ក្រសួងបរិស្ថាន និងវិស័យឯកជនបង្ហាញការ ប្តេជ្ញាចិត្តរួមគ្នាបន្តធ្វើការ ដោះស្រាយបញ្ហាបម្រែបម្រួលអាកាសធាតុ
ភ្នំពេញ ៖ ក្នុងសន្និសីទសារព័ត៌មានរួមគ្នាមួយ រវាងក្រសួងបរិស្ថាន និងវិស័យឯកជននាថ្ងៃទី២២ ខែមីនា ឆ្នាំ២០២៣ ស្តីពី «ដំណើរកម្សាន្តប្រកបដោយស្មារតីទទួលខុសត្រូវ» ដើម្បីពង្រឹងភាពជាដៃគូ និងដោះស្រាយបញ្ហាបម្រែបម្រួលអាកាសធាតុនៅកម្ពុជា ឯកឧត្តម ជួប ប៉ារីស អនុរដ្ឋលេខាធិការក្រសួងបរិស្ថាន ថ្លែងថា ក្រសួងបរិស្ថានបានប្តេជ្ញាចិត្តក្នុងការបន្តធ្វើការជាមួយវិស័យឯកជន ដើម្បីពង្រឹងភាពជាដៃគូរ និងដោះស្រាយបញ្ហាបម្រែបម្រួលអាកាសធាតុ ។ សម្រាប់បេសកកម្មរបស់ក្រសួងបរិស្ថាន គឺ ដើម្បីគ្រប់គ្រង និងការពារធនធានធម្មជាតិ ដើម្បីប្រជាជនកម្ពុជាគ្រប់ជំនាន់ទទួលបានផលប្រយោជន៍មួយនេះ ។
ឯកឧត្តមរដ្ឋលេខាធិការ បានបន្តថា៖ «យើងជួបជុំគ្នាដើម្បីផ្លាស់ប្តូរអំពីផែនការ អាទិភាព និងការសហការរបស់យើងផងដែរ ដើម្បីកសាងគោលដៅរួមរបស់យើងសម្រាប់មនុស្សជំនាន់ ទាំងបច្ចុប្បន្ន និងអនាគត» ។
លោក GUICHANDUUT នាយកគ្រប់គ្រងក្រុមហ៊ុន All Dreams Cambodia បានបញ្ជាក់ថា ៖កម្ពុជា ជាប្រទេសមួយក្នុងចំណោមប្រទេសងាយរងគ្រោះបំផុតចំពោះការប្រែប្រួលអាកាសធាតុ។ ការបំពុលដោយប្លាស្ទិក ជាផ្នែកមួយនៃបញ្ហា ក្នុងនោះទីក្រុងភ្នំពេញតែមួយមានថង់ប្លាស្ទិកប្រមាណ ១០លាន ត្រូវបានប្រើប្រាស់ជារៀងរាល់ថ្ងៃ។
បា្លស្ទិកភាគច្រើនប្រើប្រាស់ក្នុងវិស័យទេសចរណ៍ ត្រូវបានផលិតដើម្បីបោះចោល ហើយជាញឹកពាប់មិនអាចកែច្នៃឡើងវិញបាន ដែលនាំឱ្យមានការបំពុលបរិស្ថានយ៉ាងច្រើន។ ទន្ទឹមនឹងការបំផ្លាញជីវចម្រុះ ការផលិតប្លាស្ទិកតាមតម្រូវការក៏មានកាន់តែច្រើន។ ជារៀងរាល់ឆ្នាំការផលិតផ្លាស្ទិកថ្មីមានជាង ៣០០លានតោន។ ការណ៍នេះ ធ្វើឱ្យបាត់បង់ធនធានធម្មជាតិ និងរួមចំណែកដល់ការបំភាយឧស្ម័នផ្ទះកញ្ចក់ ដែលបណ្តាលឱ្យមានការប្រែប្រួលអាកាសធាតុ។
ជាមួយគ្នានេះលោកនាយកក្រុមហ៊ុន All Dream Cambodia បានបញ្ជាក់ដែរថាក្រុមហ៊ុនលោកនឹងចូលរួមលើកកម្ពស់ការទិញសិប្បកម្ម និងវត្ថុអនុស្សាវរីយ៍ដែលផលិតក្នុងស្រុក ដើម្បីបង្កើតប្រាក់ចំណូលសម្រាប់សហគមន៍ និងមូលដ្ឋាន។ ក្រៅពីនេះក្រុមហ៊ុនលោកក៏បានលើកទឹកចិត្តបុគ្គលិកឱ្យប្រើប្រាស់មធ្យោបាយធ្វើដំណើរសាធារណៈ កង់អេឡិចត្រូនិច ឬដើរនៅពេលណាដែលអាចធ្វើទៅបាន ៕ អត្ថបទ៖ម៉ាដេប៉ូ , រូប ៖ ងីម ឆៃហួត
![](https://asset.ams.com.kh/central/media/2023/03/photo_2023-03-23_10-45-48-1024x682.jpg)
![](https://asset.ams.com.kh/central/media/2023/03/photo_2023-03-23_10-45-51-1024x682.jpg)
![](https://asset.ams.com.kh/central/media/2023/03/photo_2023-03-23_10-45-34-1024x682.jpg)
![](https://asset.ams.com.kh/central/media/2023/03/photo_2023-03-23_10-45-36-1024x682.jpg)
![](https://asset.ams.com.kh/central/media/2023/03/photo_2023-03-23_10-45-42-1024x682.jpg)