ក្រុមហ៊ុនយូម៉ាក ដែលមកពីប្រទេសអាល្លឺម៉ង់ និងប្រទេសចិន នឹងមកបើករោងចក្រចំនួន៦ នៅខេត្តកំពង់ស្ពឺ
ថ្នាក់ដឹកនាំខេត្តកំពង់ស្ពឹបានប្រាប់ថា ប្រតិភូតំណាងក្រុមហ៊ុនយូម៉ាក ដែលមកពីប្រទេសអាល្លឺម៉ង់ និងប្រទេសចិន នឹងមកបើករោងចក្រចំនួន៦ នៅក្នុងខេត្តនេះ ដែលអាចនឹងផ្ដល់ឱកាសការងារដល់កម្មករ-កម្មការិនី ក្នុងរង្វង់ពី ៦ពាន់កន្លែង ទៅ១ម៉ឺនកន្លែង។
អភិបាលខេត្តកំពង់ស្ពឺ លោក វ៉ី សំណាង បានទទួលជួបប្រតិភូតំណាងក្រុមហ៊ុនយូម៉ាក មកពីប្រទេសទាំងពីរនេះ កាលពីនាថ្ងៃទី២៤ ខែឧសភា ឆ្នាំ២០២៣។
លោក វ៉ី សំណាង បានប្រាប់ឱ្យដឹងថា ប្រតិភូតំណាងក្រុមហ៊ុនយូម៉ាក ដែលមកពីប្រទេសអាល្លឺម៉ង់ និងចិន នឹងមកវិនិយោគ ដោយនឹងនាំយករោងចក្រចំនួន៦ ដែលជារោងចក្រផលិតកាបូប របស់របរប្រើប្រាស់គ្រឿងកែសម្ផស្សរបស់នារី ស៊ីលីកូន ក្រដាសវេចខ្ចប់ និងរបស់របរប្រើប្រាស់របស់សត្វសុនខផងដែរ។
លោកបន្តថា ក្រៅពីការមកវិនិយោគ ប្រតិភូតំណាងក្រុមហ៊ុនយូម៉ាក ក៏ទៅពិនិត្យមើលកន្លែងដែលពួកគាត់ត្រូវទៅធ្វើរោងចក្រក្នុងទឹកដីខេត្តកំពង់ស្ពឺនាពេលខ្លីខាងមុខនេះដែរ។
លោកលើកឡើងថា ៖ «រោងចក្រចំនួន៦ ដែលជារោងចក្រត្រូវការផលិតសម្ភារៈនាំចេញទៅក្រៅប្រទេសនោះ នឹងត្រូវប្រើប្រាស់ដើមទុនវិនិយោគប្រហែលជាង ៥០លានដុល្លារសហរដ្ឋអាមេរិក ហើយនឹងអាចផ្ដល់ឱកាសការងារដល់កម្មករ-កម្មការិនី ក្នុងរង្វង់ពី ៦ពាន់កន្លែង ទៅ ១ម៉ឺនកន្លែង»។
លោក វ៉ី សំណាង បានបញ្ជាក់បន្តថា ៖ «រោងចក្រចំនួន៦នេះ មានកន្លែងធ្វើការដល់ទៅ ៦ពាន់ ទៅ ១ម៉ឺន កន្លែង អ៊ីចឹងច្រើនដែរ។ ដូចនេះ អាចរកកម្មករ-កម្មការិនី ដែលគាត់ត្រូវការធ្វើការរោងចក្រ អាចសម្លឹងមកខេត្តកំពង់ស្ពឺយើងបាន ដោយសារយើងមានរោងចក្រ សហគ្រាសច្រើន ដែលគាត់ត្រូវការកម្មករ»។
លើសពីនេះទៀត លោកថា នៅពេលដែលមានរោងចក្រមកធ្វើអាជីវកម្មក្នុងកំពង់ស្ពឺ ប្រជាជននៅក្នុងខេត្ត និងខេត្តផ្សេងទៀត នឹងមានការងារធ្វើ មានប្រាក់ចំណូល សម្រាប់ដោះស្រាយជីវភាពប្រចាំថ្ងៃ។ បន្ថែមពីនេះ ក៏ជួយកាត់បន្ថយនូវជីវភាពដែលខ្វះខាតឱ្យមានភាពប្រសើរឡើងវិញ ពិសេសជារួមចំណែកលើកកម្ពស់សេដ្ឋកិច្ចជាតិ តាមរយៈការចូលធ្វើការងារជាកម្មករ-កម្មការិនីក្នុងរោងចក្រទាំងនោះ។
ជុំវិញរឿងនេះ លោក អាត់ ធន់ ប្រធានសហភាពការងារកម្ពុជា (CLC) បានប្រាប់ថា វាជាការល្អដែលមានក្រុមហ៊ុន រោងចក្រ និងសហគ្រាសមួយចំនួនបន្ថែមទៀត នឹងមកវិនិយោគ និងធ្វើអាជីវកម្មក្នុងប្រទេសកម្ពុជា បើទោះបីជាធ្វើរោងចក្រក្នុងខេត្តកំពង់ស្ពឺ ឬក្នុងខេត្តណាផ្សេងទៀត វាមិនសំខាន់នោះទេ អ្វីដែលសំខាន់ គឺឱ្យតែមានការបង្កើតឱកាសការងារសម្រាប់ប្រជាពលរដ្ឋខ្មែរ កម្មករ-កម្មការិនីកម្ពុជាទៅបានហើយ។
លោកបន្តថា ប្រសិនជាទំហំការនាំចេញរបស់រោងចក្រចំនួន៦នេះធំ គឺវានឹងបង្កើតឱកាសការងារឱ្យកម្មករ-កម្មការិនី បានច្រើនដែរ ប៉ុន្តែបើទំហំនៃការនាំចេញរោងចក្រទាំងនោះតូច ឱកាសការងារក៏មានចំនួនតិចតួចផងដែរ។
លោក អាត់ ធន់ បានឱ្យដឹងថា ៖ «ខ្ញុំគិតថា ខេត្តណាក៏សំខាន់ដែរ ឱ្យតែធ្វើនៅក្នុងស្រុកខ្មែរ ហើយប្រសិនជារោងចក្រហ្នឹងដាក់ទៅតំបន់ ដូចជាតំបន់ដែលមានប្រជាពលរដ្ឋក្រីក្រច្រើន ខ្ញុំគិតថាវាកាន់ល្អមែនទែន។ ប៉ុន្តែប្រសិនដាក់រោងចក្រនោះតែក្នុងតំបន់ដែលមានរោងចក្រច្រើនហើយ ដូចជាមិនសូវជួយទៅដល់ការជួយបង្កើតការងារថ្មីៗទៅដល់ប្រជាពលរដ្ឋទេ»។
មួយវិញទៀង លោក អាត ធន់ សង្កត់ធ្ងន់ដែរថា ថៅកែរោងចក្រគួរតែជ្រើរើសមនុស្សដែលមានវ័យចំណាស់បន្តិតិច ឬអ្នកដែលមានពិការភាព ជាជាងយកតែកម្មករកម្មការិនីដែលមានវ័យក្មេងៗ ដោយសារចំណុចនេះ ជាគោលការណ៍រាជរដ្ឋាភិបាលដែលគួរតែពិនិត្យមើលឡើងវិញថា អ្នកដែលមានពិការភាព និងអ្នកដែលមានវ័យចំណាស់បន្តិច ដែលអាចមានកម្លាំងរកប្រាក់ចំណូលបានដែរ គួរតែត្រូវបានជ្រើសរើសឱ្យចូលធ្វើការ។
សូមបញ្ជាក់ថា បើតាមលោក វ៉ី សំណាង កាលពីដើមខែមេសា ឆ្នាំ២០២៣ ខេត្តកំពង់ស្ពឺ ទទួលបានគម្រោងបង្កើតរោងចក្រថ្មីៗជាបន្តបន្ទាប់ចំនួន ១០ក្រុមហ៊ុន ដែលនឹងមកប្រកបអាជីវកម្មនៅក្នុងខេត្តកំពង់ស្ពឺ ហើយបានផ្ដល់ឱកាសការងារដល់កម្មករ-កម្មការិនី យ៉ាងហោចណាស់ ១ម៉ឺននាក់។ ក្រៅពីការប្រកបអាជីវកម្មរោងចក្រដែលមានសកម្មភាពសេដ្ឋកិច្ច ផលិតសម្លៀកបំពាក់ ស្បែកជើង កាបូបគ្រប់ប្រភេទហើយនោះ ក៏មានក្រុមហ៊ុនមួយចំនួនទៀត មានបំណងវិនិយោគលើការសាងសង់ និងអចលនទ្រព្យផងដែរ៕ ដោយ៖ ជា សុខនី