ខេត្តព្រះសីហនុ៖ «ការសម្រេចចិត្តរបស់បងប្អូន សមាជិក សមាជិកា ថ្មី ក្នុងការរួមរស់ជីវភាពបក្សជាមួយគណបក្សប្រជាជនកម្ពុជា គឺជាការសម្រេចចិត្តដ៏ត្រឹមត្រូវក្នុងជីវិតការងារ និងជាការទទួលស្គាល់នូវសមិទ្ធផល កិច្ចខិតខំប្រឹងប្រែងរបស់ថ្នាក់ដឹកនាំ និងសមាជិកគណបក្សប្រជាជនទាំងអស់ក្នុងការកសាងជាតិ បង្រួបបង្រួមជាតិ និងថែរក្សាសុខសន្តិភាពជាតិ ក្នុងការបន្តដំណើរកម្ពុជាទៅមុខ»។

នេះជាការលើកឡើងរបស់ ឯកឧត្តម សាយ សំអាល់ ប្រធានក្រុមការងារគណបក្សចុះមូលដ្ឋានខេត្តព្រះសីហនុ ក្នុងឱកាសអញ្ជើញជាអធិតីក្នុងពិធីបញ្ចូលសមាជិក សមាជិកាថ្មីចំនួន ១៧៤១ នាក់ នៅស្រុកស្ទឹងហាវ និងស្រុកព្រៃនប់ និងពិធីសម្ភោធដាក់ឲ្យប្រើប្រាស់ការិយាល័យគណៈទាំង៦ នៃគណៈកម្មាធិការគណបក្សស្រុកស្ទឹងហាវ និងអគារសាលប្រជុំគណបក្សឃុំជើងគោ ស្រុកព្រៃនប់ ខេត្តព្រះសីហនុ នាថ្ងៃអាទិត្យទី១៩ កុម្ភៈ ឆ្នាំ២០២២នេះ ។

ឯកឧត្តមប្រធានបានលើកឡើងថា រាជរដ្ឋាភិបាលដឹកនាំដោយ គណបក្សប្រជាជនកម្ពុជា បាននាំមកនូវសន្ដិភាពពេញលេញជូនជាតិ និងកសាងសេដ្ឋកិច្ចជាតិឲ្យស្គាល់នូវការរីកចម្រើនលើគ្រប់វិស័យដូចសព្វថ្ងៃ។ យើងបានឈានមកដល់កម្រិតមួយថ្មី ដែលសេដ្ឋកិច្ចកម្ពុជាទទួលបានការរីកចម្រើន យ៉ាងឆាប់រហ័សក្នុងរយៈពេលជាង២ទស្សវត្ស ដោយទទួលបានកំណើនសេដ្ឋកិច្ចជាតិប្រចាំឆ្នាំក្នុងរង្វង់ ៧,៥%។ ជាលើកទី១ ដែលសេដ្ឋកិច្ចកម្ពុជា មិនពឹងផ្អែកលើធនធានធម្មជាតិ និងដែលប្រជាពលរដ្ឋមានចំណេះដឹងកាន់តែខ្ពស់ ដោយមិនចាំបាច់ពឹងផ្អែកលើការធ្វើកសិកម្មទាំងស្រុង ហើយងាកមកបម្រើការក្នុងវិស័យសេវាកម្ម ឧស្សាហកម្ម ទេសចរណ៍ និងវិស័យផ្សេងៗ ដែលបានធ្វើឲ្យកម្រិតជីវភាពប្រជាពលរដ្ឋកាន់តែប្រសើរឡើង។

ឯកឧត្តមបន្ថែមថា សន្ដិភាព ជាកត្តាស្នូល ដែលអាចឲ្យកម្ពុជាមានអ្វីៗគ្រប់បែបយ៉ាង។ ក្រោមដំបូលនៃសុខសន្តិភាព និងស្ថេរភាពនយោបាយពេញលេញ ហេដ្ឋារចនាសម្ព័ន្ធសំខាន់ៗដែលជាមូលដ្ឋានក្នុងការជំរុញ និងរក្សាឲ្យបាននូវកំណើនសេដ្ឋកិច្ច និងការអភិវឌ្ឍសង្គម បានលេចឡើងយ៉ាងឆាប់រហ័ស ដែលមានដូចជា បណ្ដាញផ្លូវ (ផ្លូវថ្នល់ ផ្លូវទឹក ផ្លូវដែក) បណ្ដាញទឹកស្អាត បណ្ដាញអគ្គិសនីគ្របដណ្ដប់ស្ទើទូទាំងប្រទេស ព្រលានយន្តហោះ កំពង់ផែង និងហេដ្ឋារចនាសម្ព័ន្ធរូបវន្តដទៃទៀត ។

ឯកឧត្តមប្រធាន បានថ្លែងអំណរគុណដល់សមាជិក សមាជិកាគណបក្សគ្រប់ជាន់ថ្នាក់ ដែលបានលះបង់កម្លាំងកាយ ចិត្ត ពេលវេលា និងធនធាន ក្នុងការខិតខំបំពេញការងារនៅមូលដ្ឋាន ដើម្បីទទួលបានលទ្ធផលល្អប្រសើរជូនជាតិ និងប្រជាជន។

ឆ្លៀតឱកាសនោះ ឯកឧត្តមបានផ្ដល់អនុសាសន៍ដល់ថ្នាក់ដឹកនាំ សមាជិក សមាជិកាទាំងអស់ថា ការដឹកនាំឲ្យមានប្រសិទ្ធិភាព ត្រូវស្គាល់មូលដ្ឋានឲ្យបានច្បាស់ ដើម្បីអាចយល់ដោយផ្ទាល់នូវស្ថានភាព តម្រូវការ និងបញ្ហាប្រឈមនានា ឈានទៅធ្វើសេចក្ដីសម្រេចចិត្ត និងការដាក់ចេញនូវផែនការ យុទ្ធសាស្ត្រ និងគោលនយោបាយ ឲ្យបានត្រឹមត្រូវ សំដៅបំពេញតម្រូវការពិតប្រាកដនូវហ្នឹងមូលដ្ឋាន។

ជាមួយគ្នានេះ ឯកឧត្តមក៏បានណែនាំដល់សមាជិក សមាជិកាទាំងអស់ដែលទើបត្រូវបានបញ្ចូលថ្មី ត្រូវដឹងពីភារកិច្ច និងកាតព្វកិច្ច ក្នុងនាមជាសមាជិក សមាជិកា គណបក្សប្រជាជនកម្ពុជា គឺការពារយ៉ាងមុតមាំនូវអ្វីដែលយើងមាន ហើយបន្តពូនជ្រុំកសាងសមត្ថភាព និងជាតិមាតុភូមិ ៕ ខៀវ សាវ៉ុន