ភ្នំពេញ៖ផលកសិកម្មរបស់ប្រជាកសិករខ្មែរជាទូទៅមានដូចជា ចេក ស្វាយ និងខ្នុរ ដែលក្រោយពេលលក់ទៅឱ្យ​ឈ្មួ​ញភាគច្រើនតែងត្រូវបានគេកែច្នៃទៅជាអាហារសម្រន់ផ្សេងៗ ។ប៉ុន្តែនៅ ឃុំតាសែន ស្រុកកំរៀង ខេត្តបាត់ដំបង មានសិប្បកម្មមួយអាចកែច្នៃទិន្នផលទាំងនេះទៅជាស្រា និងអាចនាំចេញទៅក្រៅប្រទេសទៀតផង។

​លោក សុខ​ មាន​​ ​តំណាងសិប្បកម្មកែច្នៃទិន្ឋផលទាំងនេះ បានឱ្យដឹងពីដើមកំណើតនៃសិប្បកម្មមួយនេះថា សិប្បកម្មនេះ​កើតមកពីគម្រោងដោះមីន ក្រោមការឧបត្ថម្ភគាំទ្រថវិកាពីរដ្ឋាភិបាលជប៉ុន សហការជា​មួយអង្គភាពស៊ីម៉ាក់។បន្ទាប់ពីគម្រោងប្រតិបត្តិការដោះមីនបានជោគជ័យទៅផ្ទៃដីមានសុវត្ថិភាពអនុញ្ញាត​​ឱ្យប្រជាសហគមន៍ក្នុងឃុំទាំងមូលអាចផ្តើមធ្វើរបរកសិកម្ម និងដាំដុះដំណាំផ្សេងៗទៅតាមចំណង់ចំណូ​ល​ចិត្ត។ ទន្ទឹមនឹងការធ្វើកសិកម្មទទួលបានជោគជ័យ បញ្ហាគ្មានទីផ្សារលក់ក៏បានលេចឡើងធ្វើឱ្យទិន្នផ​ល​ប្រែជាគ្មានតម្លៃ និងត្រូវបានបោះបង់ចោលស្អុយរលួយពេញចម្ការ។

លោក សុខ​ មាន​​ បានប្រាប់ថា ៖​ «បញ្ហានេះបានធ្វើឱ្យលោក តាអ៊ីយ៉ា កាម៉ា(Tayakama) ដែលជាប្រធានក្រុមប​ច្ចេ​កទេ​សដោះមីនជនជាតិជប៉ុននាពេលនោះ ផ្តួចផ្តើមគំនិតកែច្នៃទិន្នផលក្នុងសហគមន៍ទៅជាស្រា ដោយលោកផ្តើម​ពីការសាកល្បងកែច្នៃទិន្នផលដំឡូងទៅជាស្រាដំបូងក៏ទទួលបានជោគជ័យ និងផ្តើមបង្កើតក្រុមហ៊ុនតែម្តង»។

អ្នកតំណាងសិប្បកម្មរូបនេះបានបន្តឱ្យដឹងថា ដំបូងឡើយការស្រាវជ្រាវសាកល្បង​ពឹងផ្នែកលើអ្នកភូមិឱ្យពួ​កគាត់ជួយបិតស្រា ដើម្បីយកទៅធ្វើតេស្តគុណភាពនៅប្រទេសជប៉ុន។ លោកបន្តថា បន្ទាប់ពីអ្វីៗទាំងអ​ស់​ត្រូវបានស្វែងយល់​ ដោះស្រាយមក ហើយផលិតផលល្អហើយ សិប្បកម្មក៏បានចុះបញ្ចីជាក្រុមហ៊ុនស្រ​បច្បាប់ក្នុងឆ្នាំ ២០១៣តែម្តង។

បច្ចុប្បន្ន សិប្បកម្មឈ្មោះថា «សុរាខ្មែរ» និងស្ថិតក្រោមក្រុមហ៊ុន Khmer Jyoryu Co., LTD នេះបានកែច្នៃ និងកំពុងដាក់លក់ស្រាកែច្នៃរបស់ខ្លួនមួយចំនួនមកហើយដែលមានដូចជា ស្រាចេក ស្រាស្វាយ ស្រាដំឡូង ស្រាខ្នុរ ស្រាកាហ្វេ និងស្រាអង្ករជាដើម។

លោក សុខ មាន បានឱ្យដឹងទៀតថា ទីផ្សារចម្បងរបស់សិប្បកម្មនៅពេលនេះគឺទីផ្សារប្រទេសជប៉ុន ហើ​យសុរាខ្មែរបានគ្រោងពង្រីកទីផ្សារទីទៅកាន់អ៊ឺរ៉ុបផងដែរ ដោយកាលពីខែកុម្ភៈ ឆ្នាំ ២០២៣ នេះសិប្បកម្មមួយនេះបាននាំយកស្រារបស់ខ្លួនចំនួន​​ប្រាំមុខទៅចូលរួមពិព័រណ៍មួយឈ្មោះថា ស៊ីរ៉ា នៅទីក្រុងលីយ៉ុង ប្រ​ទេ​សបារាំង។

ចំណែកទីផ្សារក្នុងស្រុកវិញលោក សុខ មាន​ បានបញ្ជាក់ថា ៖​ «យើងបានដាក់លក់ផលិតផលនៅតាមផ្សារទំនើប អាកាសយានដ្ឋាន ផ្សារទំនើបអ៊ីអន និងហាងជប៉ុនមួយចំនួន ព្រមទាំងតាមភោជនីយដ្ឋានមួយចំនួនក្នុងក្រុងសៀមរាប»។

អ្នកតំណាងសិប្បកម្មកែច្នៃកសិផលក្នុងសហគមន៍រូបនេះក៏បានឱ្យដឹងពី​ច្រវាក់ផលិតកម្ម និងថែមទាំងបា​នបញ្ជាក់ពីគោលការណ៍ ពិសេសមួយគឺការផ្តល់អាទិភាពដល់បុគ្គលិកជាស្ត្រីដែលរស់នៅក្នុងសហគមន៍ផ្ទាល់។

លោក សុខ មាន បានឱ្យដឹងថា បើគិតជាបរិមាណ កន្លងមកក្នុងមួយឆ្នាំយើងអាចផលិតបានប្រាំម៉ឺនលីត្រ។ ប៉ុន្តែឥឡូវយើងធ្វើបានតែបីម៉ឺន ទៅ បីម៉ឺនប្រាំពាន់លីត្រទេដោយសារចំនួនបុគ្គលិកយើង​មានក​ម្រិ​ត។បុគ្គលិករបស់យើងមានប្រាំមួយនាក់ និងកម្មករតាមពេលប្រាំនាក់ទៀត ហើយភាគច្រើនសុទ្ធតែជានៅទីនេះទាំងអស់ ហើយគោលការណ៍របស់យើងយកស្រ្តីឱ្យបានលើសពី ៦០ភាគរយ។

លើសពីនេះ លោក សុខ មាន​ ក៏បានឱ្យដឹងថាដែរក្រៅតែពីស្រាទៅ ក៏មានជាការកែច្នៃ ស្វាយ ស្វាយសម្ងួត ចេកសម្ងួត តែ និងប្រេងស្លឹកគ្រៃផងដែរ ដែលសិប្បកម្មមួយនេះ បាននិងកំពុងព្យាយាមពង្រីកខ្លួនឱ្យកាន់តែធំ ដើម្បីបន្ថែមទំហំនៃការជួយទៅដល់សហគមន៍ឱ្យកាន់តែប្រសើរ៕

ដោយ៖កែវ បុស្បា