អ៊ីរ៉ង់ប្រហារជីវិតមនុស្សពីរនាក់ ក្រោមការកាត់ទោសពីបទប្រមាថសាសនា
តេហេរ៉ង់៖ ប្រទេសអ៊ីរ៉ង់កាលពីថ្ងៃចន្ទទី ០៨ ខែឧសភាបានព្យួរកមនុស្សពីរនាក់ក្រោមការកាត់ទោសប្រហារជីវិតពីបទប្រមាថសាសនា។ នេះបើយោងតាមទីភ្នាក់ងារព័ត៌មានតុលាការអ៊ីរ៉ង់ Mizan។
បុរសពីរនាក់នោះ រួមមានលោក Yusef Mehrdad និងលោក Sadrullah Fazeli Zare ដែលត្រូវប៉ូលិសអ៊ីរ៉ង់ចាប់ខ្លួនកាលពីខែឧសភាឆ្នាំ២០២០ ហើយត្រូវកាត់ទោសប្រហារជីវិតនៅខែមេសាឆ្នាំមុន ចំពោះការដំណើរការបណ្ដាញ «ក្រុមប្រឆាំងនឹងសាសនាអ៊ិស្លាម» នៅលើអ៊ីនធឺណិត។
តុលាការបានកាត់ទោសអ្នកទាំងពីរបន្ទាប់ពីរកឃើញថា ពួកគេជាសមាជិកនៃឆាណែលតេឡេក្រាម ដែលមានឈ្មោះថា «រិះគន់អបិយជំនឿនិងសាសនា»។ នេះបើយោងតាមគណៈកម្មការសហរដ្ឋអាមេរិកស្តីពីសេរីភាពសាសនាអន្តរជាតិ។ ជាធម្មតាសមាជិកនៃឆាណែលតេឡេក្រាមនេះ និយាយប្រមាថសាសនាអ៊ិស្លាម ខណៈមានសមាជិកម្នាក់បានរងការចោទប្រកាន់ថាបានដុតគម្ពីសាសនាផ្សេងៗទៀតផង។បើតាមការចុះផ្សាយបណ្ដាញទូរទស្សន៍រដ្ឋអ៊ីរ៉ង់ AlAlam មានខ្សែវិដេអូ ដែលបង្ហាញថា លោក Mehrdad បានដុតគម្ពីរអ៊ិស្លាម កូរ៉ាន។
សូមបញ្ជាក់ថា ការប្រហារកាត់ទោសប្រហារជីវិតលោក Mehrdad និងលោក Zare របស់អ៊ីរ៉ង់ ធ្វើឡើងទោះបីជាមានការអំពាវនាវពីសហគមន៍អន្តរជាតិបញ្ឈប់សកម្មភាពបែបនេះ។ កន្លងមក អ្នកជំនាញរបស់អង្គការសហប្រជាជាតិ បានអំពាវនាវឱ្យអ៊ីរ៉ង់បញ្ឈប់ការធ្វើទុក្ខបុកម្នេញលើអ្នកកាន់សាសនាភាគតិច ដែលអ្នកជំនាញដដែលហៅថាជា គោលនយោបាយកំណត់គោលដៅលើអ្នកប្រកាន់ជំនឿផ្សេងៗក្រៅពីអ៊ិស្លាម រួមទាំងអ្នកប្រែចិត្តទៅជឿគ្រិស្តសាសនា និងអ្នកមិនជឿលើសាសនា។
ក្រុមអ្នកជំនាញបានលើកឡើងក្នុងសេចក្ដីថ្លែងការណ៍កាលពីសីហាឆ្នាំមុនថា៖ «ទណ្ឌកម្មដែលគ្មានការអត់ឱនរបស់រដ្ឋ(អ៊ីរ៉ង់)បែបនេះ បន្ថែមភាពជ្រុលនិយម និងអំពើហិង្សា។ យើងអំពាវនាវឱ្យអាជ្ញាធរអ៊ីរ៉ង់ លុបបំបាត់បទឧក្រិដ្ឋប្រមាថសាសនា និងចាត់វិធានការប្រកបដោយអត្ថន័យ ដើម្បីធានាសិទ្ធិសេរីភាពខាងសាសនា ឬជំនឿ»។
គួរកត់សម្គាល់ផងដែរថា ការប្រហារជីវិតលោក Mehrdad និងលោក Zare ធ្វើឡើងតែប៉ុន្មានថ្ងៃប៉ុណ្ណេះ បន្ទាប់ពីអ៊ីរ៉ង់ប្រហារជីវិតបុរសជនជាតិស៊ុយអែត-អ៊ីរ៉ង់២រូប ដែលត្រូវបានកាត់ទោសពីបទដឹកនាំក្រុមបំបែកខ្លួនជនជាតិអារ៉ាប់ ដែលធ្វើការវាយប្រហារក្នុងប្រទេសអ៊ីរ៉ង់។
របាយការណ៍រួមដែលចេញផ្សាយកាលពីខែមេសា ដោយអង្គការសិទ្ធិមនុស្សអ៊ីរ៉ង់ (IHR) ដែលមានមូលដ្ឋាននៅប្រទេសន័រវេស និងអង្គការរួមគ្នាប្រឆាំងនឹងការកាត់ទោសប្រហារជីវិត (ECPM) ដែលមានមូលដ្ឋាននៅប្រទេសបារាំង បានបង្ហាញថា ការប្រហារជីវិតលើមនុស្សយ៉ាងហោចណាស់ ៥៨២ នាក់ ត្រូវបានធ្វើឡើងក្នុងប្រទេសអ៊ីរ៉ង់កាលពីឆ្នាំមុន ដែលកើនឡើងប្រមាណ ៧៥ ភាគរយ ធៀបនឹងឆ្នាំ ២០២១ និងជាចំនួនខ្ពស់បំផុតរាប់តាំងពីឆ្នាំ ២០១៥។
របាយការណ៍រកឃើញថា ការកាត់ទោសប្រហារជីវិតនៅអ៊ីរ៉ង់កើនឡើង បន្ទាប់ពីភាពចលាចលក្នុងប្រទេសផ្ទុះឡើង ដោយសារតែការស្លាប់របស់ជនជាតិកួដ នាង Mahsa Amini វ័យ ២២ ឆ្នាំ ក្នុងមន្ទីរឃុំឃាំងរបស់ប៉ូលិសសីលធម៌អ៊ីរ៉ង់ កាលពីពាក់កណ្ដាលខែកញ្ញាឆ្នាំមុន៕
ប្រែសម្រួល៖ហួន ឌីណា
