ភ្នំពេញ៖ ពិព័រណ៍ទេពកោសល្យស្នាដៃនិស្សិត នៃសាកលវិទ្យាល័យភូមិន្ទវិចិត្រសិល្បៈ នឹងធ្វើឡើងរយៈពេលបីថ្ងៃចាប់ពីថ្ងៃទី១ ដល់ថ្ងៃទី៣ ខែមេសា ឆ្នាំ២០២៣ ក្រោមប្រធានបទ «មរតកទាំង៥ ឆ្នាំ២០២៣» ។ព្រឹត្តិការណ៍នេះដើម្បីអបអរសាទរពិធីចូលឆ្នាំថ្មីប្រពៃណីជាតិខ្មែរ និងជាការបង្ហាញពីស្នាដៃរបស់និស្សិតទាំង ៥មហាវិទ្យាល័យ នៃសាកលវិទ្យាល័យភូមិន្ទវិចិត្រសិល្បៈ ហើយក៏ដើម្បីឱ្យមហាជនទូទៅបានឃើញ នូវស្នាដៃទាក់ទងជាមួយនឹងសិល្បៈខ្មែរគ្រប់ទម្រង់ទាំងអស់ ។

ប្រធានគណៈកម្មការរៀបចំពិព័រណ៍ទេពកោសល្យស្នាដៃនិស្សិត សឿត សុវន្នី ជានិស្សិតគំនូរសារគមនាគមន៍ នៃមហាវិទ្យាល័យសិល្ប:សូន្យរូប នៃសាកលវិទ្យាល័យភូមិន្ទវិចិត្រសិល្បៈ បានឱ្យដឹងថា ពិព័រណ៍ទេពកោសល្យស្នាដៃនិស្សិត នៃសាកលវិទ្យាល័យភូមិន្ទវិចិត្រសិល្បៈ នឹងធ្វើឡើងក្រោមប្រធានបទ «មរតកទាំង៥ ឆ្នាំ២០២៣» នឹងបើកជាផ្លូវការ នៅថ្ងៃទី០១ ខែមេសា ឆ្នាំ២០២៣ ក្រោមអធិបតីភាពលោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។

និស្សិតរូបនេះបន្តថា ពិព័រណ៍ទេពកោសល្យស្នាដៃនិស្សិតនេះ ធ្វើឡើងដំបូងនៅឆ្នាំ២០១៥ ប៉ុន្តែត្រូវបានអាក់ខាននៅឆ្នាំ២០២០ ដល់ឆ្នាំ២០២២ ដោយសារការរាតត្បាត នៃជំងឺកូវីដ១៩។ ព្រឹត្តិការណ៍ដែលបានរៀបចំធ្វើកន្លងមក មានមហាជនទូទៅ ពលរដ្ឋខ្មែរ និងភ្ញៀវទេសចរចូលទស្សនាប្រមាណប្រាំបី ទៅ ប្រាំបួនពាន់នាក់ ក្នុងរយៈពេលបីថ្ងៃ ឬក៏អាចច្រើនជាងនេះ ។

ពាក់ព័ន្ធនឹងការបង្ហាញពីស្នាដៃរបស់និស្សិតទាំង ៥មហាវិទ្យាល័យ នៃសាកលវិទ្យាល័យភូមិន្ទវិចិត្រសិល្បៈ ប្រធានគណៈកម្មការរៀបចំដដែល បានបញ្ជាក់ថា មហាវិទ្យាល័យនីមួយៗ នឹងលើកយកនូវសមិទ្ធផលការងាររបស់និស្សិតឆ្នើមរៀងៗខ្លួន ដើម្បីបង្ហាញឱ្យមហាជនទូទៅ ពិសេសប្រជាពលរដ្ឋខ្មែរបានឃើញនូវស្នាដៃទាក់ទងជាមួយនឹងសិល្បៈខ្មែរគ្រប់ទម្រង់ទាំងអស់ ហើយក៏ដើម្បីឱ្យមានការយល់ដឹងច្បាស់ពីសិល្បៈវប្បធម៌ខ្មែរ ក៏ដូចជាយល់ដឹងពីរបៀបនៃការដំឡើង របៀបនៃការធ្វើ របៀបនៃការរៀបចំរបស់យុវជន មានលំដាប់លំដោយបែបណាខ្លះ ។

ក្នុងនាមជានិស្សិត និងជាយុវជន ក្រុមនិស្សិតនៃសាកលវិទ្យាល័យភូមិន្ទវិចិត្រសិល្បៈ បានបង្ហាញក្ដីរីករាយដែលបានជួបជុំគ្នារៀបចំព្រឹត្តិការណ៍ នេះឡើងដោយទី១-បង្ហាញពីស្នាដៃ, ទី២-បង្ហាញពីសាមគ្គីភាព, ទី៣-បង្ហាញពីការអបអរសាទរបុណ្យចូលឆ្នាំថ្មីប្រពៃណីជាតិខ្មែរ ហើយក៏មានការពាក់ព័ន្ធនឹងការចូលរួមរបស់ Bayoun The Game នៃព្រឹត្តិការណ៍ស៊ីហ្គេម នៅកម្ពុជា ផងដែរ ដើម្បីចូលរួមផ្សព្វផ្សាយទៅកាន់ពិភពលោក ឱ្យឃើញថា ការផ្សារភ្ជាប់ទំនាក់ទំនងរបស់ប្រជាជនខ្មែរ យុវជនខ្មែរ និងការចូលរួមក្នុងតួនាទីរបស់យុវជន មានសារៈសំខាន់ខ្លាំងមែនទែន។

ក្នុងនាមជាយុវជន ក្រុមនិស្សិត ពិតជារីករាយ និងស្វាគមន៍យ៉ាងកក់ក្ដៅ ដល់មហាជនទូទៅ អញ្ជើញមកទស្សនាទេពកោសល្យស្នាដៃនៃសាលារចនា ចាប់ពីថ្ងៃទី១ ដល់ថ្ងៃទី៣ ខែមេសាដើម្បីស្វែងយល់បន្ថែម និងបានមើលនូវទស្សនីយភាពផ្សេងៗ ដែលនិស្សិតនៅក្នុងសាកលវិទ្យាល័យ ភូមិន្ទវិចិត្រសិល្បៈ ខិតខំប្រឹងប្រែងរៀបចំព្រឹត្តិការណ៍នេះឡើង។

សម្រាប់ពិព័រណ៍ទេពកោសល្យស្នាដៃនិស្សិត នៃសាកលវិទ្យាល័យភូមិន្ទវិចិត្រសិល្បៈ នៅពេលខាងមុខនេះ នឹងមានរៀបចំនូវការសម្ដែងសិល្បៈ និងទស្សនិកភាពផ្សេងៗដូចជា៖ របាំ និងល្ខោនខោលជាដើម ៕
អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ