មេដឹកនាំស៊ីរី និងអ៊ីរ៉ង់ ចុះហត្ថលេខាលើកិច្ចព្រមព្រៀងពង្រឹងសេដ្ឋកិច្ចរវាងប្រទេសទាំង២
តេហេរ៉ង់៖ មេដឹកនាំនៃប្រទេសអ៊ីរ៉ង់និងស៊ីរីកាលពីថ្ងៃពុធ បានចុះហត្ថលេខាលើកិច្ចព្រមព្រៀងសហប្រតិបត្តិការសេដ្ឋកិច្ចរយៈពេលវែងលើវិស័យប្រេង ពាណិជ្ជកម្ម និងវិស័យផ្សេងៗទៀត ដើម្បីជំរុញទំនាក់ទំនងសេដ្ឋកិច្ចរវាងសម្ព័ន្ធមិត្តចាស់វស្សានៅមជ្ឈិមបូព៌ាទាំង២។
អ្នកសារព័ត៌មានរបស់បណ្ដាញព័ត៌មាន Al Jazeera លោក Dorsa Jabbari ដែលរាយការណ៍ពីទីក្រុងតេអេរ៉ង់ បាននិយាយថា៖ «ប្រធានាធិបតីអ៊ីរ៉ង់បានចុះហត្ថលេខាលើឯកសារយ៉ាងហោចណាស់ចំនួន ១៥ ដែលរួមបញ្ជូលទាំងកិច្ចព្រមព្រៀងសេដ្ឋកិច្ចជាច្រើនរវាងប្រទេសទាំង២» ។
ការចុះហត្ថលេខានេះ ធ្វើឡើងក្នុងទីក្រុងដាម៉ាស់ នៅពេលប្រធានាធិបតីអ៊ីរ៉ង់ លោក អេប្រាហ៊ីម រ៉ៃស៊ី (Ebrahim Raisi) ដែលដឹកនាំគណៈប្រតិភូអ៊ីរ៉ង់ដ៏ធំ បានជួបជាមួយសមភាគីស៊ីរី លោកប្រធានាធិបតី បាសារ អាល់អាសាដ (Bashar al-Assad) ក្នុងដំណើរទស្សនកិច្ចទៅស៊ីរីរយៈពេល២ថ្ងៃ ដែលចាប់ផ្ដើមនៅថ្ងៃពុធ។
គណៈប្រតិភូអ៊ីរ៉ង់ រួមមានរដ្ឋមន្ត្រីការបរទេសការពារជាតិ ប្រេង គមនាគមន៍ និងអភិវឌ្ឍន៍ទីក្រុង ព្រមទាំងទូរគមនាគមន៍ ប៉ុន្តែបើតាមបណ្ដាញព័ត៌មាន Al Jazeera លោក រ៉ៃស៊ី ក៏អមដំណើរដោយអ្នកជំនួញក្នុងវិស័យឯកជនអ៊ីរ៉ង់មួយចំនួនផងដែរ។
កិច្ចព្រមព្រៀងចុងក្រោយនេះ ត្រូវបានគេមើលឃើញថា មានសារៈសំខាន់សម្រាប់ប្រទេសស៊ីរី ខណៈសេដ្ឋកិច្ចប្រទេសនេះបានធ្លាក់ដល់កម្រិតទាបបំផុតក្នុងរយៈពេលមួយទសវត្សរ៍កន្លងមកនេះ ដោយសារតែអតិផរណាកើនឡើង ការធ្លាក់ចុះនៃតម្លៃរូបិយប័ណ្ណជាតិ និងការដាច់ចរន្តអគ្គិសនីជាដើម។
គួរគូសបញ្ជាក់ថា ក្រុងតេអេរ៉ង់ គឺជាអ្នកគាំទ្រដ៏សំខាន់របស់រដ្ឋាភិបាលស៊ីរី ក្រោមការគ្រប់គ្រងរបស់លោក អាល់អាសាដ ចាប់តាំងពីការបះបោរក្នុងប្រទេសនេះនៅឆ្នាំ ២០១១។ អ៊ីរ៉ង់បានបញ្ជូនទីប្រឹក្សាយោធា និងយុទ្ធជនដែលគាំទ្រដោយអ៊ីរ៉ង់រាប់ពាន់នាក់ទៅកាន់ប្រទេសស៊ីរី ដើម្បីប្រយុទ្ធជាមួយក្រុមប្រដាប់អាវុធ ដែលប្រឆាំងនឹងលោក អាល់អាសាដ។ បន្ថែមពីនេះ ទីក្រុងតេអេរ៉ង់ក៏បានផ្តល់ដង្ហើមសេដ្ឋកិច្ចដល់ស៊ីរី ដោយការផ្គត់ផ្គង់ប្រេង និងប្រាក់កម្ចី ដែលសរុបជាទឹកប្រាក់រាប់ពាន់លានដុល្លារ។
អ្នកវិភាគយល់ឃើញថា ដំណើរទស្សនកិច្ចទៅស៊ីរីរបស់លោក រ៉ៃស៊ី នាពេលនេះ បង្ហាញពីការគាំទ្រយ៉ាងខ្លាំងរបស់មេដឹកនាំអ៊ីរ៉ង់ចំពោះលោក អាល់អាសាដ និងដើម្បីបង្កើនភាពធន់ប្រឆាំងនឹងអ្វី ដែលលោក រ៉ៃស៊ី ហៅថាជាការគំរាមកំហែងពីអ៊ីស្រាអែល។
គួរបញ្ជាក់ថា អ៊ីស្រាអែលបានបើកការវាយឆ្មក់រាប់រយដងចូលទៅក្នុងប្រទេសស៊ីរីក្នុងរយៈពេលជាច្រើនឆ្នាំមកនេះ ដោយអះអាងថា ខ្លួនកំណត់គោលដៅលើកងកម្លាំងគាំទ្រដោយអ៊ីរ៉ង់ និងក្រុមសកម្មប្រយុទ្ធលីបង់ គឺក្រុម ហេសបូឡា ក្នុងទឹកដីស៊ីរី។
អនុប្រធានទទួលបន្ទុកកិច្ចការនយោបាយរបស់លោក រ៉ៃស៊ី លោក Mohammad Jamshidi បានប្រាប់ទីភ្នាក់ងារព័ត៌មានរដ្ឋអ៊ីរ៉ង់ IRNA មុនពេលចេញដំណើរទៅស៊ីរីថា ដំណើរទស្សនកិច្ចនេះគឺជាសញ្ញានៃ «ជ័យជម្នះជាយុទ្ធសាស្ត្ររបស់សាធារណរដ្ឋអ៊ិស្លាមអ៊ីរ៉ង់នៅក្នុងតំបន់»។ អ៊ីរ៉ង់ ដែលរងទណ្ឌកម្មសេដ្ឋកិច្ចពីលោកខាងលិចធ្ងន់ធ្ងរដោយសារកម្មវិធីនុយក្លេអ៊ែរ នាពេលនេះ កំពុងតាំងខ្លួនឯងមានជំហររឹងមាំជាងមុននៅក្នុងអនាគតសេដ្ឋកិច្ចរបស់ស៊ីរី ដោយមានគោលបំណងពង្រីកពាណិជ្ជកម្ម និងធានានូវប្រតិបត្តិការរបស់ក្រុមហ៊ុនរដ្ឋ និងឯកជនអ៊ីរ៉ង់នៅស៊ីរី៕
ប្រែសម្រួលដោយ៖ ហួន ឌីណា
ប្រភព៖ Syria and Iran leaders sign long-term oil, trade agreements https://www.aljazeera.com/news/2023/5/3/syria-and-iran-leaders-sign-long-term-oil-trade-agreements
Iran’s Raisi in Syria; visit hailed as ‘strategic victory’ https://www.aljazeera.com/news/2023/5/3/irans-raisi-in-syria-visit-hailed-as-strategic-victory
