ចិនបន្តធ្វើសមយុទ្ធ ខណៈអាមេរិក និងតៃវ៉ាន់ឃ្លាំមើល ចំពេលដែលភាពតានតឹងកើនឡើងជាថ្មី
ប៉េកាំង៖ប្រទេសចិនបន្តធ្វើសមយុទ្ធនៅថ្ងៃទី២ ជុំវិញកោះតៃវ៉ាន់នៅថ្ងៃអាទិត្យទី៩ ខែមេសា ខណៈតៃវ៉ាន់ និងសហរដ្ឋអាមេរិក ដែលជាសម្ព័ន្ធមិត្តអះអាងថា ខ្លួនកំពុងតាមដានសកម្មភាពរបស់យោធាចិនយ៉ាងយកចិត្តទុកដាក់។
សមយុទ្ធយោធារយៈពេលបីថ្ងៃរបស់ចិន ធ្វើឡើងចំពេលដែលភាពតានតឹងកើនឡើងជាថ្មី បន្ទាប់ពីប្រធានាធិបតីតៃវ៉ាន់ លោកស្រី សៃ អ៊ីងវិន ជួបប្រជុំជាមួយប្រធានសភាសហរដ្ឋអាមេរិក លោក ខេវិន ម៉េកខាធី នៅសហរដ្ឋអាមេរិកកាលពីថ្ងៃពុធ។
បើតាមក្រសួងការពារជាតិតៃវ៉ាន់ សម្រាប់សមយុទ្ធនៅថ្ងៃអាទិត្យនេះ ខ្លួនបានសង្កេតឃើញយោធាចិនប្រើយន្តហោះចម្បាំងជាច្រើនគ្រឿង។ ក្រសួងបានឱ្យដឹងទៀត ក្នុងរយៈពេល ២៤ ម៉ោងមុន ខ្លួនប្រទះឃើញយន្តហោះចម្បាំងនៃកងទ័ពអាកាសចិនចំនួន ៧១ គ្រឿង រួមទាំងយន្តហោះចម្បាំង Su-30 និង J-11និងនាវាកងទ័ពជើងទឹកចំនួន ៩គ្រឿងទៀតចូលរួមក្នុងសមយុទ្ធនៅជុំវិញកោះ។ យន្តហោះចម្បាំងចិនជាងពាក់កណ្ដាល បានហោះរំលងលើបន្ទាត់កណ្ដាលនៃច្រកសមុទ្រតៃវ៉ាន់។
ក្រសួងការពារជាតិតៃវ៉ាន់ដដែល និយាយក្នុងសេចក្ដីថ្លែងការណ៍ថា យោធាតៃវ៉ាន់បានតាមដានសកម្មភាពយោធារបស់ចិន យ៉ាងជិតស្និទ្ធតាមរយៈការរួមគ្នាក្នុងប្រព័ន្ធស៊ើបការណ៍សម្ងាត់ ការឃ្លាំមើល និងឈ្លបយកការណ៍ ស្របពេលដែលកងកម្លាំងការពារដែនអាកាសនៅតែមានការប្រុងប្រយ័ត្នខ្ពស់។
ចំណែកឯស្ថានទូតបណ្ដោះអាសន្នរបស់អាមេរិកប្រចាំកោះតៃវ៉ាន់វិញ បាននិយាយនៅថ្ងៃអាទិត្យថា សហរដ្ឋអាមេរិកកំពុងតាមដានសមយុទ្ធរបស់ចិននៅជុំវិញកោះតៃវ៉ាន់យ៉ាងយកចិត្តទុកដាក់ដូចគ្នា និងមានទំនុកចិត្តថា ខ្លួនមានធនធាន និងសមត្ថភាពគ្រប់គ្រាន់ដើម្បីធានាសន្តិភាព និងស្ថិរភាពក្នុងតំបន់។
អ្នកនាំពាក្យស្ថានទូត បានបន្ថែមថា បណ្តាញទំនាក់ទំនងរបស់សហរដ្ឋអាមេរិកជាមួយចិន នៅតែបើកដំណើរការ ហើយសហរដ្ឋអាមេរិក បានជំរុញឱ្យមានការអត់ធ្មត់ និងកុំឱ្យមានការផ្លាស់ប្តូរណាមួយចំពោះស្ថានភាពបច្ចុប្បន្ន។
គួររំឭកថា ចិនទាមទារកោះតៃវ៉ាន់ថាជាផ្នែកមួយនៃទឹកដីរបស់ខ្លួន ជាការទាមទារដែលក្រុងតៃប៉ិ ប្រកែកបដិសេធយ៉ាងដាច់អហង្ការ។ ជំនួបរវាងមន្រ្តីតៃវ៉ាន់ និងមន្រ្តីកំពូលៗរបស់លោកខាងលិច រួមទាំងសហរដ្ឋអាមេរិក ដែលមិនមានទំនាក់ទំនងការទូតផ្លូវការជាមួយតៃវ៉ាន់ផងនោះ តែងត្រូវបានចិនចាត់ទុកថាជាការទទួលស្គាល់ភាពស្របច្បាប់នៃ «ឯករាជ្យតៃវ៉ាន់»។
ជានិច្ចកាល សកម្មភាពបែបនេះ តែងតែរងការឆ្លើយតបពីប្រទេសចិន តាមរយៈការដាក់ទណ្ឌកម្មមន្រ្តីលោកខាងលិច និងតៃវ៉ាន់ និងការបង្កើនសកម្មភាពយោធាជុំវិញកោះតៃវ៉ាន់។
កាលពីខែសីហាឆ្នាំមុន ភាពតានតឹងនៅតៃវ៉ាន់បានកើនឡើងខ្លាំង ដោយសារតែការធ្វើសមយុទ្ធយោធាទ្រង់ទ្រាយធំរបស់ចិន ដើម្បីឆ្លើយតបទៅនឹងការធ្វើដំណើរទស្សនកិច្ចទៅទីក្រុងតៃប៉ិ របស់អតីតប្រធានសភាអាមេរិក លោកស្រី ណាន់ស៊ី ប៉េឡូស៊ី។ ជុំវិញសមយុទ្ធយោធាចុងក្រោយនេះ កងទ័ពរំដោះប្រជាជន (PLA) នៃបញ្ជាការកងទ័ពភាគខាងកើតរបស់ចិន បាននិយាយកាលពីថ្ថៃ
សៅរ៍ ពោលគឺថ្ងៃទី១នៃសមយុទ្ធថា៖ «នេះ(សមយុទ្ធ)គឺជាការព្រមានដ៏ធ្ងន់ធ្ងរដល់កងកម្លាំងបំបែកខ្លួនឯករាជ្យរបស់តៃវ៉ាន់ និងការឃុបឃិត និងការបង្កហេតុរបស់កងកម្លាំងខាងក្រៅ ហើយវាគឺជាសកម្មភាពចាំបាច់មួយដើម្បីការពារអធិបតេយ្យភាពជាតិ និងបូរណភាពទឹកដី» របស់ចិន៕
ប្រែសម្រួល៖ហួន ឌីណា
