បារាំង និងជប៉ុន បានចុះហត្ថលេខាលើកកិច្ចព្រមព្រៀងភាពជាដៃគូនុយក្លេអ៊ែរ
ប៉ារីស៖ សេចក្ដីប្រកាសរួមបារាំង និងជប៉ុន បានឱ្យដឹងកាលពីថ្ងៃពុធថា ប្រទេសទាំងពីរ បានចុះហត្ថលេខាលើកិច្ចព្រមព្រៀងសហប្រតិបត្តិការនុយក្លេអ៊ែរនៅទីក្រុងប៉ារីស ដែលនឹងធ្វើឱ្យកាន់តែស៊ីជម្រៅ និងពន្លឿនទំនាក់ទំនងក្នុងការស្រាវជ្រាវ និងការអភិវឌ្ឍនុយក្លេអ៊ែរជំនាន់ក្រោយ ដូចជារ៉េអាក់ទ័រ បញ្ចុះកម្ដៅលឿនដោយប្រើសូដ្យូមជាដើម។
កិច្ចព្រមព្រៀងភាពជាដៃគូសម្រេចឡើងក្រោយជំនួបរវាងរដ្ឋមន្ត្រីថាមពលបារាំងលោកស្រី Agnes Pannier-Runacher និងរដ្ឋមន្ត្រីក្រសួងពាណិជ្ជកម្ម សេដ្ឋកិច្ច និងឧស្សាហកម្មជប៉ុន លោក Yasutoshi Nishimuraដែលអ្នកទាំងពីរបានពិភាក្សាអំពីការពន្លឿនកិច្ចសហប្រតិបត្តិការបច្ចេកទេសលើវដ្តនៃឥន្ធនៈនុយក្លេអ៊ែរ និងធ្វើការដើម្បីកសាងខ្សែសង្វាក់ផ្គត់ផ្គង់ តែជាមួយប្រទេសដែលមាន «តម្លៃរួម» ។
ក្រោមកិច្ចព្រមព្រៀងនេះ ការងារផ្សេងៗនឹងបន្តលើសុវត្ថិភាពនៃម៉ាស៊ីនរ៉េអាក់ទ័រដែលមានស្រាប់ ការរុះរើរោងចក្រនុយក្លេអ៊ែរ រួមទាំងម៉ាស៊ីនរ៉េអាក់ទ័រនៅរោងចក្រនុយក្លេអ៊ែរជប៉ុន Fukushima Dai’ichi ការអភិវឌ្ឍន៍សមត្ថភាពនុយក្លេអ៊ែរស៊ីវិលក្នុងបណ្តាប្រទេសដែលចាប់អារម្មណ៍ និងការលើកកម្ពស់ការកែច្នៃឡើងវិញនូវឥន្ធនៈនុយក្លេអ៊ែរដែលប្រើប្រាស់រួច ដើម្បីកាត់បន្ថយតម្រូវការប្រើប្រាស់អ៊ុយរ៉ាញ៉ូមជាដើម។
គួរបញ្ជាក់ថា កាលពីខែមុន លោកស្រី Pannier-Runacher និងលោក Nishimura បានជួបពិភាក្សាគ្នានៅខាងក្រៅកិច្ចប្រជុំថាមពល បរិស្ថាន និងអាកាសធាតុរបស់ក្រុមប្រទេសអ្នកមានទាំង៧ (G7) នៅទីក្រុង Sapporo ដោយបានពិភាក្សាគ្នាអំពីកិច្ចសហប្រតិបត្តិការលើការដំណើរការថាមពលនុយក្លេអ៊ែរឡើងវិញនៅក្នុងប្រទេសជប៉ុន ដើម្បីជាមធ្យោបាយក្នុងការបំពេញតម្រូវការថាមពលដែលកំពុងកើនឡើង ហើយកាត់បន្ថយការបំភាយឧស្ម័នផ្ទះកញ្ចក់។
ជាមួយនឹងព្រឹត្តិការណ៍ចុងក្រោយនេះ កាសែតជប៉ុន Sankei បានរាយការណ៍កាលពីថ្ងៃពុធថា នាយករដ្ឋមន្រ្តីជប៉ុន លោក ហ្វូមីអូ គីហ្ស៊ីដា បានកំណត់ថវិកាប្រមាណ ៣៣៧ លានដុល្លារអាមេរិកក្នុងរយៈពេល ៣ ឆ្នាំ ដោយចាប់ផ្តើមពីខែមេសាឆ្នាំ ២០២៤ ទៅ ដើម្បីជួយអភិវឌ្ឍរ៉េអាក់ទ័រ ដែលបញ្ចុះកម្ដៅដោយប្រើសូដ្យូម។
គួរកត់សម្គាល់ផងដែរថា សេចក្ដីថ្លែងការណ៍កាលពីថ្ងៃពុធ ចេញផ្សាយមួយថ្ងៃបន្ទាប់ពីតុលាការឧទ្ធរណ៍ទីក្រុងប៉ារីស បានអនុញ្ញាតឱ្យរដ្ឋាភិបាលបារាំងបន្តការទិញយកក្រុមហ៊ុននុយក្លេអ៊ែរយក្ស EDF ដែលជាផ្នែកមួយនៃផែនការរយៈពេលវែងរបស់ខ្លួន ក្នុងការស្តារវិស័យថាមពលនុយក្លេអ៊ែរឡើងវិញ និងការផលិតម៉ាស៊ីនរ៉េអាក់ទ័រថ្មីឱ្យបាន ១៤ ឡើងទៅ គិតត្រឹមឆ្នាំ ២០៥០៕
ប្រែសម្រួលដោយ៖ ហួន ឌីណា
ប្រភព៖ France, Japan sign nuclear partnership deal https://www.reuters.com/world/france-japan-sign-nuclear-partnership-deal-2023-05-03/
