អូស្រ្តាលី បន្តជួយប្រទេសកម្ពុជា ក្នុងការលុបបំបាត់ជំងឺគ្រុនចាញ់
ភ្នំពេញ៖ ប្រទេសអូស្រ្តាលីបានលើកឡើងថា អូស្ត្រាលីជាដៃគូដែលមិនអាចខ្វះបាន ក្នុងការលុបបំបាត់ជំងឺគ្រុនចាញ់នៅទូទាំងតំបន់មេគង្គ រួមទាំងប្រទេសកម្ពុជាផង។ ទន្ទឹមគ្នានេះ អូស្រ្តាលី ក៏បានបង្ហាញថានឹងបន្តជួយដល់ប្រទេសកម្ពុជាក្នុងការលុបបំបាត់ជំងឺគ្រុនចាញ់ តាមរយៈការផ្តល់ជំនួយដល់មូលនិធិសកល ដើម្បីធ្វើសកម្មភាពប្រយុទ្ធជំងឺនេះ។
នេះបើតាមការប្រកាសឱ្យដឹងពីស្ថានទូតអូស្រ្តាលីប្រចាំកម្ពុជា នារសៀលថ្ងៃទី២៥ ខែមេសា ឆ្នាំ២០២៣ ខណៈកម្ពុជា កំពុងប្រារព្ធទិវាប្រយុទ្ធប្រឆាំងជំងឺគ្រុនចាញ់ពិភពលោកឆ្នាំ ២០២៣ ក្រោមប្រធានបទ «នេះជាពេលដែលគ្រុនចាញ់ត្រូវសូន្យ តាមរយៈការវិនិយោគ កែច្នៃ និងអនុវត្ត»។
ស្ថានទូតអូស្រ្តាលីប្រចាំកម្ពុជាបានលើកឡើងតាមរយៈបណ្តាញសង្គមហ្វេសប៊ុកថា ៖ «អូស្ត្រាលីគឺជាដៃគូដែលមិនអាចខ្វះបាន ក្នុងការលុបបំបាត់ជំងឺគ្រុនចាញ់នៅទូទាំងតំបន់មេគង្គ។ ទីនេះនៅឯស្ថានទូតអូស្ត្រាលី យើងមានឱកាសបានឃើញដោយផ្ទាល់ពីកិច្ចខិតខំប្រឹងប្រែងដ៏គួរឱ្យកត់សម្គាល់ ដែលត្រូវបានអនុវត្តដោយក្រសួងសុខាភិបាលនៃព្រះរាជាណាចក្រកម្ពុជា និងដៃគូសុខាភិបាលនានានៅក្នុងខេត្តរតនគិរី»។
ប្រភពដដែលបន្តថា បុគ្គលិកកម្ចាត់ជំងឺគ្រុនចាញ់តាមភូមិមួយចំនួននៅតំបន់ដាច់ស្រយាលជាគន្លឹះនៃភាពជោគជ័យរបស់ប្រទេសកម្ពុជា ដោយសារឥឡូវនេះ ជំងឺគ្រុនចាញ់ស្ទើរតែទាំងស្រុងត្រូវបានរកឃើញក្នុងចំណោមប្រជាជនរស់នៅ និងធ្វើការនៅក្នុងព្រៃដាច់ស្រយាល ហើយអ្នកស្ម័គ្រចិត្តទាំងនេះធានាថាអ្នកធ្វើដំណើរតាមព្រៃ និងអ្នកភូមិក្នុងខេត្តរតនគិរី ត្រូវបានគេពិនិត្យ ធ្វើតេស្ត និងព្យាបាលជំងឺគ្រុនចាញ់ជាប្រចាំបើចាំបាច់។
ក្រៅពីលើកឡើងពីសកម្មភាពប្រយុទ្ធជំងឺគ្រុនចាញ់ នៅខេត្តរតនគីរីហើយនោះ ស្ថានទូតអូស្រ្តាលីបានកត់សម្គាល់ឃើញដែរថា គិតមកដល់ពេលនេះ ករណីជំងឺគ្រុនចាញ់នៅតែបន្តធ្លាក់ចុះ នៅប្រទេសកម្ពុជាពុំមានអ្នកស្លាប់ដោយសារជំងឺគ្រុនចាញ់នោះទេ បើគិតចាប់តាំងពីឆ្នាំ ២០១៨ មក។
ស្ថានទូតអូស្រ្តាលីប្រចាំកម្ពុជា បានបន្តឱ្យដឹងដែរថា ករណីជំងឺគ្រុនចាញ់នៅតែបន្តធ្លាក់ចុះ នៅប្រទេសកម្ពុជាពុំមានអ្នកស្លាប់ដោយសារជំងឺគ្រុនចាញ់នោះទេ ចាប់តាំងពីឆ្នាំ ២០១៨ មក ហើយគោលដៅក្នុងការលុបបំបាត់ជំងឺគ្រុនចាញ់ប្រភេទ P. falciparum ដែលជាប្រភេទជំងឺដ៏សាហាវបំផុត គឺនៅចុងឆ្នាំនេះ។
អូស្ត្រាលីបន្តថា ៖ «ជាក់ស្តែងអូស្ត្រាលីបានផ្តល់ថវិការចំនួន ២៤២ លានដុល្លារសម្រាប់ឆ្នាំ ២០២១-២០២៣ និងផ្តល់ថវិការចំនួន ២៦៦ លានដុល្លារសម្រាប់ឆ្នាំ ២០២៤-២០២៦ ដល់មូលនិធិសកល ដើម្បីប្រយុទ្ធប្រឆាំងនឹងជំងឺអេដស៍ របេង និងគ្រុនចាញ់ ដែលជាដៃគូដ៏សំខាន់ក្នុងការប្រយុទ្ធប្រឆាំងនឹងជំងឺគ្រុនចាញ់នៅក្នុងតំបន់»។
ពាក់ព័ន្ធនឹងការប្រយុទ្ធប្រឆាំងនឹងជំងឺគ្រុនចាញ់នេះដែរ ក្នុងសារលិខិតសម្រាប់ទិវាជាតិប្រយុទ្ធជំងឺគ្រុនចាញ់ នាថ្ងៃទី២៥ ខែមេសា ឆ្នាំ២០២៣សម្ដេចតេជោ ហ៊ុន សែន នាយករដ្ឋមន្រ្តីកម្ពុជាក៏បានដាក់ចេញយុទ្ធសាស្ត្រដោយប្តេជ្ញានឹងកម្ចាត់ចោលជំងឺគ្រុនចាញ់ឱ្យដល់កម្រិតសូន្យចាប់ពេលនេះតទៅ។
សម្ដេចតេជោនាយករដ្ឋមន្រ្តី មានប្រសាសន៍ថា ផែនការយុទ្ធសាស្ត្រជាតិលុបបំបាត់ជំងឺគ្រុនចាញ់នៅកម្ពុជាកំពុងទទួលបានជោគជ័យ ព្រោះបើគិតចាប់តាំងពីឆ្នាំ២០១៦មក ត្រូវបានបញ្ឈប់លែងឱ្យមានភាពស៊ាំនឹងថ្នាំសម្លាប់មេរោគគ្រុនចាញ់ បន្ទាប់មកនៅចាប់ពីឆ្នាំ២០១៨ មកទល់បច្ចុប្បន្នពុំមានមនុស្សស្លាប់ដោយសារជំងឺគ្រុនចាញ់។
ករណីឈឺដោយជំងឺគ្រុនចាញ់ ត្រូវបានកាត់បន្ថយជាលំដាប់ ពីជាង១១ម៉ឺនករណីឈឺ និងស្លាប់ជាង៥០០នាក់ នៅឆ្នាំ២០១១ មកនៅសល់៤០៤១ ករណីឈឺនៅឆ្នាំ២០២២។ ចំនួននេះមានការថយចុះចំនួន ៦ ភាគរយ បើធៀបនឹងឆ្នាំ ២០២១ ដែលមានករណីគ្រុនចាញ់ ចំនួន ៤ ៣១៨ ករណី។
ថ្លែងក្នុងពិធីប្រារព្ធទិវាជាតិប្រយុទ្ធនឹងជំងឺគ្រុនចាញ់ នាខេត្តស្ទឹងត្រែង នៅថ្ងៃទី២៥ ខែមេសា ឆ្នាំ២០២៣ រដ្ឋមន្រ្តីក្រសួងសុខាភិបាល ឯកឧត្តម ម៉ម ប៊ុនហេង បានលើកឡើងថា ជំងឺគ្រុនចាញ់ ជាប្រភេទជំងឺដែលបង្កឡើងដោយមូសដែកគោលចម្លងមេរោគទៅមនុស្សបណ្តាលទៅជាបញ្ហាព្រួយបារម្ភចំបងដល់សុខភាពសាធារណៈ និងប៉ះពាល់ដល់សេដ្ឋកិច្ចសង្គម។
ឯកឧត្តមរដ្ឋមន្រ្តី ក៏ជំរុញស្ថាប័នពាក់ព័ន្ធទាំងអស់ ត្រូវអនុវត្តន៍ផែនការយុទ្ធសាស្រ្តជាតិ លុបបំបាត់ជំងឺគ្រុនចាញ់ឱ្យដល់កម្រិតសូន្យចាប់ពេលនេះតទៅ ខណៈដែលផែនការលុបបំបាត់ជំងឺគ្រុនចាញ់នឹងបញ្ចប់នៅឆ្នាំ២០២៥ ខាងមុខនេះ៕
ដោយ៖សែម ពិសី
