ភ្នំពេញ ៖ ថ្ងៃទី៣០ ខែមីនា ឆ្នាំ២០២៣ គណៈកម្មាធិការជាតិរៀបចំការបោះឆ្នោត( គ.ជ.ប) បានប្រកាសថា ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុង ស្រុកទើបបង្កើតថ្មី មានរយៈពេល ៨(ប្រាំបី)ថ្ងៃ គឺត្រូវចាប់ផ្តើមពីថ្ងៃទី៣១ ខែមីនា ដល់ថ្ងៃទី ៧ ខែមេសា ឆ្នាំ២០២៣ ហើយគ្រប់សកម្មភាពឃោសនាបោះឆ្នោតទាំងអស់ត្រូវបញ្ឈប់ក្នុងរយៈពេល ២៤ម៉ោង មុនថ្ងៃបោះឆ្នោត និងថ្ងៃបោះឆ្នោត។

ឯកឧត្តម ឯម សូផាត សមាជិក គ.ជ.ប និងប្រធានដឹកនាំកិច្ចប្រជុំជាមួយភាគីពាក់ព័ន្ធស្ដីពីការ ឃោសនាបោះឆ្នោតលើកទី១ដើម្បីជ្រើសរើសក្រុមប្រឹក្សាក្រុងអរិយក្សត្រ ក្រុងសំពៅពូន នៃខេត្តកណ្ដាល ក្រុងឧដុង្គម៉ែជ័យ ស្រុកសាមគ្គីមុនីជ័យ នៃខេត្តកំពង់ស្ពឺ និងស្រុកអូរគ្រៀងសែនជ័យ នៃខេត្តក្រចេះ នៅព្រឹកថ្ងៃទី៣០ ខែមីនា ឆ្នាំ២០២៣នេះ បានថ្លែងថា គ្រប់សកម្មភាពឃោសនាបោះឆ្នោតរបស់គណបក្សនយោបាយ ត្រូវចាប់ផ្តើមពីម៉ោង ៦:០០ ព្រឹកដល់ម៉ោង ១០:០០ យប់ និងត្រូវឈប់សម្រាកនៅចន្លោះ ពីម៉ោង ១០:០០ យប់ ដល់ម៉ោង ៦:០០ ព្រឹក ។ សកម្មភាព ឃោសនាបោះឆ្នោត ដោយឧបករណ៍បំពងសំឡេងត្រូវហាមឃាត់ជាទូទៅ ចាប់ពីម៉ោង ១ ២ :០០ ថ្ងៃត្រង់ ដល់ម៉ោង ២:០០ រសៀល។

ចំពោះការលើក ឬបិទផ្សាយស្លាកសញ្ញាគណបក្សនយោបាយ និងសម្ភារឃោសនាបោះឆ្នោត ក្នុងអំឡុងពេលឃោសនាបោះឆ្នោតគណបក្សនយោបាយដែលមានបញ្ជីបេក្ខជនឈរឈ្មោះបោះឆ្នោតក្នុងក្រុង ស្រុកពាក់ព័ន្ធ អាចលើកស្លាកសញ្ញាគណបក្សនៅទីសាធារណៈ ដោយមានការសម្របសម្រួលពីអាជ្ញាធរ ឃុំ សង្កាត់នៃក្រុងស្រុកពាក់ព័ន្ធ ដោយផ្អែកលើគោលការណ៍ ស្មើភាព សន្តិសុខ សណ្តាប់ធ្នាប់សាធារណៈ និង សោភ័ណភាពសាធារណៈ អាចលើកស្លាក គណ បក្សនយោបាយនៅទីស្នាក់ការរបស់ខ្លួនឬទីតាំងឯកជន ប្រសិនបើមានការយល់ព្រម ពី ម្ចាស់ទីតាំងនោះ គ្រាន់តែជូនដំណឹងជាលាយលក្ខណ៍អក្សរទៅអាជ្ញាធរឃុំ ឬលំនៅឋាន ឯកជន ហើយសាមីគណបក្សសង្កាត់ អំពីការលើកស្លាកគណបក្សតែប៉ុណ្ណោះ។

មិនត្រូវបានអនុញ្ញាតឱ្យលើកស្លាកសញ្ញាគណបក្សនយោបាយ នៅក្នុងបរិវេណ ឬលើអគារ ឬ កា រិយាល័យរបស់រដ្ឋមិនត្រូវបានអនុញ្ញាតឱ្យលើក ឬបិទស្លាកសញ្ញាគណបក្សនយោបាយបដា ឃោសនា រូបសញ្ញាឃោសនា ពាក្យស្លោក ខិត្តប័ណ្ណ នៅតាមលំនៅឋានរបស់ប្រជាពលរដ្ឋ ប្រសិនបើមិនមានការយល់ ព្រមជាមុនពីម្ចាស់លំនៅឋាន។

សូមបញ្ជាក់ថា គណបក្សនយោបាយដែលដាក់បេក្ខជនចូលរួម បោះឆ្នោតលើកទី ១ដើម្បី ជ្រើសរើសក្រុមប្រឹក្សាក្រុងអរិយក្សត្រ ក្រុងសំពៅពូន នៃ ខេត្តកណ្ដាល ក្រុងឧដុង្គម៉ែជ័យ ស្រុកសាមគ្គីមុនីជ័យ នៃខេត្តកំពង់ស្ពឺ និងស្រុកអូរគ្រៀងសែនជ័យ នៃខេត្តក្រចេះមានចំនួន៣គណបក្ស គឺ៖ គណបក្សប្រជាជនកម្ពុជា គណបក្សភ្លើងទៀន និង គណបក្សហ្វ៊ុនស៊ិនប៉ិច ៕

ដោយ-រ៉ាវុធ