យោធាមីយ៉ាន់ម៉ាដែលវាយប្រហារតាមអាកាសសម្លាប់មនុស្សយ៉ាងហោចណាស់៥០នាក់ នាំឱ្យសហគមន៍អន្តរជាតិថ្កោលទោសយ៉ាងខ្លាំង
ណៃពិដោ៖ ក្រុមយោធាមីយ៉ាន់ម៉ាបានបើកការវាយប្រហារតាមអាកាសលើក្រុមប្រឆាំងរដ្ឋាភិបាល ដោយសម្លាប់មនុស្សរួមមានទាំងជនស៊ីវិលយ៉ាងហោចណាស់ ៥០ នាក់ នៅភាគកណ្ដាលនៃប្រទេស ដែលបង្កការថ្កោលទោសយ៉ាងដាច់អហង្ការពីសហគមន៍អន្តរជាតិ។
បណ្ដាញទូរទស្សន៍ BBC មីយ៉ាន់ម៉ា វិទ្យុអាស៊ីសេរី និងសារព័ត៌មាន The Irrawaddy បានរាយការណ៍ដោយស្រង់សម្ដីរបស់ប្រជាជនរស់កន្លែងដែលរងការវាយប្រហារនៅតំបន់ Sagaing ថា មនុស្សចន្លោះពី ៥០-១០០ នាក់ ត្រូវបានសម្លាប់។
ចំណែកទីភ្នាក់ងារសារព័ត៌មាន AP វិញ បានរាយការណ៍ដោយស្រង់សម្ដីសាក្សីរស់នៅកន្លែងកើតហេតុដែលនិយាយដោយសុំមិនបញ្ចេញឈ្មោះថា យន្តហោះចម្បាំងមួយគ្រឿងបានទម្លាក់គ្រាប់បែកទៅលើហ្វូងមនុស្សប្រហែល ១៥០ នាក់ ដែលកំពុងជួបជុំគ្នាក្នុងពិធីបើកការិយាល័យធ្វើការប្រចាំតំបន់របស់ក្រុមប្រឆាំងនឹងរដ្ឋាភិបាលយោធា។ ប្រហែលកន្លះម៉ោងក្រោយមក ឧទ្ធម្ភាគចក្រមួយគ្រឿងទៀត បានហោះមក ហើយធ្វើការបាញ់ប្រហារបន្ថែមទៅលើកន្លែងកើតហេតុ។
បើតាម AP របាយការណ៍ដំបូងបង្ហាញថាមានអ្នកស្លាប់ ៥០ នាក់ ប៉ុន្តែក្រោយមកចំនួននេះកើនឡើងដល់ប្រហែល ១០០ នាក់ ខណៈសាក្សីដដែលបានប្រាប់ AP ថា ក្នុងចំណោមអ្នកស្លាប់ អាចមានស្រ្តី និងក្មេងពី ២០-៣០ នាក់។
យប់ថ្ងៃអង្គារយោធាមីយ៉ាន់ម៉ា បានបញ្ជាក់អំពីការវាយប្រហារដោយអាកាសនេះ ដោយអ្នកនាំពាក្យរបបយោធាលោក Zaw Min Tun បានឱ្យដឹងថា កងកម្លាំងការពារប្រជាជន (PDF) ដែលជាកងកម្លាំងតស៊ូប្រឆាំងរដ្ឋាភិបាលយោធា) បានប្រារព្ធពិធីជួបជុំមួយនៅព្រឹកថ្ងៃអង្គារម៉ោងប្រហែល៨ ក្នុងភូមិ Pazi Gyi នៃក្រុង Kanbalu Township ក្នុងតំបន់ Sagaing ។ លោកបន្តថា៖ «យើងបានវាយប្រហារនៅកន្លែងនោះ»។
តួលេខជាក់លាក់ជាផ្លូវការនៃចំនួនអ្នកស្លាប់មិនទាន់បង្ហាញ លោក Zaw Min Tun បានអះអាងថា អ្នកស្លាប់មួយចំនួនជាអ្នកស្លៀកពាក់ឯកសណ្ឋាននៃកងកម្លាំងតស៊ូ ដែលប្រឆាំងនឹងការធ្វើរដ្ឋប្រហាររបស់រដ្ឋាភិបាលយោធា ខណៈដែលអាចមានអ្នកស្លាប់ផ្សេងទៀត «ស្លៀកពាក់ស៊ីវិល»។
អ្នកនាំពាក្យដដែលបានបន្តថា៖ «យោងតាមព័ត៌មានមូលដ្ឋានដែលយើងទទួលបាន មនុស្សស្លាប់មិនមែនតែដោយសារតែការវាយប្រហាររបស់យើងនោះទេ។ ក្រុម PDF បានបង្កប់មីនក្បែរតំបន់នោះ» ហើយការវាយប្រហារតាមអាកាសក៏វាយត្រូវគោលដៅកន្លែងទុកគ្រាប់រំសេវ និងមីនផងដែរ។
គួរបញ្ជាក់ថា មីយ៉ាន់ម៉ាបានធ្លាក់ចូលទៅក្នុងភាពចលាចល និងសង្រ្គាមស៊ីវិលបន្ទាប់ពីរដ្ឋាប្រហារយោធាឆ្នាំ ២០២១។ ក្រោយព្រឹត្តិការណ៍នេះ ក្រុមកងកម្លាំងតស៊ូប្រឆាំងនឹងរដ្ឋាភិបាល រួមមានទាំង PDF បានលេចចេញឡើង ប៉ុន្តែ រងការបង្រ្កាបយ៉ាងបង្ហូរឈាមពីក្រុមយោធាដឹកនាំប្រទេស។
ជុំវិញការវាយប្រហារតាមអាកាសចុងក្រោយនេះ អង្គការសហប្រជាជាតិ សហរដ្ឋអាមេរិក និងប្រទេសដទៃទៀត ដូចជាអាល្លឺម៉ង់ បានធ្វើការថ្កោលទោសយ៉ាងខ្លាំង ហើយបានសន្យាថានឹងធ្វើការដើម្បីឱ្យក្រុមយោធាទទួលខុសត្រូវ។
ប្រធានផ្នែកសិទ្ធិមនុស្សរបស់អ.ស.ប. លោក Volker Turk បាននិយាយថា លោកមានការរន្ធត់ចិត្តជាខ្លាំងចំពោះហេតុការណ៍នេះ ហើយបន្តចោទប្រកាន់យោធាមីយ៉ាន់ម៉ាថា មិនយកចិត្តទុកដាក់ចំពោះ «កាតព្វកិច្ចផ្លូវច្បាប់» ដើម្បីការពារជនស៊ីវិល។
ឯអគ្គលេខាធិការអង្គការសហប្រជាជាតិ លោក អង់តូនីញូវ ហ្គូតទែររ៉េស វិញ បាន «ថ្កោលទោសយ៉ាងខ្លាំងចំពោះការវាយប្រហារដោយកងកម្លាំងប្រដាប់អាវុធមីយ៉ាន់ម៉ា (ហើយ) អំពាវនាវឱ្យមានការទទួលខុសត្រូវ។ នេះបើតាមសេចក្តីថ្លែងការណ៍ដែលចេញពីអ្នកនាំពាក្យរបស់លោក គឺលោក Stephane Dujarric ។
ស្រដៀងគ្នានេះដែរ អ្នកនាំពាក្យក្រសួងការបរទេសអាមេរិក លោក Vedant Patel បាននិយាយក្នុងសេចក្តីថ្លែងការណ៍មួយថា៖ «ការវាយប្រហារដោយហិង្សាទាំងនេះ បញ្ជាក់បន្ថែមពីការមិនយកចិត្តទុកដាក់របស់របបយោធាចំពោះជីវិតមនុស្ស និងការទទួលខុសត្រូវរបស់ខ្លួនចំពោះវិបត្តិនយោបាយ និងមនុស្សធម៌ដ៏ធ្ងន់ធ្ងរ នៅក្នុងប្រទេសមីយ៉ាន់ម៉ា ក្រោយរដ្ឋប្រហារខែកុម្ភៈឆ្នាំ ២០២១»។
លោកបន្តថា៖ «សហរដ្ឋអាមេរិកអំពាវនាវឱ្យរបបយោធាភូមា(មីយ៉ាន់ម៉ា)បញ្ឈប់អំពើហិង្សាដ៏គួរឱ្យរន្ធត់ បើកផ្លូវឱ្យប្រតិបត្តិការផ្ដល់ជំនួយមនុស្សធម៌ដោយគ្មានការរារាំង និងគោរពនូវសេចក្តីប្រាថ្នាប្រជាធិបតេយ្យពិតប្រាកដ»។
គួរបញ្ជាក់ថា ការថ្លែងថ្កោសទោសបែបនេះ តែងកើតមានឡើងក្រោយការវាយប្រហារសម្លាប់ជនស៊ីវិលនៅមីយ៉ាន់ម៉ា។ យ៉ាងណាមិញ យោធាមីយ៉ាន់ម៉ា ម្ដងហើយម្ដងទៀត តែងច្រានចោលការចោទប្រកាន់របស់អន្តរជាតិថា ខ្លួនបានប្រព្រឹត្តអំពើឃោរឃៅលើជនស៊ីវិល ហើយនិយាយថា ខ្លួនកំពុងប្រយុទ្ធជាមួយ «ភេរវករ» ដែលប្តេជ្ញាធ្វើឱ្យប្រទេសមានអស្ថិរភាព៕ ប្រែសម្រួល៖ហួន ឌីណា
ប្រភព៖ International anger as air strikes kill at least 50 in Myanmar https://www.channelnewsasia.com/asia/myanmar-coup-air-strikes-sagaing-region-3410336
Airstrikes on Myanmar village feared to have killed 100 https://apnews.com/article/airstrikes-military-myanmar-village-918fd636bb81153928ab7481e06423e5
