​រ៉ាបា៖ ព្រះ​បរម​រាជ​វាំង​​នៃ​ប្រទេស​ម៉ារ៉ុក​កាល​ពី​ថ្ងៃ​ចន្ទ​ បាន​ស្នើ​សុំ​ឱ្យ​គណបក្សប្រឆាំង​​អ៊ីស្លាម​និយម​ដ៏​ធំ​បំផុត​របស់​ប្រទេស​ គឺ​បក្ស​​យុត្តិធម៌​ និង​​អភិវឌ្ឍន៍​​ (PJD) ​បញ្ឈប់​ការ​វាយ​ប្រហារ​លើ​​ទំនាក់​ទំនង​របស់​ប្រទេស​ជាមួយ​អ៊ីស្រាអែល​ បន្ទាប់​ពី​គណបក្ស​នេះ​បាន​រិះ​គន់​រដ្ឋ​មន្ត្រី​ការ​បរទេស​ចំពោះ​ការ​ការពារ​​​សកម្មភាព​របស់​កង​​កម្លាំង​អ៊ីស្រាអែល​​លើ​​ប៉ាឡេស្ទីន​។​

​PJD ​បាន​និយាយ​​ក្នុង​សេចក្តី​ថ្លែងការណ៍​មួយ​កាល​ពី​សប្តាហ៍​មុន​ថា​ «​អគ្គលេខាធិការ(របស់​បក្ស​) ​ថ្កោល​ទោស​ចំពោះ​ជំ​ហរ​នា​ពេល​ថ្មី​ៗ​នេះ​របស់​រដ្ឋ​មន្ត្រី​ការ​បរទេស​ ដែល​​ហាក់​ដូច​ជា​កំពុង​ការពារ​​អ៊ីស្រាអែល​ ខណៈ​ដែល​​អ៊ីស្រាអែល​បន្ត​ការ​ឈ្លាន​ពាន​បែប​ឧក្រិដ្ឋកម្ម​ប្រឆាំង​​នឹង​បង​ប្អូន​ប៉ាឡេស្ទីន​របស់​យើង​»។​

ឆ្លើយ​តប​នឹង​ការ​រិះ​គន់​នេះ​ រាជវាំង​ម៉ារ៉ុក​​ថ្លែង​ក្នុង​​សេចក្ដីថ្លែងការណ៍​យ៉ាង​ដូច្នេះ​ថា ​​​​៖ ​​«​អគ្គលេខាធិកា​នៃ​បក្ស​ PJD ​ថ្មី​ៗ​នេះ​បាន​ចេញ​ផ្សាយ​សេចក្តី​ប្រកាស​មួយ​ដែល​គ្មាន​ការ​ទទួល​ខុស​ត្រូវ​ហួស​ហេតុ​និង​ស្មើ​នឹង​ការ​គ្រោះ​​ថ្នាក់​ដល់​​​ទំនាក់​ទំនង​រវាង​ព្រះរាជាណាចក្រ​ម៉ារ៉ុក​ និង​រដ្ឋ​អ៊ីស្រាអែល​»​។

រាជវាំង​បន្ត​ថា​ ជំហរ​របស់​ប្រទេស​ចំពោះ​ប៉ាឡេស្ទីន​គឺ​មិន​ផ្លាស់​ប្ដូរ​ឡើយ​ ប៉ុន្តែ​​គោល​នយោបាយ​ការ​បរទេស​គឺ​ជា​រាជ​សិទ្ធិ​របស់​ព្រះ​មហាក្សត្រ​ដែល​មាន​ចែង​ក្នុង​រដ្ឋ​ធម្មនុញ្ញ​ ហើយ​វា​ត្រូវ​តែ​មិន​​ «​ទទួល​រង​នូវ​ការ​បង្ខូច​ឈ្មោះ​»​ នោះ​ទេ​។​

គួរ​កត់​សម្គាល់​ថា​ ការ​វិវត្តន៍​នៃ​នយោបាយ​ក្នុង​ស្រុក​របស់​ប្រទេស​អារ៉ាប់​មួយ​នេះ​ កើត​មាន​ឡើង​ស្រប​ពេល​ដែល​​​មាន​អំពើ​​ហិង្សា​​​ជា​ថ្មី​រវាង​អ៊ីស្រាអែល​ និង​ប៉ាឡេស្ទីន​ ដោយ​​បង្ក​បញ្ហា​ជា​ប្រឈម​ដល់​បណ្តា​ប្រទេស​អារ៉ាប់ ​ដែល​មាន​ទំនាក់​ទំនង​ធម្មតា​ជាមួយ​អ៊ីស្រាអែល​។​

ប្រទេស​ម៉ារ៉ុក​បាន​បន្ត​ទំនាក់​ទំនង​ការ​ទូត​ជាមួយ​អ៊ីស្រាអែល​នៅ​ចុង​ឆ្នាំ​ ២០២០​ ក្រោម​​​កិច្ច​ព្រម​ព្រៀង​មួយ ​ដែល​​សម្រប​ស​ម្រួល​ដោយ​រដ្ឋបាល​របស់​អតីត​ប្រធានាធិបតី​អាមេរិក​ ដូណាល់ ត្រាំ​​ ជា​រដ្ឋ​បាល​ដែល​ទទួល​ស្គាល់​​អធិបតេយ្យ​ភាព​របស់​ទីក្រុង​រ៉ាបាដ​​លើ​តំបន់​​​​សាហារ៉ា​ខាង​លិច​ ​ជា​តំបន់​​ដែល​ម៉ារ៉ុក​មាន​ជម្លោះ​ជាមួយ​​​​​​​រណសិរ្ស​ Polisario ​​គាំទ្រ​ដោយ​អាល់ហ្សេរី​​​ ក្នុង​ការ​បង្កើត​រដ្ឋ​ផ្ទាល់​ខ្លួន​។  ​​

​​ចាប់​តាំង​ពី​ការ​ចាប់​ផ្តើម​ទំនាក់​ទំនង​ឡើង​វិញ​ ម៉ារ៉ុក​ និង​អ៊ីស្រាអែល​បាន​ចុះ​ហត្ថលេខា​លើ​កិច្ច​ព្រម​ព្រៀង​សហប្រតិបត្តិការ​ រួម​ទាំង​កតិកា​សញ្ញា​ការពារ​ជាតិ​ផង​ដែរ​។​ គួរ​គូស​បញ្ជាក់​ថា​ ជំហរ​​ផ្លូវ​ការ​របស់​ម៉ារ៉ុក​ ទាក់​ទង​នឹង​ជម្លោះ​អ៊ីស្រាអែល ​និង​ប៉ាឡេស្ទីន​ គឺ​​ការ​គាំទ្រលើ​​ដំណោះ​ស្រាយ​ឱ្យ​បង្កើត​​រដ្ឋ​ពីរ​ ​​ដែល​មាន​ក្រុង​ហ្ស៊េរុយសាឡឹម​ខាង​កើត​ ជា​រដ្ឋធានី​នៃ​រដ្ឋ​ប៉ាឡេស្ទីន​នា​ពេល​អនាគត​៕

ប្រែសម្រួល៖ ហួន ឌីណា

ប្រភព៖ Moroccan palace asks Islamist party to stop criticizing ties with Israel  https://www.reuters.com/world/middle-east/moroccan-palace-asks-islamist-party-stop-criticizing-ties-with-israel-2023-03-13/