ម៉ានីល៖ កងទ័ពហ្វីលីពីន និងអាមេរិក ធ្វើសមយុទ្ធបាញ់គ្រាប់ពិត ផ្តោតលើការការពារទឹកដី ដោយព្រឹត្តិការណ៍នេះរៀបចំឡើង នៅលើទឹកដីហ្វីលីពីន។

កងទ័ពហ្វីលីពីនបានធ្វើសមយុទ្ធបាញ់គ្រាប់ពិតជាមួយសមភាគីអាមេរិក នៅក្នុងជំរុំយោធាដ៏ធំបំផុតរបស់ប្រទេសអាស៊ីអាគ្នេយ៍មួយនេះ ដែលជាផ្នែកមួយនៃសមយុទ្ធរវាងកងទ័ពនិងកងទ័ព ក្នុងគោលបំណងពង្រឹងសមត្ថភាពការពាររបស់ទីក្រុងម៉ានីលប្រឆាំងនឹងការគំរាមកំហែងពីខាងក្រៅ។

សមយុទ្ធនេះកើតឡើងបន្ទាប់ពីការសម្រេចចិត្តរបស់ប្រធានាធិបតីហ្វីលីពីន ហ្វឺឌីណាន ម៉ាកូស ជេអ័រ ( Ferdinand Marcos Jr) កាលពីខែកុម្ភៈ ដើម្បីពង្រីកការចូលប្រើរបស់សហរដ្ឋអាមេរិក ទៅកាន់មូលដ្ឋានយោធារបស់ប្រទេសរបស់លោក ដែលជាទង្វើមួយដែលធ្វើឱ្យចិនខឹងសម្បារ ចោទប្រកាន់ក្រុងវ៉ាស៊ីនតោនថា បានបង្កភាពតានតឹងនៅក្នុងតំបន់។

ទាហានហ្វីលីពីន និងអាមេរិកជាង ៣០០០ នាក់បានចូលរួមក្នុងសមយុទ្ធប្រចាំឆ្នាំ រយៈពេល ៣ សប្តាហ៍ ដែលមានឈ្មោះថា សាឡាក់ នីប (Salaknib)។ កាលពីថ្ងៃសុក្រ សប្តាហ៍នេះ មានសមយុទ្ធប្រឆាំងរថក្រោះ និងអាវុធធុនតូច និងការបាញ់លើប្រព័ន្ធរ៉ុក្កែត ចល័តខ្ពស់ ហ៊ីមាសន៍(Himars) ។

សមយុទ្ធយោធារួមគ្នារវាងកងទ័ពអាមេរិក និងហ្វីលីពីនេះបាននិងកំពុងប្រព្រឹត្តទៅ នៅឯមូលដ្ឋានយោធា ហ្វ័ត ម៉េកសាយសាយ (Fort Magsaysay) ស្ថិតក្នុងខេត្ត នូអេវ៉ា អេស៊ីចា (Nueva Ecija) ប្រទេសហ្វីលីពីន៕ ប្រភពពី Reuters ប្រែសម្រួលដោយ៖ សារ៉ាត