កងទ័ពជើងទឹកស្រីលង្កា រកឃើញសាកសព ១៤ នាក់ នៅក្នុងទូកចិនដែលក្រឡាប់លិចកាលពីសប្ដាហ៍មុន
កងទ័ពជើងទឹករបស់ប្រទេសស្រីលង្កា បានឱ្យដឹងកាលពីថ្ងៃពុធទី ២៤ ខែឧសភាថា ខ្លួនបានរកឃើញសាកសពចំនួន ១៤ នាក់បន្ថែមទៀត នៅក្នុងទូកនេសាទរបស់ចិន ដែលក្រឡាប់លិចកាលពីសប្តាហ៍មុន ដោយមានអ្នកជិះជនជាតិផ្សេងគ្នា ៣៩ នាក់។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
ការរកឃើញនេះកើតឡើងមួយថ្ងៃបន្ទាប់ពីការស៊ើបអង្កេតបឋមរបស់ក្រសួងដឹកជញ្ជូនចិន បានសន្និដ្ឋានថា អ្នកជិះទូកដែលលិចនោះបានស្លាប់ទាំងអស់។ ទូកនេសាទ ឈ្មោះ Lu Peng Yuan Yu 028 បានក្រឡាប់ក្នុងមហាសមុទ្រឥណ្ឌាដោយសារព្យុះស៊ីក្លូន Fabian កាលពីថ្ងៃទី ១៦ ខែឧសភា ដោយមានជនជាតិចិន ១៧ នាក់ ឥណ្ឌូណេស៊ី ១៧ នាក់ និងហ្វីលីពីន ៥ នាក់ ជិះមុនពេលវាលិច។ ២ ថ្ងៃក្រោយការក្រឡាប់ ក្រុមអ្នកជួយសង្រ្គោះបានរកឃើញសាកសពមនុស្ស២នាក់ ខណៈ៣៧នាក់ផ្សេងទៀតបន្តបាត់ខ្លួន។
កងទ័ពជើងទឹកស្រីលង្កា បានអះអាងថា អ្នកមុជទឹករបស់ខ្លួនបានរកឃើញសាកសពមនុស្ស២នាក់ និងបានប្រទះឃើញមនុស្ស ១២ នាក់ទៀតកាលពីថ្ងៃអង្គារ ដោយបានបង្ហាញរូបថតសំបកក្រហមរបស់ទូកដែលលិចហើយសាកសពដែលគេទាញចេញពីទឹក។ កងទ័ពជើងទឹកដដែលនិយាយក្នុងសេចក្ដីថ្លែងការណ៍ថា ដោយសារតែការរលួយនៃសាកសព និងគ្រោះថ្នាក់ដល់សុខភាពចំពោះក្រុមអ្នកមុជទឹកដែលគ្មានឧបករណ៍ពាក់ការពារគ្រប់គ្រាន់នោះ ខ្លួនកំណត់ថា ការទាញយកសាកសពទាំងអស់ចេញនឹងធ្វើឱ្យមានគ្រោះថ្នាក់ខ្លាំង។ កងទ័ពជើងទឹកស្រីលង្កាបន្តថា ខ្លួនបានកំណត់សាកសពចំនួន ១២ ដែលជាប់ក្នុងទូក ហើយប្រគល់ឱ្យអាជ្ញាធរចិន។ មកទល់ពេលនេះ គេមិនទាន់អាចកំណត់អត្តសញ្ញាណនៃសាកសពទាំងអស់នៅឡើយទេ។
ជុំវិញបញ្ហានេះ អូស្ត្រាលីបានបញ្ជូនយន្តហោះ៣គ្រឿង និងកប៉ាល់៤គ្រឿង ទៅជួយក្នុងកិច្ចប្រឹងប្រែងស្វែងរក និងជួយសង្គ្រោះជាអន្តរជាតិ។ បើតាមក្រសួងដឹកជញ្ជូនរបស់ចិន ក្រុមអ្នកជួយសង្គ្រោះបានស្វែងរកលើផ្ទៃក្រឡាទឹកប្រហែល ៦៤ ០០០ គីឡូម៉ែត្រការ៉េ ហើយមិនរកឃើញសញ្ញាពីអ្នកនៅរស់នោះទេ។
គួរគូសបញ្ជាក់ថា ព្យុះស៊ីក្លូន Fabian បានបក់បោកខ្លាំងដែលធ្វើឱ្យកម្ពស់ទឹកសមុទ្រហក់ឡើងរហូតដល់ ៧ ម៉ែត្រ និងខ្យល់បក់ខ្លាំងក្នុងល្បឿនរហូតដល់ ១២០ គីឡូម៉ែត្រ/ម៉ោង ឆ្លងកាត់តំបន់ដែលទូក Lu Peng Yuan Yu 028 កំពុងធ្វើដំណើរ។ ធាតុអាកាសមិនអំណោយផលក្រោយទូកលិច ក៏បានរារាំងកិច្ចខិតខំប្រឹងប្រែងជួយសង្គ្រោះផងដែរ ខណៈមជ្ឈមណ្ឌលសម្របសម្រួលការសង្គ្រោះរួម (JRCC) នៅទីក្រុងកង់បេរ៉ា បានព្រមានអំពីលក្ខខណ្ឌប្រឈមដល់អាយុជីវិតសម្រាប់ប្រតិបត្តិការ។
ទូកនេសាទ Lu Peng Yuan Yu 028 គ្រប់គ្រងដោយក្រុមហ៊ុននេសាទរដ្ឋចិន Penglai Jinglu ដែលអាចធ្វើការនេសាទក្នុងដែនសមុទ្រអន្តរជាតិ។ ទូកនេះបានចេញពីទីក្រុង Cape Town នៃប្រទេសអាហ្រ្វិកខាងត្បូងកាលពីថ្ងៃទី ៥ ខែឧសភា ឆ្ពោះទៅកាន់ទីក្រុងប៊ូសាននៃប្រទេសកូរ៉េខាងត្បូង។ នេះបើយោងតាមគេហទំព័រតាមដានចរាចរណ៍ផ្លូវសមុទ្រ ដែលចាប់ទីតាំងរបស់ទូក Lu Peng Yuan Yu 028 ចុងក្រោយនៅថ្ងៃទី ១០ ខែឧសភា ភាគអាគ្នេយ៍នៃកោះ Reunion ដែលជាកោះតូចមួយរបស់បារាំងក្នុងមហាសមុទ្រឥណ្ឌា៕
ប្រភព៖ Sri Lanka Navy finds 14 bodies in capsized Chinese boat https://www.channelnewsasia.com/asia/capsized-chinese-fishing-boat-lu-peng-yuan-yu-14-bodies-found-3511326
