នាយករដ្ឋមន្ត្រីចាំផ្ទះលោក ប្រាយុទ្ធ៖ ការសន្យាចែករូបិយប័ណ្ណឌីជីថលរបស់បក្សភឿថៃបង្កហានិភ័យខ្ពស់
ថៃ៖នាយករដ្ឋមន្ត្រីចាំផ្ទះរបស់ថៃលោក ប្រាយុទ្ធ ចាន់អូចា បានព្រមានពីគោលនយោបាយរបស់គណបក្សភឿថៃ ដែលសន្យាផ្តល់រូបិយប័ណ្ណឌីជីថលតម្លៃ ១០,០០០ បាត ដល់អ្នកបោះឆ្នោតថា ជាការប្រថុយប្រថានមួយ និងថាគណបក្សភឿថៃត្រូវ “ប្រុងប្រយ័ត្នបំផុត”ចំពោះយុទ្ធសាស្ត្ររបស់ខ្លួន ដែលអាចនាំឱ្យមានបញ្ហាដល់សេដ្ឋកិច្ចជាតិ ។លោកប្រាយុទ្ធ លើកឡើងបែបនេះក្នុងពិធីជួបជុំមួយជាមួយគណបក្សរបស់លោក នាទីក្រុងបាងកកកាលពីល្ងាចថ្ងៃសុក្រទី០៧ខែមេសា។
អតីតមេទ័ពដែលដឹកនាំរដ្ឋប្រហារយោធាទម្លាក់អ្នកស្រី យីងឡាក់ ស៊ីណាវ៉ាត់ត្រា រូបនេះឈរឈ្មោះជាបេក្ខជននាយករដ្ឋមន្ត្រីរបស់គណបក្សសហភាពជាតិថៃ(United Thai Nation Party ,UTNP)។ ក្នុងយុទ្ធនាការឃោសនាបោះឆ្នោត គណបក្សភឿថៃបានសន្យាថានឹងផ្តល់ប្រាក់ចំនួនមួយម៉ឺនបាតជារូបិយប័ណ្ណឌីជីថល ទៅឱ្យពលរដ្ឋថៃគ្រប់រូបដែលមានអាយុចាប់ពី១៦ឆ្នាំឡើងទៅ ប្រសិនបើខ្លួនជាប់ឆ្នោតបានដឹកនាំប្រទេស។ មន្ត្រីជាន់ខ្ពស់គណបក្សភឿថៃប្រកាសថា
ទឹកប្រាក់ជារូបបិយប័ណ្ណឌីជីថលនោះ នឹងត្រូវបានប្រគល់ឱ្យសម្រាប់អ្នកចង់ទទួលដើម្បីយកទៅចាយវាយទិញទំនិញផ្សេងនៅជិតៗលំនៅឋានរបស់អ្នកទាំងនោះ។
បេក្ខជននាយករដ្ឋមន្ត្រីមួយរូបរបស់គណបក្សភឿថៃ លោក ស្រេតថា ថាវីស៊ីន(Srettha Thavisin) បានថ្លែងថា ថវិកាប្រហែល ៥០០ពាន់លានបាតនឹងត្រូវចំណាយលើគោលនយោបាយនានាដែលគណបក្សភឿថៃបានដាក់ចេញដើម្បីដឹកនាំប្រទេស។ថវិកាទាំងអស់នោះ បានមកពីចំណូលពន្ធ និងការកាត់បន្ថយចំណាយមិនចាំបាច់មួយចំនួនផ្សេងទៀត។
នាយករដ្ឋមន្ត្រីចាំផ្ទះ លោក ប្រាយុទ្ធ បានព្រមានថា រូបិយប័ណ្ណឌីជីថលមានហានិភ័យខ្ពស់ណាស់។ លោកបានបន្តថា រូបិយប័ណ្ណឌីជីថលគឺជាអរូបី ហើយមានតែផ្អែកលើការព្រមព្រៀងគ្នារវាងអ្នកប្រើនិងអ្នកផ្តល់សេវាប៉ុណ្ណោះទើបអាចដំណើរការចាយវាយបាន។ លោកបញ្ជាក់
«អ្នកអាចមើលឃើញថាប្រព័ន្ធរូបិយប័ណ្ណឌីជីថលបានដួលរលំរួចហើយនៅក្នុងប្រទេសមួយចំនួន ដែលប៉ះពាល់ដល់ធនាគារ និងប្រជាជនរបស់ពួកគេ។ ដូច្នេះហើយបានជាយើងត្រូវមានការប្រុងប្រយ័ត្នខ្ពស់ »។
លោកបន្ថែមថា គោលនយោបាយរូបិយប័ណ្ណឌីជីថលនេះនឹងអាចដំណើរការបានលុះត្រាតែមានការគាំទ្រពីរតនាគារ។ លោកប្រាយុទ្ធ៖ «UTNP(បក្សរបស់គាត់) មានការប្រុងប្រយ័ត្នខ្ពស់នៅពេលនិយាយអំពីថវិកា។ យើង
តែងតែធានាថាវាអាចអនុវត្តទៅបាន តាមច្បាប់ និងបទប្បញ្ញត្តិពាក់ព័ន្ធផ្សេងៗ»។
លោក Prayut និយាយផងដែរថាគោលនយោបាយទាំងអស់របស់ UTNP គឺ “អាចអនុវត្តទៅបាន” និង “ចេញពីបេះដូង” ។ លោកថានៅពេលដែលលោកជាអ្នកដឹកនាំប្រទេស លោកបានសម្រេចបាននូវគោលដៅមួយចំនួនដែលបានសន្យារួចហើយ និង គ្រោងនឹងធ្វើការងារបន្ថែមទៀតដើម្បីជាប្រយោជន៍ដល់ប្រជាជនថៃ។
ប្រទេសថៃនឹងរៀបចំការបោះឆ្នោតជាសកលដើម្បីជ្រើសតាំងតំណាងរាស្ត្រនិងនាយករដ្ឋមន្ត្រីនៅថ្ងៃទី១៤ខែឧសភាឆ្នាំ២០០៣ដ៏ខ្លីខាងមុខនេះ៕
ដោយ៖វណ្ណ ស័ក្ដិ
