ងាប់ត្រីរាប់លានក្បាល នៅលើទន្លេដ៏វែងមួយ របស់អូស្ត្រាលី
ស៊ីដនី៖ ត្រីងាប់រាប់លានក្បាល បណ្តាលឲ្យមានការស្ទះទន្លេដែលមានប្រវែងវែងបំផុតលំដាប់ទី៣ នៅប្រទេសអូស្ត្រាលី។
ត្រីងាប់ និងរលួយរាប់លានក្បាលបានកកស្ទះ នៅលើផ្ទៃទន្លេដ៏ធំ នៅជិតទីប្រជុំជនដាច់ស្រយាលមួយនៅតំបន់ដាច់ស្រយាលរបស់ប្រទេសអូស្ត្រាលី ខណៈដែលរលកកំដៅកំពុងបោកបក់ពាសពេញតំបន់។
វីដេអូដែលបានបង្ហោះលើបណ្តាញសង្គម បានបង្ហាញទូកដែលកំពុងធ្វើដំណើរ ក្នុងពេលដែលត្រីងាប់ពេញផ្ទៃទឹក ហើយមើលមិនឃើញទៅក្រោម ពីលើផ្ទៃទឹកនោះឡើយ។
រដ្ឋាភិបាលរដ្ឋ ញ៉ូវ សោ វែលស៍ (New South Wales) បាននិយាយ កាលពីថ្ងៃសុក្រ សប្តាហ៍នេះថា ត្រីរាប់លានក្បាលបានងាប់នៅក្នុងទន្លេ ដាលីង (Darling) ក្បែរទីក្រុងតូចមួយឈ្មោះថា មីនីនឌី ( Menindee) ដោយគេដឹងថា ជាការងាប់ត្រីដ៏ធំលើកទីបី ដែលបានវាយប្រហារតំបន់នេះ ចាប់តាំងពីឆ្នាំ ២០១៨មក ។
អ្នកស្រុករស់នៅក្នុងក្រុង មីនីនឌី (Menindee) លោក ហ្គាអ៊ឹម មីកហ្គ្រេប (Graeme McCrabb) បានប្រាប់ AFP ថា “វាពិតជាគួរឱ្យរន្ធត់ណាស់ មានត្រីងាប់ដូចដែលអ្នកអាចមើលឃើញ” ។
លោកបានមានប្រសាសន៍ថា «វាជារឿងចម្លែកក្នុងការយល់ដឹង» ដោយលោកបន្ថែមថា «ការសម្លាប់ត្រីនៅឆ្នាំនេះហាក់ដូចជាអាក្រក់ជាងត្រីមុនៗ ហើយផលប៉ះពាល់បរិស្ថានគឺមិនអាចយល់បាន»។
យោងតាមរដ្ឋាភិបាលប្រចាំរដ្ឋបានឱ្យដឹងថា ចំនួនត្រីបានរីកដុះដាលនៅក្នុងទន្លេ បន្ទាប់ពីទឹកជំនន់ នាពេលថ្មីៗនេះ ប៉ុន្តែឥឡូវនេះបានងាប់អស់យ៉ាងច្រើន ខណៈដែលទឹកបានស្រកចុះ។
មីនីនឌី (Menindee) ជាទីក្រុងដែលមានប្រជាជនប្រហែល៥០០ នាក់ ហើយត្រូវបានបំផ្លាញដោយគ្រោះរាំងស្ងួត និងទឹកជំនន់ក្នុងរយៈពេលប៉ុន្មានឆ្នាំចុងក្រោយនេះ៕ ប្រភពពី AFP ប្រែសម្រួលដោយ៖ សារ៉ាត