បាត់ដំបង ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នាថ្ងៃពុធទី ១០ ខែ ឧសភា ឆ្នាំ២០២៣នេះ បានចាត់លោកជំទាវ ពុំ ចន្ទី អគ្គលេខាធិការកាកបាទក្រហមកម្ពុជា និងសហការី ព្រមទាំងក្រុមប្រតិបត្តិសាខាកាកបាទក្រហមកម្ពុជាខេតត្តបាត់ដំបង អញ្ជើញចូលរួមរំលែកទុក្ខយ៉ាងក្រៀមក្រមបំផុតជាមួយគ្រួសារសព ឈ្មោះ ង៉ែត សុវណ្ណារ៉ុង ភេទប្រុស អាយុ ៣៥ឆ្នាំ ដែលទទួលមរណ នៅថ្ងៃទី៩ ខែឧសភា ឆ្នាំ២០២៣ ដោយផ្ទុះមីនតោនខណៈកំពុងភ្ជួរដីចំការ មានប្រពន្ធឈ្មោះសាត ឃឿន អាយុ៣៤ឆ្នំាមានកូន២នាក់ មានទីលំនៅភូមិពោធិ៍ជ្រៃ ឃុំសិរិមសនជ័យ ស្រុកសំពៅលូន ខេត្តបាត់ដំបង។

ក្នុងវេលាប្រកបដោយសមានទុក្ខដ៏ក្តុកក្ដួលនេះ លោកជំទាវអគ្គលេខាធិការ បានពាំនាំប្រសាសន៍ចូលរួមរំលែកទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាជាមួយគ្រួសារ ដែលបានបាត់បង់ស្វាមី ឪពុក ប្រកបដោយ ព្រហ្មវិហារធម៌ជាទីកក់ក្ដៅសម្រាប់កូនចៅ និងគ្រួសារ។

កាកបាទក្រហមកម្ពុជា សូមឧទ្ទិសបួងសួងដល់ដួងវិញ្ញាណក្ខន្ធ លោក ង៉ែត សុវណ្ណារ៉ុង បានទៅកាន់សុគតិភព កុំបីឃ្លៀងឃ្លាតឡើយ៕ ដោយ / គ្រី សម្បត្តិ