រដ្ឋមន្រ្តីក្រសួងសុខាភិបាល៖ រដ្ឋាភិបាលមិនដែលទុកឱ្យប្រជាជនណាម្នាក់មិនទទួលបានការថែទាំសុខភាពនោះឡើយ
ត្បូងឃ្មុំ៖មន្ទីរពេទ្យបង្អែកស្រុកក្រូចឆ្មារ ក្នុងខេត្តត្បូងឃ្មុំ ដែលមានអគារធំៗចំនួនពីរ និងជាមន្ទីរពេទ្យដែលមានហេដ្ឋារចនាសម្ព័ន្ធល្អនិងបំពាក់ដោយឧបករណ៍ទំនើបៗ ដែលមានតម្លៃរហូតដល់១.៤លានដុល្លារ បានសាងសង់រួចជាស្ថាពរនិងត្រូវបានប្រកាសដាក់ឱ្យប្រើប្រាស់ជាផ្លូវការនាព្រឹកថ្ងៃទី៣ខែមេសាឆ្នាំ២០២៣។ យោងតាមរបាយការណ៍របស់ក្រសួងសុខាភិបាលបានឱ្យដឹងថា មន្ទីរពេទ្យបង្អែកស្រុកក្រូចឆ្មារថ្មីចំនួនពីរអគារនេះ បានចាប់ផ្ដើមបើកការដ្ឋានសាងសង់កាលពីថ្ងៃទី ២៧ ខែកក្កដា ឆ្នាំ ២០២០កន្លងទៅនេះ ស្ថិតនៅភូមិខ្សាច់ប្រឆេះលើ ឃុំក្រូចឆ្មារ ស្រុកក្រូចឆ្មារ
ខេត្តត្បូងឃ្មុំ ដោយមានទំហំប៉ុនគ្នា កម្ពស់បួនជាន់ ស្មើ ១៥,១០ ម៉ែត្រ រួមមានជាន់ផ្ទាល់ដី ជាន់ទី ១ ជាន់ទី ២ និងជាន់ទី ៣។
មន្ទីរពេទ្យបង្អែកស្រុកក្រូចឆ្មារថ្មីនេះត្រូវបានសាងសង់ក្នុងទីតាំងមន្ទីរពេទ្យបង្អែកចាស់ និងមានការបំពាក់នូវសម្ភារបរិក្ខារពេទ្យទំនើបៗ ដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្រ្តីនាយករដ្ឋមន្រ្តីនិងដឹកនាំការសាងសង់ដោយឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ។
ក្រសួងបានបន្តថា មន្ទីរពេទ្យនេះ មានបន្ទប់ពិនិត្យជំងឺទូទៅ, សង្រ្គោះបន្ទាន់, វះកាត់, សម្រាកព្យាបាល, មន្ទីរពិសោធន៍វេជ្ជសាស្រ្ត, អេកូសាស្រ្ត, X-Ray, សម្ភពនិងរោគស្រ្តី, ព្យាបាលជំងឺកុមារ, ព្យាបាលជំងឺមាត់ធ្មេញ, ឃ្លាំងបរិក្ខារវេជ្ជសាស្រ្ត និងឃ្លាំងឱសថ។
ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាលបានលើកឡើងឱ្យដឹងនាពិធីសម្ពោធនោះថា មន្ទីរពេទ្យនេះជាការចូលរួមចំណែកដ៏ធំធេងក្នុងការគ្របដណ្តប់សេវាសុខភាពជាសកល ជាពិសេសជូនដល់ប្រជាជនដាច់ស្រយាលដោយមិនទុកឱ្យប្រជាជនណាម្នាក់មិនទទួលបានការថែទាំសុខភាពនោះឡើយ។
ឯកឧត្តមមានប្រសាសន៍ថា ការសម្រេចបាននូវសេវាសុខភាពកាន់តែប្រសើរឡើងនៅក្នុងក្របខ័ណ្ឌទូទាំងប្រទេសនាពេលបច្ចុប្បន្នគឺកើតឡើងដោយសារសុខសន្តិភាព និងស្ថេរភាពដែលជាសារវ័ន្តមិនអាចខ្វះបានក្រោមការដឹកនាំរបស់សម្តេចតេជោនាយករដ្ឋមន្រ្តី ។
នាពិធីនោះសម្ដេចតេជោនាយករដ្ឋមន្រ្តី ហ៊ុន សែន បានថ្លែងអបអរសាទរជាមួយនឹងសមិទ្ធផលថ្មីនៅលើទឹកដីក្រូចឆ្មារ ខេត្តត្បូងឃ្មុំនេះ ដែលជាអគារមន្ទីរពេទ្យដ៏ធំសម្រាប់បម្រើវិស័យសុខាភិបាលនៅទីនេះ។
ឯកឧត្តមបានលើកឡើងដែរថា ការប្រឹងប្រែងសាងសង់មន្ទីរពេទ្យនេះ គឺជាកិច្ចប្រឹងប្រែងមួយក្នុងការលើកកម្ពស់សុខុមាលភាពរបស់ប្រជាពលរដ្ឋ មិនត្រឹមតែបម្រើសេវាសុខាភិបាលនៅក្នុងខេត្តត្បូងឃ្មុំប៉ុណ្ណោះទេ ប៉ុន្តែក៏អាចបម្រើប្រជាពលរដ្ឋនៅខេត្តផ្សេងៗដែលនៅជិតនេះបានផងដែរ។
សម្ដេចតេជោ ហ៊ុន សែន មានប្រសាសន៍ថា ៖ «ស្រុកក្រូចឆ្មារពីមុនជាតំបន់ដាច់ស្រយាល និងមិនមានប្រព័ន្ធហេដ្ឋរចនាសម្ព័ន្ធតភ្ជាប់ច្រើននោះទេ ដែលពេលនោះ អ្នកជំងឺខ្លះពេលសង្គ្រោះបន្ទាន់ត្រូវរកសេវាព្យាបាលនៅកន្លែងឆ្ងាយ ដែលធ្វើឱ្យមានការលំបាកយ៉ាងខ្លាំង»។
ឆ្លៀតក្នុងឱកាសនោះដែរសម្ដេចតេជោនាយករដ្ឋមន្រ្តីក៏បានបញ្ជាក់ផងដែរថា ជំងឺកូវីដ១៩ បានដាស់តឿនស្មារតីឱ្យគ្រប់គ្នាប្រុងប្រយ័ត្នជានិច្ច ក្នុងការការពារសុខភាពប្រជាពលរដ្ឋ។
សម្ដេចតេជោមានប្រសាសន៍ថា នៅពេលមានកូវីដ១៩ យើងបានពង្រឹងសមត្ថភាពការព្យាបាលជំងឺនៅគ្រប់ទីកន្លែងទាំងអស់។ មនុស្សយើងអាចមានពណ៌សម្បុរ សាសនា និងនយោបាយខុសគ្នា ប៉ុន្តែមានតម្រូវការរួម គឺការពិនិត្យព្យាបាលជំងឺ ហើយសន្តិភាព ក៏ជាតម្រូវការរួមផងដែរ។
សម្ដេចតេជោ ហ៊ុន សែន នាយករដ្ឋមន្រ្តីកម្ពុជាក៏បានផ្តាំទៅកាន់អ្នកគ្រប់គ្រង និងគ្រូពេទ្យនៅមន្ទីរពេទ្យបង្អែកស្រុកក្រូចឆ្មារនេះថា ការសាងសង់មន្ទីរពេទ្យ និងបំពាក់បរិក្ខារជាការលំបាកមួយទៅហើយ ប៉ុន្តែការធ្វើឱ្យមន្ទីរពេទ្យធានាបាននិរន្តរភាព គឺរឹតតែលំបាកទៀត ដែលគ្រប់គ្នាត្រូវតែបន្តខិតខំបំពេញការងារឱ្យបានល្អគ្រប់ៗគ្នា៕
ដោយ៖នាង សុគន្ធា
