រដ្ឋមន្ត្រីពាណិជ្ជកម្មកម្ពុជា លើកទឹកចិត្តវិនិយោគិនថៃមកវិនិយោគនៅកម្ពុជា ដើម្បីពង្រីកទំហំពាណិជ្ជកម្មប្រទេសទាំងពីរ១៥ពាន់លានដុល្លារ ត្រឹមឆ្នាំ២០២៥
ភ្នំពេញ៖រដ្ឋមន្រ្ដីក្រសួងពាណិជ្ជកម្ម ឯកឧត្តម ប៉ាន សូរស័ក្ដិ បានស្នើសភាពាណិជ្ជកម្មថៃ និងក្រុមប្រឹក្សាពាណិជ្ជកម្មថៃ ធ្វើការយ៉ាងជិតស្និទ្ធជាមួយសភាពាណិជ្ជកម្មកម្ពុជាដើម្បីផ្លាស់ប្តូរទស្សនកិច្ច រវាងវិស័យឯកជនរបស់ប្រទេសទាំងពីរក្នុងបំណងជំរុញពាណិជ្ជកម្ម និងសកម្មភាពវិនិយោគ
ដើម្បីពង្រីកទំហំពាណិជ្ជកម្មប្រទេសទាំងពីរដល់១៥ពាន់លានដុល្លារ ត្រឹមឆ្នាំ២០២៥។
ការស្នើនិងជំរុញនេះ ធ្វើឡើងនៅក្នុងសិក្ខាសាលាស្តីពី “ទិសដៅអនាគតនៃឱកាសពាណិជ្ជកម្ម និងវិនិយោគនៅកម្ពុជា ឆ្នាំ២០២៣” កាលពីថ្ងៃទី២៨ ខែមីនា ឆ្នាំ២០២៣ នៅទីក្រុងបាងកក ប្រទេសថៃ។ ក្នុងជំនួបនោះឯកឧត្តម ប៉ាន សូរស័ក្ដិ បានលើកឡើងថា កិច្ចសហប្រតិបត្តិការលើគ្រប់វិស័យរវាងប្រទេសកម្ពុជា និងថៃ ក្នុងប៉ុន្មានឆ្នាំចុងក្រោយនេះ មានការរីកចំរើនគួរឱ្យកត់សម្គាល់ ទោះបីមានបញ្ហាប្រឈមដោយសារកូវីដ១៩ក៏ដោយ ប៉ុន្តែទំហំពាណិជ្ជកម្មទ្វេភាគីរវាងប្រទេសទាំងពីរនៅតែមានការកើនឡើងជាលំដាប់។ ជាមួយគ្នានោះ
លោកបានលើកទឹកចិត្តឱ្យវិនិយោគិននៃប្រទេសទាំងពីរពិនិត្យលទ្ធភាពវិនិយោគលើ វិស័យសេដ្ឋកិច្ចចក្រា និងកសិឧស្សាហកម្មផងដែរ។
ឯកឧត្តមបានបញ្ជាក់ថា សូមភាគីពាក់ព័ន្ធទាំងអស់ត្រូវបន្តខិតខំធ្វើការងារបន្ថែមទៀត ដើម្បីសម្រេចឱ្យបាននូវទំហំពាណិជ្ជកម្មទ្វេភាគីចំនួន ១៥ពាន់លានដុល្លារសហរដ្ឋអាម៉េរិក ត្រឹមឆ្នាំ២០២៥ ដែលកំណត់ដោយនាយករដ្ឋមន្ត្រីនៃប្រទេសទាំងពីរ។ ចំពោះការរៀបចំសិក្ខាសាលាស្តីពី “ទិសដៅអនាគតនៃឱកាសពាណិជ្ជកម្ម និងវិនិយោគនៅកម្ពុជា ឆ្នាំ២០២៣ នៅប្រទេសថៃនេះដែរ ឯកឧត្តម ប៉ាន សូរស័ក្ដិ មានប្រសាសន៍ថា សិក្ខាសាលានេះ មានសារៈសំខាន់ណាស់ ដែលវាជាការឆ្លុះបញ្ចាំងពីការប្តេជ្ញាចិត្តយ៉ាងមុតមាំ
និងជាកម្លាំងជំរុញដ៏ធំធេងឆ្ពោះទៅរកកិច្ចសហប្រតិបត្តិការជំរុញពាណិជ្ជកម្ម និងវិនិយោគនាពេលអនាគត រវាងកម្ពុជា-ថៃ។
ឯកឧត្តមបានថ្លែងថាការជួបជុំគ្នាថ្ងៃនេះ គឺជាព្រឹត្តិការណ៍ដ៏សំខាន់ វិនិយោគិនថៃដែលមានសក្តានុពលអាចស្វែងរកព័ត៌មានពាក់ព័ន្ធទាំងអស់នៃការធ្វើពាណិជ្ជកម្ម និងឱកាសវិនិយោគនៅកម្ពុជា។ ក្នុងនាមរាជរដ្ឋាភិបាលកម្ពុជាឯកឧត្តម ប៉ាន សូរស័ក្ដិ បានសម្តែងការស្វាគមន៍វិនិយោគិនថៃ ដែលមានគម្រោងវិនិយោគ ឬពង្រីកគម្រោងវិនិយោគនៅកម្ពុជា ហើយសម្រាប់ធុរជនដែលមិនទាន់បានបណ្តាក់ទុននៅកម្ពុជា សូមអញ្ជើញមកស្វែងយល់ពីសក្តានុពល និងឱកាសក្នុងការវិនិយោគ ឬចូលរួមបណ្តាក់ទុនជាមួយអ្នកវិនិយោគកម្ពុជា ដើម្បីទាញយកផលប្រយោជន៍ឱ្យបានច្រើនពីកិច្ចព្រមព្រៀងពាណិជ្ជកម្ម
ទ្វេភាគី និងកិច្ចព្រមព្រៀងពាណិជ្ជកម្មក្នុងតំបន់ដែលកម្ពុជាសម្រេចបាន។
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ឱ្យដឹងថា សភាពាណិជ្ជកម្មកម្ពុជា និងសភាពាណិជ្ជកម្មថៃ បានធ្វើការជាមួយគ្នាច្រើន តាំងយូរណាស់មកហើយ ដោយសារប្រទេសទាំងពីរស្ថិតនៅក្នុងសហគមន៍សេដ្ឋកិច្ចអាស៊ានតែមួយ។ ហើយថ្មីៗនេះ សភាពាណិជ្ជកម្មថៃ ដែលបានដឹកនាំគណៈប្រតិភូមកចូលកិច្ចប្រជុំកំពូលអាស៊ានបានធ្វើការយ៉ាងជិតស្និទជាមួយគ្នា ជាពិសេសសភាពាណិជ្ជកម្មខេត្តនៅតាមព្រំដែនប្រទេសទាំងពីរ។ លោកបានបញ្ជាក់បែបនេះថា៖« ការជំរុញបន្ថែមពីសំណាក់រដ្ឋមន្រ្តីពាណិជ្ជកម្មកម្ពុជានេះ គឺជារឿងល្អ
បន្ទាប់ពីប្រទេសយើងទាំងពីរបានធ្វើការយ៉ាងល្អជាមួយគ្នាលើគ្រប់វិស័យ។ប៉ុន្តែអ្វីដែលសំខាន់នោះគឺយើងធ្វើការជំរុញការនាំចេញផលិតផលកសិកម្មរបស់យើងទៅកាន់ប្រទេសថៃ ក៏ដូចជាការទាក់ទាញវិនិយោគិនថៃមកវិនិយោគនៅកម្ពុជា លើផ្នែកឧស្សាហកម្មកែច្នៃ ដើម្បីកែច្នៃផលិតផលកសិកម្មយើងនាំចេញទៅថៃ ប្រទេសក្នុងតំបន់អាស៊ាន និងពិភពលោក»។ គួរបញ្ជាក់ថា ពាណិជ្ជកម្មទ្វេភាគីរវាងកម្ពុជា និងថៃ ក្នុងឆ្នាំ ២០២២ សម្រេចបានក្នុងទំហំទឹកប្រាក់សរុប ប្រមាណ ៤,៦ពាន់លានដុល្លារសហរដ្ឋអាម៉េរិក កើនឡើងប្រមាណ ១៤ភាគរយ បើធៀបនឹងឆ្នាំ២០២១។ដោយឡែក ក្នុងរយៈពេល០២ខែដើមឆ្នាំ២០២៣នេះវិញ ទំហំពាណិជ្ជកម្មទ្វេភាគីរវាងកម្ពុជា និងថៃ
សម្រេចបានក្នុងទឹកជិត៦៥៧លានដុល្លារ ថយចុះជិត១០ភាគរយ បើធៀបនឹងរយៈពេលដូចគ្នា ក្នុងឆ្នាំ២០២២៕
ដោយ៖វណ្ណ សុជាតា
