ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីក្នុងពិធីប្រគល់សញ្ញាបត្រជូននិស្សិត វិទ្យាស្ថាន វ៉ាន់ដា ៤,៧០៥នាក់ នារី ៤,២២១នាក់ នៅព្រឹកថ្ងៃទី២២ ខែមីនា ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍កោះពេជ្រ។

លោកបណ្ឌិត ហេង វ៉ាន់ដា នាយកវិទ្យាស្ថានវ៉ាន់ដា បានឱ្យដឹងថា និស្សិតជ័យលាភីដែលទទួលសញ្ញាបត្រនេះ រួមមានថ្នាក់បរិញ្ញាបត្ររង និងបរិញ្ញាបត្រ ដែលបានបញ្ចប់ការសិក្សា ក្នុងឆ្នាំសិក្សា ២០២១ -២០២២ នៅទីតាំងគោលក្នុងរាជធានីភ្នំពេញ និងសាខាខេត្តសៀមរាប ក្នុងនោះ ក៏មាន និស្សិត បរិញ្ញាបត្រផ្នែកអាហារូបករណ៍របស់សម្តេចតេជោ និងសម្តេចកិត្តិព្រឹទ្ធបណ្ឌិត ចំនួន ៥០នាក់ នារី ៤២នាក់ផងដែរ។ និស្សិតដែលទទួលសញ្ញាបត្រនេះ អ្នកមាន ការ ងារធ្វើចំនួន ៤,៤២៥នាក់ ស្មើនឹង ៩៤.០៥ភាគរយ ។

វិទ្យាស្ថាន វ៉ាន់ដា គឺជាគ្រឹះស្ថានឧត្តមសិក្សាឯកជនមួយ ដែលបច្ចុប្បន្ននេះ មានទីតាំងចំនួន ៣កន្លែង កំពុងដំណើរការ។ ក្នុងនោះ ១កន្លែងនៅរាជធានីភ្នំពេញ និង ២កន្លែងទៀតនៅ ខេត្តសៀមរាប និងខេត្តបាត់ដំបង ។

ក្នុងឆ្នាំសិក្សា២០២២-២០២៣ វិទ្យាស្ថាន វ៉ាន់ដា មាននិស្សិតកំពុងសិក្សា ចំនួន ១០,៨៧៦នាក់ នារី ៩,៨៣៥ នាក់។ បើគិតចាប់ពី ឆ្នាំ សិក្សា២០០២-២០០៣ ដល់ឆ្នាំសិក្សា២០២១-២០២២ កន្លងមកនេះ និស្សិតបាន បញ្ចប់ ការសិក្សា គិតទាំងនិស្សិតជ័យលាភីនេះផង សរុបចំនួន ៤៦,៨៨៦នាក់ នារី ៣៩,២៩៧នាក់ ៕ ដោយ ៖ វណ្ណលុក