អង់ការ៉ា៖ ក្រុមជួយសង្គ្រោះធ្វើការពេញមួយយប់នៅក្នុងប្រទេសទួកគី ដើម្បីរំដោះក្មេងប្រុសម្នាក់ ដែលជាប់គាំង អស់រយៈពេល ២៦០ម៉ោង ឬជិត១១ថ្ងៃ បន្ទាប់ពីការរញ្ជួយដីដ៏ធំមួយ វាយប្រហារប្រទេសនេះ។

ក្មេងប្រុសម្នាក់ត្រូវបានទាញចេញពីគំនរបាក់បែកនៃការរញ្ជួយដីនៅ ហាតាយ (Hatay) ប្រទេសទួកគី នៅថ្ងៃសុក្រ ថ្ងៃទី ១៧ ខែកុម្ភៈ បន្ទាប់ពីនៅរស់រានមានជីវិត អស់រយៈពេល២៦០ម៉ោង ឬស្មើនឹងជិត ១១ថ្ងៃ។

ក្រុមជួយសង្គ្រោះបានធ្វើការពេញមួយយប់ ដោយកាន់ភ្លើង និងថតការសង្គ្រោះ ហើយអបអរសាទរ នៅពេលដែលក្មេងនោះត្រូវបានលើកទៅកាន់កន្លែងសុវត្ថិភាព នៅលើរទេះរុញ។

គួរបញ្ជាក់ថា ការរញ្ជួយដីដ៏ធំ កាលពីថ្ងៃចន្ទ ដើមសប្តាហ៍មុន បានសម្លាប់មនុស្សយ៉ាងហោចណាស់ ៣៦,១៨៧ នាក់ នៅភាគខាងត្បូងប្រទេសទួកគី ខណៈដែលអាជ្ញាធរនៅក្នុងប្រទេសស៊ីរីជិតខាងបានរាយការណ៍ថា មានមនុស្សស្លាប់ចំនួន ៥៨០០ នាក់ ជាតួលេខដែលបានផ្លាស់ប្តូរតិចតួច ក្នុងរយៈពេលប៉ុន្មានថ្ងៃ។

យ៉ាងណាក្តី ទាំងប្រទេសទួកគី និងស៊ីរី មិនបាននិយាយថា សល់មនុស្សប៉ុន្មាននាក់ទៀត នៅបាត់ខ្លួននៅឡើយទេ៕ ប្រភពពី Rueters ប្រែសម្រួលដោយ៖ លន់ សារ៉ាត