កម្ពុជា ត្រៀមអនុវត្តនីតិវិធីធ្វើមាតុភូមិនិវត្តន៍វិញ នូវជនជាតិហ្វីលីពីន ចំនួន បួននាក់
ភ្នំពេញ៖ ក្រុមប្រតិបត្តិការស៊ើបអង្កេត ស្រាវជ្រាវបណ្តាញនាំមនុស្សឆ្លងដែនខុសច្បាប់ នៃអគ្គស្នងការដ្ឋាន នគរបាលជាតិ បានប្រកាសឱ្យដឹងថា សមត្ថកិច្ចជំនាញរបស់កម្ពុជា បានបញ្ជូនជនជាតិហ្វីលីពីនចំនួនបួននាក់ ទៅកាន់មណ្ឌលត្រៀមបណ្ដេញចេញរបស់អគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីធ្វើមាតុភូមិនិវត្តន៍។នេះបើយោងតាមសេចក្តីប្រកាសព័ត៌មានរបស់ក្រុមប្រតិបត្តិការស៊ើបអង្កេត ស្រាវជ្រាវ បណ្តាញនាំមនុស្សឆ្លងដែនខុសច្បាប់នៃ គណៈកម្មាធិការជាតិប្រយុទ្ធប្រឆាំង អំពើជួញដូរមនុស្ស កាលពីថ្ងៃទី២៩ ខែមេសា ឆ្នាំ២០២៣។
សេចក្តីប្រកាសបានឱ្យដឹងថា ក្រុមប្រតិបត្តិការបានទទួលកំណត់ទូតពីស្ថានទូតហ្វីលីពីន ប្រចាំកម្ពុជាចំនួនពីរលើក ដោយស្នើសុំជួយសង្គ្រោះប្រជាពលរដ្ឋហ្វីលីនលើករណីបង្ខាំងមនុស្ស ធ្វើទារុណកម្មនិងជំរិតទារប្រាក់ នៅទីតាំងក្រុមហ៊ុនកាស៊ីណូមួយកន្លែង ស្ថិតក្នុងខេត្តកោះកុង ដោយលើកទី១ ស្នើសុំជួយសង្គ្រោះ ចំនួន ៣០នាក់ និងលើកទី២ ស្នើសុំជួយសង្គ្រោះចំនួន ២០នាក់។
ប្រភពដដែលបន្តថា សមត្ថកិច្ចនៃស្នងការដ្ឋាននគរបាលខេត្តកោះកុង បានចុះស្រាវជ្រាវស្វែងរកជនជាតិហ្វីលីពីន តាម សំណើសុំអន្តរាគមន៍ទាំង២លើក ដោយលើកទី១ បានរកឃើញប្រជាពលរដ្ឋហ្វីលីពីនចំនួន ២០នាក់ ប៉ុន្តែពួកគេត្រូវបានដោះលែងវិញ ដោយសារពួកគេស្នាក់នៅ និងធ្វើការស្របតាមច្បាប់នៃប្រទេសកម្ពុជា។
គណៈកម្មាធិការជាតិប្រយុទ្ធប្រឆាំង អំពើជួញដូរមនុស្ស បានឱ្យដឹងទៀតថា ក្រោយទទួលបានសំណើលើកទី២ សមត្ថកិច្ចជំនាញបានរកឃើញពលរដ្ឋហ្វីលីពីនចំនួនប្រាំពីរនាក់ ដែលមានឈ្មោះ ប្រហាក់ប្រហែលនឹងឈ្មោះក្នុងសំណើសុំរបស់ស្ថានទូត ទើបសម្រេចអញ្ជើញពួកគេមកទីកន្លែងរបស់ សមត្ថកិច្ចដើម្បីធ្វើការសាកសួរ។
គណៈកម្មាធិការនេះថា ៖ «តាមការបំភ្លឺនៅចំពោះមុខមន្ត្រីទូត ពួកគេបានចូលមកប្រទេសកម្ពុជា នៅក្នុងឆ្នាំ២០២២ តាមច្រកអាកាសយានដ្ឋានអន្តរជាតិភ្នំពេញ ក្នុងគោលបំណងស្វែងរកការងារធ្វើតាមរយៈភ្នាក់ងារ និងបានចូលធ្វើការរហូតមកដល់បច្ចុប្បន្ន ដោយទទួលបានអាហារគ្រប់គ្រាន់ កន្លែងស្នាក់នៅសមរម្យ ប្រាក់ខែទៀងទាត់ និងពុំធ្លាប់ត្រូវបានបង្ខាំងធ្វើទារុណកម្ម ឬបង្ខិតបង្ខំឲ្យធ្វើការ ខុសច្បាប់នោះទេ»។
ពួកគេក៏ពុំបានដឹងអំពីការប្ដឹង ឬស្នើសុំជំនួយទៅកាន់ស្ថានទូតនោះដែរ ហើយឈ្មោះ ដែលមានក្នុងកំណត់ទូតនោះ គឺជាឈ្មោះដែលពួកគេប្រើលើបណ្តាញសង្គមប៉ុណ្ណោះ។ នេះបើតាមគណៈកម្មាធិការជាតិប្រយុទ្ធប្រឆាំង អំពើជួញដូរមនុស្សបញ្ជាក់បន្ថែម។
ដោយពិនិត្យឃើញ ភាពស្របច្បាប់ចំពោះការស្នាក់នៅ និងធ្វើការនៅក្នុងប្រទេសកម្ពុជា ព្រមទាំងមានសំណូមពរពីសាមីខ្លួន សមត្ថកិច្ចបានអនុញ្ញាតឲ្យជនជាតិហ្វីលីពីនចំនួន ៣នាក់ ត្រឡប់ទៅបន្តការងារវិញជាធម្មតា និងបួននាក់ ផ្សេងទៀត ស្ម័គ្រចិត្តលាឈប់ពីការងារត្រឡប់ទៅប្រទេសកំណើតវិញ។
សូមបញ្ជាក់ផងដែរថា ក្នុងរយៈពេលជាង បួនខែចុងឆ្នាំមុន គឺគិតពីថ្ងៃទី១៨ ខែសីហា ដល់ថ្ងៃទី៣១ ខែធ្នូ ឆ្នាំ២០២២ កន្លងទៅនេះ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានទទួលបញ្ជីតាមដានពាក់ព័ន្ធសំណើឱ្យជួយអន្តរាគមន៍ការជួញដូរមនុស្សជិត ៧០០ សំណើ ក្នុងនោះមានជនបរទេសសរុបជាង ១ ៥០០ នាក់ និងមាន ១៦ សញ្ជាតិ។
យោងតាមព័ត៌ដែលបានបង្ហោះនៅលើគណនីហ្វេសប៊ុករបស់សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃបានឱ្យដឹងថា គ.ជ.ប.ជ បានទទួលបញ្ជីតាមដានពាក់ព័ន្ធសំណើ និងសំណូមពរ តាមរយៈហ្វេសប៊ុក និងប្រភពផ្សេងៗទៀត សរុបចំនួន ៦៦១សំណើ ជនបរទេស ១៥៩៦នាក់ (ស្រី ១៧២នាក់)ស្មើ១៦សញ្ជាតិ។
របាយការណ៍ថា ក្នុងចំណោមអ្នកដែលបានដាក់សំណើ និងសំណូមពរ សុំកិច្ចអន្តរាគមន៍នោះ រួមមាន ជនជាតិខ្មែរប្រាំបួននាក់ ចិន៦៦៨នាក់ ជប៉ុនមួយនាក់ ថៃប្រាំបួននាក់ នេប៉ាល់មួយនាក់ បង់ក្លាដែស២២នាក់ ប៉ាគីស្ថានមួយនាក់ ម៉ាឡេស៊ី១៤៤នាក់ មីយ៉ាន់ម៉ាប្រាំនាក់ វៀតណាម៤៦៦នាក់ សិង្ហបុរីមួយនាក់ ស្រីលង្កាបួននាក់ ហ្វីលីពីនពីរនាក់ ឥណ្ឌា៨៣នាក់ ឥណ្ឌូនេស៊ី១៧៨នាក់ និងអាមេរិកពីរនាក់៕
ដោយ៖ជា សុខនី
