ភ្នំពេញ៖ កាលពីម៉ោង ១ និង៤៩ នាទី យប់ថ្ងៃទី១៧ ខែកុម្ភៈ ឆ្នាំ២០២៣ ប្រមុខរាជរដ្ឋរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានសរសេរសារលើបណ្ដាញតេលេក្រាមផ្លូវការ ប្រាប់ទៅក្រុមអង្គការសង្គមស៊ីវិលក្រៅរដ្ឋាភិបាលមួយចំនួននៅកម្ពុជាដែលភាគច្រើនទទួលជំនួយពីបរទេសផងនោះ ចង់ចាំទុកនិងឈប់និយាយពីស្តង់ដាពីរជាមួយរាជរដ្ឋាភិបាលតទៅទៀត។

សម្ដេចតេជោ ហ៊ុន សែន បានសរសេរថា នៅយប់ថ្ងៃទី១៧ ខែកុម្ភៈ បានបង្ហើយការងារនៅរំលងអាធ្រាតទៅហើយ តែមិនទាន់សម្រាកទេ ព្រោះនៅមិនអស់ចិត្តរឿងស្តង់ដាពីរ របស់ក្រុមអង្គការសង្គមស៊ីវិលទាំងនោះ។

សម្ដេចថា លោក ផែង វណ្ណៈ ត្រូវបានអង្គការក្រៅរដ្ឋាភិបាល ដែលភាគច្រើនទទួលលុយបរទេស ទាមទារឲ្យថ្កោលទោសដោយសារបាននិយាយអាក្រក់ពីស្ត្រីដែលនិយាយព័ត៌មានរហូតដល់ វិទ្យុវីអូឌី ស្លាប់ដែលគ្មានពេលចាប់ជាតិ។

សម្ដេចតេជោ ហ៊ុន សែន បានបញ្ជាក់ថា សម្ដេចមិនកាន់ជើង ផែង វណ្ណៈ ទេ។ តែអ្វីដែលសម្ដេចមិនអស់ចិត្ត គឺប្អូនថ្លៃស្រីសម្ដេច ក្រោយស្លាប់ ត្រូវបានគេប្រមាថច្រើនរាប់ពាន់រាប់ម៉ឺនដងប្រៀបជាមួយការដែល ផែង វណ្ណៈ និយាយដល់នាងជាអ្នកនិយាយព័ត៌មានរបស់វិទ្យុវីអូឌីនោះ។

សម្ដេចបានបន្តថា ពួកជនអាក្រក់ទាំងនោះ មិនគ្រាន់តែប្រមាថប្អូនថ្លៃសម្ដេចទេ តែគេ ថែមទាំងប្រមាថភរិយាសម្ដេច ក្រុមគ្រួសារសម្ដេច ក្នុងពេលដែលក្រុមគ្រួសារ កំពុងបង្ហូរ ទឹកភ្នែកស្តាយស្រណោះប្អូនស្រី ម្តាយ ជីដូន ម្តាយមីង ដែលលាចាកលោកទៅ ដោយមិនបានលា សូម្បីមួយម៉ាត់។

សម្ដេចតេជោ នាយករដ្ឋមន្ត្រី បានចោទសួរថា តើអង្គការទាំង ៤០ នេះក្តាប់បានរឿងនេះឬទេ? បានជានៅស្ងៀមស្តាត់ ឬមួយអង្គការទាំងនេះបង្កើតឡើងដើម្បីតែការពារអ្នកប្រឆាំង?។ សម្ដេចតេជោ ផ្ដាំថា សូមចាំទុក និងសូមឈប់និយាយពីស្តង់ដាពីរ ជាមួយរាជរដ្ឋាភិបាលតទៅទៀត ៕ អត្ថបទ៖ វណ្ណលុក