជាវិញម្តងទៀត ជាមួយនឹងការលក់ក្នុងតម្លៃធូរថ្លៃមិនធ្លាប់មានពីមុន បន្ទាប់ពីព្រឹត្តិការណ៍ពិព័រណ៌នេះ បានផ្អាករយៈពេលពីរឆ្នាំកន្លងមកដោយសារតែជំងឺរាតត្បាត។

ពិព័រណ៌លក់សៀវភៅនេះ នឹងចាប់ផ្ដើមប្រព្រឹត្តិទៅពីថ្ងៃទី២២ ខែកុម្ភៈ រហូតដល់ថ្ងៃទី៥ ខែមីនាខាងមុខ ដោយផ្ដល់ជូននូវសៀវភៅដ៏អស្ចារ្យជាច្រើន ដែលមានតម្លៃសមរម្យរហូតដល់១ដុល្លារក៏មាន។ ជាមួយគ្នានេះ អ្នករៀបចំកម្មវិធីបានប្រកាសអញ្ជើញសិស្សនិសិត្ស ជាពិសេសបងប្អូនប្រជាពលរដ្ឋដែលនិយមចូលចិត្តអាន និងស្រឡាញ់សៀវភៅទាំងអស់មកពីទូទាំងរាជធានី-ខេត្ត ចូលរួមដើម្បីចាប់យកឱកាសជាវនូវសៀវភៅដែលមានតម្លៃធូរថ្លៃបំផុត និងមានច្រើនជម្រើស ក្នុងនោះមានតាំងពីសៀវភៅប្រលោមលោក និងសៀវភៅមិនមែនប្រលោមលោក សៀវភៅកុមារដល់សៀវភៅសម្រាប់យុវវ័យ ព្រមទាំងសៀវភៅជាច្រើនជម្រើសផ្សេងទៀតនៅពិព័រណ៌លក់សៀវភៅនេះ។

អ្នករៀបចំកម្មវិធីបានបញ្ជាក់ឱ្យដឹងថា ពិព័រណ៌លក់សៀវភៅនេះ នឹងបើកដំណើរការជារៀងរាល់ថ្ងៃ ចាប់ពីម៉ោង៩.០០ព្រឹក ដល់ម៉ោង១២អធ្រាត សម្រាប់រយៈពេល១២ថ្ងៃជាប់ៗគ្នា។ បើតាមអ្នករៀបចំកម្មវិធី ពិព័រណ៌លក់សៀវភៅនេះនឹងពោរពេញទៅដោយសៀវភៅល្អៗរាប់ពាន់ក្បាល ដែលមាននូវប្រភេទចម្រុះគ្នាជាច្រើន មានតាំងពីសៀវភៅបែបអាថ៌កំបាំង ស្នេហា សៀវភៅប្រឌិតវិទ្យាសាស្ត្រ និងជាច្រើនប្រភេទផ្សេងទៀត។ ហើយអ្វីដែលពិសេសបំផុតនោះ គឺពិព័រណ៌លក់សៀវភៅមិនធ្លាប់មានពីមុនមកនេះ គឺបងប្អូនសិស្សនិសិត្សអាចបានចូលរួមដោយសេរី និងឥតគិតថ្លៃ។

សូមជម្រាបថា ដោយបានបើកសម្ពោធជាលើកដំបូងនៅកម្ពុជា សម្រាប់ការបោះពុម្ពផ្សាយលើកទីមួយនៅឆ្នាំ២០២២ ហាងសៀវភៅ Big Bad Wolf Books បានទទួលនូវភាពជោគជ័យយ៉ាងធំធេងនៅក្នុងពិព័រណ៌លក់សៀវភៅរបស់ខ្លួន។ តាមរយៈការត្រលប់មកវិញជាលើកទីពីរសម្រាប់ការបោះពុម្ពផ្សាយផ្ទាល់លើកទីពីរនៅចុងខែនេះ អ្នកដែលស្រឡាញ់ការអានសៀវភៅ អាចចាប់ផ្ដើមត្រៀមខ្លួនទទួលយកនូវសៀវភៅជាភាសាអង់គ្លេសមានគុណភាពខ្ពស់ដ៏ច្រើនសម្បូរបែបសម្រាប់ជ្រើសរើស។ ពេលវេលានេះ គឺជាឱកាសល្អបំផុតក្នុងការជាវនូវសៀវភៅដែលជាទីពេញចិត្ត ដោយសារតែពិព័រណ៌លក់សៀវភៅមិនធ្លាប់មានពីមុនមកនេះ គឺពិតជាធ្វើឱ្យបងប្អូនសិស្សនិសិត្សមិនខកបំណងឡើយ៕

ដោយ៖ ទីណា