ភ្នំពេញ៖ បុណ្យវិសាខបូជា គឺជាពិធីបុណ្យសាសនាដ៏សំខាន់បំផុត ក្នុងចំណោមបុណ្យសាសនាដទៃៗទៀត ដោយសារ​ពិធីបុណ្យនេះ ​បានបង្ហាញនូវការគោរពរំឭកនឹកដល់ព្រឹត្តិការណ៍ធំៗបី នៃសម័យកាលរបស់ព្រះសម្មាសម្ពុទ្ធសមណគោតម គឺថ្ងៃដែលព្រះអង្គទ្រង់បានប្រសូត ព្រះអង្គបានត្រាស់ដឹង និងជាថ្ងៃព្រះអង្គចូលបរិនិព្វានផងដែរ។

ប្រមុខរាជរដ្ឋាភិបាល​កម្ពុជាសម្ដេចតេជោ ហ៊ុន សែន នាយករដ្ឋមន្រ្តីកម្ពុជាបាន​​​លើកឡើង​នៅ​ថ្ងៃ១៥កើត ខែពិសាខ ត្រូវនឹងថ្ងៃទី​៤ ខែឧសភា ឆ្នាំ​២០២៣ លើបណ្តាញតេឡេក្រាម​របស់​សម្ដេចថា នេះ គឺជាថ្ងៃបុណ្យវិសាខបូជា។មិនថាតែនៅកម្ពុជាទេគឺនៅថ្ងៃនេះពុទ្ធសាសនិកជនទូទាំងពិភពលោក ក៏បាននាំគ្នាប្រារព្ធពិធីបុណ្យសាសនា ដ៏សំខាន់ខាងលើនេះផងដែរ។

សម្ដេចតេជោបន្តថា បុណ្យវិសាខបូជា គឺជាពិធីបុណ្យសាសនាដ៏សំខាន់បំផុត ក្នុងចំណោមបុណ្យសាសនាដទៃៗទៀត ​ដែល​បានបង្ហាញនូវការគោរពរំឭកនឹកដល់ព្រឹត្តិការណ៍ធំៗបី នៃសម័យកាលរបស់ព្រះសម្មា សម្ពុទ្ធសមណគោតម គឺថ្ងៃដែលព្រះអង្គទ្រង់បានប្រសូត បានត្រាស់ដឹង និងជាថ្ងៃចូលបរិនិព្វានផងដែរ។

សម្ដេចតេជោ  ហ៊ុន សែន បានបញ្ជាក់ថា ៖ «ព្រឹត្តិការណ៍ទាំងបីនេះ​ កើតឡើងចំថ្ងៃ ១៥កើត ខែពេញបូ​ណ៌មី ដែលមានព្រះច័ន្ទពេញវង់ ក្នុងខែពិសាខដូចគ្នាខុសតែឆ្នាំតែប៉ុណ្ណោះ។ នៅថ្ងៃទី១៥ ខែធ្នូ ឆ្នាំ​១៩៩៩ អង្គការសហប្រជាជាតិ (អ.ស.ប) ក៏បានប្រកាសទទួលស្គាល់ «វិសាខបូជា»ជាពិធីបុណ្យសាសនាអន្តរជាតិដែលបុគ្គលិកធ្វើការ និងសាធារណៈជនអាចប្រារព្ធធ្វើបាននៅទូទាំងពិភពលោ​កទៀតផង»។

ក្នុងឱកាសបុណ្យវិសាខបូជានេះដែរ ​សម្តេច​ព្រះឧត្តម​បញ្ញា​ ដួង​ ផង់​ សមាជិក​ថេរសភា​នៃព្រះរាជាណា​ចក្រកម្ពុជា​ និងជាចៅអធិការវត្តព្រែកប្រាំង បាន​ដឹកនាំព្រះសង្ឃ ពុទ្ធបរិស័ទ ដង្ហែរ ធម្មយា​ត្រាជុំវិញមហាសក្យមុនីចេតីយ នា​​វេលាម៉ោង ៣ ទៀបភ្លឺ ​ត្រូវនឹងថ្ងៃទី៤ ខែឧសភា ឆ្នាំ២០២៣។

​សម្តេច​ព្រះឧត្តម​បញ្ញា​ ដួង​ ផង់​ ​បានដឹកនាំ ព្រះសង្ឃ និងពុទ្ធបរិស័ទ ដើរហែក្បួនធម្មយាត្រា​ជុំវិញព្រះមហាសក្យមុនីចេតិយ ដែលតម្កល់ព្រះបរមសារីរិកធាតុ នៃព្រះសម្មាសម្ពុទ្ធ នៅលើភ្នំព្រះរាជទ្រ​ព្យ ស្ថិតក្នុងឃុំផ្សារដែក ស្រុកពញាឮ និងបានបូជាគ្រឿងសក្ការៈ សូត្រធម៌ មន្សកាថ្វាយបង្គំព្រះរតនត្រ័យ និងសម្មាទានសីល​។ 

​ពិធីបុណ្យវិសាខបូជានេះដែរ កាលពី​រសៀលថ្ងៃទី​៣ ខែឧសភា​ឯកឧត្តម ឈុន ស៊ីរុន លេខាធិការគណៈកម្មការទី៨ នៃរដ្ឋសភា និងជាតំណាងរាស្រ្តមណ្ឌលខេត្តកណ្តាល ​និងបណ្តាមន្ទីរអង្គភាពជុំវិញខេត្ត មន្ត្រីរាជការ ព្រះសង្ឃ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ​ជាច្រើននាក់ ក៏​បានដង្ហែរបុណ្យវិសាខបូជានេះ​ផងដែរ។​

យោងតាម​រដ្ឋបាលខេត្តកណ្តាល ឯកឧត្តម ឈុន ស៊ីរុន បានលើកឡើងថា វិសាខបូជា ជាពិធីបុណ្យសាសនាអន្តរជាតិ ដែលបុគ្គលិកធ្វើការ និងសាធារណជនអាចប្រារព្ធធ្វើបាននៅទូទាំងពិភពលោកទៀតផង។

​​ជាមួយគ្នានេះដែរ ឯកឧត្តម ​ស សុខា រដ្ឋលេខាធិការក្រសួងអប់រំ យុវជន និងកីឡា​ បាន​​ឱ្យដឹងដែរ​ថា​​ថ្ងៃបុណ្យវិសាខបូជា ដែលនៅតាមបណ្តាវត្តអារាមទូទាំងព្រះរាជាណាចក្រកម្ពុជា ក៏ដូចជាពុទ្ធសាសនិកជនទូទាំងពិភពលោក នាំគ្នាប្រារព្ធពិធីបុណ្យសាសនាដ៏សំខាន់នេះជារៀងរាល់ឆ្នាំ។

​ឯកឧត្តមលើកឡើងថា ៖ «សូមគោរពជូនពរដល់ពុកម៉ែ បងប្អូនប្រជាពលរដ្ឋ ព្រមទាំងពុទ្ធបរិស័ទទូទាំ​ងប្រទេសកម្ពុជា ក៏ដូចជាលើពិភពលោកទាំងមូល សូមជួបតែសេចក្តីសុខចម្រើន និងពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ»។​

​នៅ​ថ្ងៃទី៤ ខែឧសភា ឆ្នាំ២០២៣នេះដែរសម្ដេចក្រឡាហោម  ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចូលរួមក្នុងពិធីបុណ្យវិសាខបូជានេះ​​ នៅបរិវេណសាលាបុណ្យជើងភ្នំព្រះរាជទ្រព្យ ស្ថិតនៅឃុំផ្សាដែក ស្រុកពញាឭ ខេត្តកណ្ដាល។​

សូមបញ្ជាក់ផងដែរថា ពិធីបុណ្យវិសាខបូជា ត្រូវបានប្រារព្ធឡើងជារៀងរាល់ឆ្នាំ ដើម្បីរំលឹក និងឧ​ទ្ទិសចំពោះថ្ងៃទាំងបីនៃព្រះសម្មាសម្ពុទ្ធបរមគ្រូ​ គឺថ្ងៃប្រសូតចាកឧទរព្រះមាតា ថ្ងៃត្រាស់ដឹងអនុត្តរស​ម្មាសម្ពោធិញ្ញាណ និងថ្ងៃរំលត់ក្ខន្ធចូលកាន់ព្រះនិព្វាន ដោយកើតឡើងចំថ្ងៃ១៥កើត ខែវិសាខដូចគ្នា ពោលគឺខុសគ្នាតែឆ្នាំប៉ុណ្ណោះ៕

ដោយ៖នាង សុគន្ធា