ចិនបណ្ដេញអ្នកការទូតកាណាដាចេញពីប្រទេសដើម្បីជាការសងសឹកផ្នែកការទូត
ប៉េកាំង៖ ប្រទេសចិនកាលពីថ្ងៃអង្គារ បានបណ្តេញអ្នកការទូតកាណាដាម្នាក់ចេញពីប្រទេស ក្នុងចំណាត់ការសងសឹងចំពោះរដ្ឋាភិបាលក្រុងអូតាវ៉ា ដែលបានចេញវិធានការដូចគ្នាលើអ្នកការទូតចិនប្រចាំក្រុងតូរ៉ុនតូកាលពីថ្ងៃចន្ទ ចំពេលដែលទំនាក់ទំនងរវាងប្រទេសទាំង២កាន់តែធ្លាក់ចុះ។
ជាការឆ្លើយតបទៅនឹងអ្វីដែលចិនចាត់ទុកថាជា «សកម្មភាពមិនសមហេតុផល» របស់កាណាដា ក្រសួងការបទេសចិន បានជូនដំណឹងប្រាប់ទៅអ្នកការទូតចិនប្រចាំទីក្រុងសៀងហៃ លោកស្រី Jennifer Lynn Lalonde ឱ្យចាកចេញពីប្រទេសចិននៅថ្ងៃទី ១៣ ខែឧសភានេះ។ នេះបើយោងតាមសេចក្ដីថ្លែងការណ៍ពីក្រសួងការបរទេសចិន ដែលលើកឡើងបន្ថែមថា ចិនមានសិទ្ធិក្នុងការឆ្លើយតបបន្ថែមទៀត។
ចំណែកឯអ្នកនាំពាក្យក្រសួងការបរទេសចិន លោក វ៉ាង វិនភីន(Wang Wenbin) វិញ បាននិយាយនៅក្នុងសន្និសីទសារព័ត៌មានថាដើម្បីឆ្លើយតបទៅនឹងការបង្កហេតុមិនសមហេតុផលរបស់ភាគីកាណាដា ប្រទេសចិនបានអនុម័តវិធានការសងសឹកឱ្យស្មើគ្នា។ នេះពិតជាត្រឹមត្រូវ និងចាំបាច់។ យើងជំរុញឱ្យកាណាដាបញ្ឈប់ជាបន្ទាន់នូវការបង្កហេតុ ដែលមិនសមហេតុផលរបស់ខ្លួន។
គួររំឭកថា កាលពីថ្ងៃចន្ទ កាណាដាបានបណ្ដេញអ្នកការទូតចិន លោក ហ្សាវ វី(Zhao Wei )បន្ទាប់ពីមានរបាយការណ៍ចារកម្មមួយ បានចោទប្រកាន់រូបលោកថាបានព្យាយាមកំណត់គោលដៅគំរាមកំហែងលើសមាជិកសភាកាណាដា លោក មីសែល ជុង(Michael Chong) ដែលរិះគន់ការប្រព្រឹត្តរបស់អាជ្ញាធរចិនលើជនជាតិភាគតិចអ៊ុយហ្គួរនៅតំបន់ស៊ីនជាំង។
រដ្ឋមន្ត្រីការបរទេសកាណាដាលោកស្រី Melanie Joly បានកាលពីថ្ងៃចន្ទថា យើងនឹងមិនអត់ឱនចំពោះទម្រង់នៃការជ្រៀតជ្រែកពីបរទេសណាមួយឡើយ»។លោកស្រីបន្តថា អ្នកការទូតនៅក្នុងប្រទេសកាណាដា ទទួលបានការព្រមានហើយថា ប្រសិនបើពួកគេចូលរួមក្នុងអាកប្បកិរិយាបែបនេះ ពួកគេនឹងត្រូវបញ្ជូនទៅស្រុកកំណើតវិញ។
គួរកត់សម្គាល់ថា ភាពតានតឹងផ្នែកការទូតរវាងចិន និងកាណាដា បានកើនឡើងខ្ពស់ចាប់តាំងពី កាណាដាចាប់ឃុំខ្លួននាយកប្រតិបត្តិក្រុមហ៊ុនបច្ចេកវិទ្យា Huawei លោក Meng Wanzhou នៅក្នុងឆ្នាំ ២០១៨ ខណៈចិនបានចាប់ខ្លួនជនជាតិកាណាដា២នាក់ពីបទចារកម្មជាបន្តបន្ទាប់។ យ៉ាងណាមិញ អ្នកទាំង៣ ត្រូវបានដោះលែងវិញក្នុងឆ្នាំ ២០២១។
ទោះបីបែបនេះក្ដី ភាពតានតឹងការទូតនៅតែមាន ជុំវិញរបាយការណ៍ចារកម្មថាចិនព្យាយាមជ្រៀតជ្រែកឥទ្ធិពលរបស់ខ្លួនលើកាណាដា។ ទីភ្នាក់ងារចារកម្មកាណាដា CSIS បានសរសេររបាយការណ៍មួយនៅឆ្នាំ ២០២១ អំពីឥទ្ធិពលរបស់ចិននៅក្នុងប្រទេសកាណាដា ដែលរួមបញ្ចូលព័ត៌មានអំពីការគំរាមកំហែងដែលអាចកើតមានចំពោះលោក Michael Chong ក្រុមគ្រួសាររបស់លោក។
ក្រៅពីនេះ នៅមានការរាយការណ៍ផ្សេងៗទៀតថា ចិនព្យាយាមជ្រៀតជ្រែងចូលការបោះឆ្នោតរបស់កាណាដាក្នុងឆ្នាំ ២០១៩ និងឆ្នាំ ២០២១ ជាអ្វីដែលរដ្ឋាភិបាលក្រុងប៉េកាំងបានច្រានចោល ហើយចោទប្រកាន់ប្រព័ន្ធផ្សព្វផ្សាយ និងអ្នកនយោបាយកាណាដាមួយចំនួន ថាបំផ្លើសព័ត៌មានមិនពិត៕
ប្រែសម្រួល៖ហួន ឌីណា ប្រភព៖ https://www.reuters.com/world/americas/canada-expels-chinese-diplomat-accused-targeting-lawmaker-2023-05-08/
