ក្រសួងសុខាភិបាល អំពាវនាវឱ្យបញ្ឈប់ការចែកចាយព័ត៌មានមិនពិតទាក់ទងនឹងមនុស្សពេញវ័យមិនចាំបាច់ត្រូវចាក់វ៉ាក់សាំងបន្ថែមនោះទេ
ភ្នំពេញ៖ មន្រ្តីជាន់ខ្ពស់នៃក្រសួងសុខាភិបាល បានអំពាវនាវឱ្យបញ្ឈប់ការចែកចាយព័ត៌មានមិនពិតដែលទាក់ទងនឹងការលើកឡើងថា អង្គការសុខភាពពិភពលោក(WHO)ថា មនុស្សពេញវ័យមិនចាំបាច់ត្រូវចាក់វ៉ាក់សាំងបន្ថែមនោះទេ ស្របពេលអ្នកជំនាញថា ការចាក់វ៉ាក់សាំងគ្រប់ដូស មិនថាមនុស្សពេញវ័យ ឬមនុស្សចាស់នោះទេ នឹងជួយការពារខ្លួនពីការឆ្លងជំងឺ។
លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាលនៅថ្ងៃទី៩ ខែឧសភា បានឱ្យដឹងថា មានបណ្ដាញតេលេក្រាមមួយឈ្មោះថា«តំបន់សុខភាព»បានផ្សព្វផ្សាយសារសម្លេងរបស់ស្ថាប័នសារព័ត៌មានមួយដែលមានរយៈពេលជិតបីនាទីទាក់ទងនឹងអង្គការសុខភាពពិភពលោក(WHO)ថា មនុស្សពេញវ័យមានសុខភាពល្អ មិនចាំបាច់ត្រូវចាក់វ៉ាក់សាំងបន្ថែមនោះឡើយ។
បណ្តាញផ្សព្វផ្សាយនេះបានបញ្ជាក់ទៀតថា វ៉ាក់សាំងបន្ថែមនោះគឺសំដៅលើដូសទី៤ ដូសទី៥ ដូសទី៦ នោះទេ ពីព្រោះវ៉ាក់សាំងពីរដូសដំបូង និងដូសជំរុញទីមួយ អាចការពារគ្រប់គ្រាន់ហើយ។ លើសពីនេះវ៉ាក់សាំង ក៏បានផ្តល់គុណប្រយោជន៍សម្រាប់សុខភាពតិចតួចបំផុតផងដែរ។
ទាក់ទងនឹងការផ្សព្វផ្សាយនេះ លោកជំទាវ ឱ វណ្ណឌីន បានលើកឡើងថា ៖ «ហេតុដូច្នេះហើយ សូមសាធារណជន មេត្តាបញ្ឈប់ការចែកចាយការផ្សាយព័ត៌មានដែលបកស្រាយខុសពីបច្ចេកទេសទាំងនេះ ពីព្រោះអង្គការសុខភាពពិភពលោកមិននិយាយថា មនុស្សពេញវ័យ មានសុខភាពល្អ មិនចាំបាច់ត្រូវចាក់វ៉ាក់ស៊ាំងបន្ថែមបែបនេះទេ ហើយអ្នកដែលធ្វើការបកស្រាយបែបនេះ គឹមានបំណងមិនល្អសម្រាប់ប្រទេសកម្ពុជា»។
ជុំវិញរឿងនេះ លោក នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិត្យសភាកម្ពុជា បានឱ្យដឹងថា សម្រាប់ប្រទេសកម្ពុជា ដោយសារតែប្រជាពលរដ្ឋទាំងអស់នៅទូទាំងប្រទេស បានចាក់វ៉ាកសាំងដូសជំរុញនេះហើយ បានជាធ្វើឱ្យប្រទេសកម្ពុជាមិនអាចឆ្លងរីករាលដាលទ្រង់ទ្រាយធំ ហើយនិងបានធ្វើឱ្យក្រសួងសុខាភិបាលអាចគ្រប់គ្រងការឆ្លងរីករាតដាលនេះបានផងដែរ។
ក្រៅពីនេះលោកក៏មើលឃើញថា ប្រទេសមួយចំនួនដែលមិនបានចាក់វ៉ាក់សាំង គឺមានការឆ្លងរីករាតដាលទ្រង់ទ្រាយធំ ហើយបានបង្កឱ្យមានហានិភ័យទៅដល់អាយុជីវិតទៅទៀត ដោយសារជំងឺកូវីដ១៩ ជាជំងឺដែលវាយលុកទៅលើសួត។ ដូច្នេះបានជាអង្គការសុខភាពពិភពលោក មានការទាមទារឱ្យចាក់វ៉ាក់សាំងឲ្យបានគ្រប់គ្រាន់ និងគ្រប់ដូសជំរុញទាំងអស់ ដើម្បីការពារពីហានិភ័យនៃការស្លាប់ និងឈឺធ្ងន់សម្រាកក្នុងមន្ទីរពេទ្យជាដើម។
លោក នុត សម្បត្តិ បានឱ្យដឹងថា ៖ «ហេតុនេះមិនថាមនុស្សពេញវ័យ ក្មេង ឬចាស់ និងអ្នកមានជំងឺនោះទេ គ្រប់លក្ខខណ្ឌចាក់វ៉ាក់សាំង គឺត្រូវតែទៅចាក់ឱ្យបានគ្រប់ដូស ពីព្រោះវានឹងជួយការពារខ្លួនឯងពីការរំខាននៃការឆ្លងរីករាតដាលជំងឺកូវីដ១៩បាន»។
លោក យង់ គិមអេង ប្រធានមជ្ឍមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព ក៏បានថ្លែងដែរថា អ្វីដែលក្រសួងសុខាភិបាលបានអំពាវនាវនេះ វាគឺជារឿងមួយដែលល្អ ដើម្បីឱ្យសាធារណៈជនបានយល់ច្បាស់ ពីព្រោះក្រសួង និងអង្គការសុខភាពពិភពលោក គឺជាដៃគូរនឹងគ្នាក្នុងការចែកចាយព័ត៌មានលើកិច្ចការងារទាំងនោះ។
លោកបន្តថា បើកាលណាមានការចែកចាយព័ត៌មានមិនពិតទាំងនោះកើតឡើង ខណៈដែលក្រសួងមិនចេញមកបកស្រាយនោះទេ សាធារណជននឹងមានការយល់ច្រឡំ ដែលអាចបង្កឱ្យប៉ះពាល់ដល់សុខភាពសាធារណៈ។
លោក យង់ គិមអេង ថា៖ «អ៊ីចឹងព័ត៌មានហ្នឹងដែលក្រសួងសុខាភិបាលបានបំភ្លឺនេះ វាជាករណីមួយល្អ ដែលអាចជួយដល់សាធារណៈជនកុំឱ្យមានការយល់ច្រឡំតទៅទៀត ខណៈដែលការចាក់វ៉ាក់សាំងកន្លងមក បានផ្ដល់នូវគុណប្រយោជន៍ជាច្រើន នៅពេលអ្នកចាក់គ្រប់គ្រាន់ ទោះបីឆ្លងជំងឺនេះក៏មិនមានបញ្ហា ហើយក៏មិនអាចធ្លាក់ខ្លួនឈឺដល់ស្លាប់ផងដែរ»។
យោងតាមរបាយការណ៍របស់ក្រសួងសុខាភិបាល គិតមកត្រឹមថ្ងៃទី៨ ខែឧសភា ឆ្នាំ២០២៣នេះ កំណើនអត្រាអ្នកចាក់វ៉ាក់សាំងកូវីដ១៩ នៅកម្ពុជាធៀបនឹងចំនួនប្រជាជនសរុប ១៦លាននាក់ មាន ៩៥.៥៤ភាគរយ៕ ដោយ៖ជា សុខនី
