បាងកក៖ កូនស្រីរបស់លោកថាក់ស៊ីន ស៊ីណាវ៉ាត់ត្រា បានទម្លាក់គូប្រជែងទាំងអស់ សម្រាប់តំណែងនាយករដ្ឋមន្ត្រីថៃ នៅក្នុងការស្ទង់មតិ អ៊ូប៊ុន រ៉ាតឆាថានី (Ubon Ratchathani)។

អ្នកស្រី ផែថងថាន ស៊ីណាវ៉ាត់ត្រា (Paetongtarn Shinawatra) ជាថ្មីម្តងទៀត បាននាំមុខ ក្នុងការប្រជែងតំណែងនាយករដ្ឋមន្ត្រី ពីអ្នកដែលកំពុងកាន់អំណាច ឧត្តមសេនីយ៍ ប្រាយុទ្ធ ចាន់អូចា (Prayut Chan-o-cha) និងគូប្រជែងផ្សេងទៀតទាំងអស់ នៅក្នុងការស្ទង់មតិលើបេក្ខជនដែលពេញចិត្តរបស់អ្នកបោះឆ្នោត សម្រាប់នាយករដ្ឋមន្ត្រីថៃ។

ការស្ទង់មតិនៅខេត្ត អ៊ូប៊ុន រ៉ាតឆាថានី (Ubon Ratchathani) បានផ្តល់ចំណាត់ថ្នាក់កំពូល ដល់អ្នកស្រីអ្នកស្រី ផែថងថាន ក្នុងចំណោមអ្នកបោះឆ្នោតដែលមានសិទ្ធិបោះឆ្នោតចំនួន ១១០០ ដែលបានស្ទង់មតិ នៅខេត្ត Ubon Ratchathani ។

បេក្ខជនភឿថៃរូបនេះត្រូវបានជ្រើសរើសជាជម្រើសកំពូល សម្រាប់តំណែងនាយករដ្ឋមន្ត្រី ដោយអ្នកឆ្លើយសំណួរ មានចំនួន ៤៥ .៥៥% នៅក្នុងខេត្តភាគឦសានមួយនេះ ខណៈដែលលោក Prayut ត្រូវបានជ្រើសរើសដោយត្រឹមតែ ១០.៨២% នៅក្នុងការស្ទង់មតិតាមទូរស័ព្ទ ដែលធ្វើឡើងដោយវិទ្យាស្ថានជាតិគ្រប់គ្រងការអភិវឌ្ឍន៍ (Nida) ចាប់ពីថ្ងៃទី ២៧ ដល់ថ្ងៃទី ៣០ ខែមីនា។

បេក្ខជនគណបក្សភឿថៃ ទីពីរ សម្រាប់តំណែងនាយករដ្ឋមន្ត្រីដែរនោះ គឺអតីតមហាសេដ្ឋីអចលនទ្រព្យ ស្រេតថា ថាវីស៊ីន ជាប់ចំណាត់ថ្នាក់ទីបួន នៅក្នុងការស្ទង់មតិ នីដា (Nida) ដោយមានការគាំទ្រ ៧.៤៥% នៃអ្នកឆ្លើយតប។

ការបោះឆ្នោតសកល នៅក្នុងប្រទេសថៃគ្រោងនឹងត្រូវរៀបចំឡើងនៅថ្ងៃទី១៤ ខែឧសភាខាងមុខនេះ ដោយមានគណបក្សធំៗចំនួន៣ ស្ថិតនៅក្រោមការតាមដាន គឺគណបក្សភឿថៃរបស់អ្នកនាង ផែថងថាន, គណបក្សរបស់លោក ប្រាយុទ្ធ និងគណបក្សរបស់លោក ប្រាវីត៕ ប្រភពពី The Nation ប្រែសម្រួលដោយ៖ សារ៉ាត