វ៉ាស៊ីនតោន៖ ប្រធានាធិបតីអាមេរិក លោក ចូ បៃដិន បានប្រារព្ធខួបលើកដំបូង នៃការសម្លាប់រង្គាលនៅទីក្រុងអ៊ីវ៉ាល់ រដ្ឋតិចសាស់ នៅថ្ងៃពុធនេះ ដោយនិយាយថា ការបាញ់ប្រហារដ៏ធំបានរីករាលដាលក្លាយជា “វាលពិឃាត” នៅទូទាំងសហរដ្ឋអាមេរិក។

ប្រធានាធិបតីអាមេរិក លោក ចូ បៃដិន និងលោកជំទាវទីមួយ ជៀល បៃដិន ក្នុងទឹកមុខដ៏រំជើបរំជួល និងពិបាកទប់ទឹកភ្នែក បានអញ្ជើញចូលរួមក្នុងពិធីមួយនៅឯសេតវិមាន ដែលធ្វើឡើងដើម្បីរំលឹកដល់វិញ្ញាណខក្ខកុមារ១៩នាក់ និងបុគ្គលិកសាលាពីរនាក់ ដែលត្រូវបានខ្មាន់កាំភ្លើងបាញ់សម្លាប់នៅសាលាបឋមសិក្សា Robb។

នៅក្នុងសុន្ទរកថាតាមកញ្ចក់ទូរទស្សន៍ លោក បៃដិន បានធ្វើការអំពាវនាវសាជាថ្មីម្តងទៀតទៅកាន់សភា ឱ្យអនុម័ត “ច្បាប់កាំភ្លើងសាមញ្ញ” ដើម្បីគ្រប់គ្រងការប្រើប្រាស់កាំភ្លើង។ លោក បៃដិន បានសង្កត់ធ្ងន់ថា ការបាញ់ប្រហារបានក្លាយជាមូលហេតុធំបំផុត នៃការស្លាប់របស់កុមារនៅសហរដ្ឋអាមេរិក និងថា គិតត្រឹមឆ្នាំមុន មានការបាញ់ប្រហារទ្រង់ទ្រាយធំចំនួន ៦៥០ករណី។

លោក បៃដិន បាននិយាយយ៉ាងដូច្នេះថា ខ្លួនខ្ញុំផ្ទាល់ និងលោកជំទាវ ជៀល មិនអាចមិនគិតថា សាលារៀនជាច្រើន និងទីកន្លែងជាច្រើនទៀត ជារៀងរាល់ថ្ងៃ កំពុងក្លាយទៅជាវាលពិឃាតនៅក្នុងសហគមន៍ទូទាំងសហរដ្ឋអាមេរិក។

សូមរម្លឹកថា កាលពីថ្ងៃទី២៤ ខែឧសភា នៅទីក្រុងអ៊ូវ៉ាល់ រដ្ឋតិចសាស់ យុវជនវ័យ១៨ឆ្នាំម្នាក់បានបាញ់សម្លាប់យាយរបស់ខ្លួន មុនពេលបើករថយន្តទៅកាន់សាលាបឋមសិក្សា Robb ហើយចូលដល់ក្នុងបន្ទប់ថ្នាក់រៀនមួយ រួចបាញ់សម្លាប់មនុស្សរហូតដល់២១នាក់ ក្នុងនោះមានក្មេងៗចំនួន១៩នាក់។ មនុស្ស១៨នាក់ទៀតក៏បានរងរបួសផងដែរ ខណៈខ្មាន់កាំភ្លើងត្រូវបានអាជ្ញាធរអាមេរិកបាញ់សម្លាប់ ក្នុងកំលុងការប្រយុទ្ធតតាំងគ្នា៕ ប្រភព៖ AFP ប្រែសម្រួលដោយ៖ ឈឹម ទីណា