ភ្នំពេញ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជា និងកម្មវិធីអភិវឌ្ឍន៍ជំនាញនៃអង្គការ Swisscontact នឹងរៀបចំវេទិកាទ​ស្សនកិច្ចការងារស្តីពី «ឱកាសការងារ និងការត្រៀមខ្លួនចូលទីផ្សារការងារ» នៅខេត្តគោលដៅចំនួនបួន។

ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងកាលពីថ្ងៃទី ២៩ ខែឧសភា ឆ្នាំ២០២៣ថា ទស្សនកិច្ចការងារស្តី​នេះ ​គឺជាការ​នាំយកឱកាសការងារ ក្នុងវិស័យធំៗដូចជា សេវាកម្ម ឧស្សាហកម្ម និងកសិកម្ម សរុបប្រមាណ ១.៥ ម៉ឺន កន្លែងពីក្រុមហ៊ុនធំៗជាច្រើន ដើម្បីផ្តល់ជូនយុវជន សិស្ស/និស្សិត និងអ្នកស្វែងរកការងារ។

វេទិកាទ​ស្សនកិច្ចការងារស្តីពី «ឱកាសការងារ និងការត្រៀមខ្លួនចូលទីផ្សារការងារ» នៅខេត្តគោលដៅចំ​នួ​ន ៤នោះរួមមាន ខេត្តបាត់ដំបង សៀមរាប កំពង់ធំ និង​កំពង់ចាម ចាប់​ពីថ្ងៃទី​៣១ ខែឧសភា ដល់ថ្ងៃទី៦ ខែមិថុនា ឆ្នាំ​២០២៣​។

ក្រសួងការងារ បានលើកឡើងដែរថា វេទិកាទស្សនកិច្ចការងារនេះ មានគោលបំណងនាំយកឱកាសកា​រងារ កម្មសិក្សាការងាររាប់ម៉ឺនកន្លែង និងព័ត៌មានវគ្គបណ្តុះបណ្តាលជំនាញ​ដល់អ្នកស្វែងរកការងារ យុវ​ជន សិ​ស្ស-និស្សិត និងសាធារណជន ព្រមទាំងផ្តល់ឱកាសដល់​និយោជកដែលកំពុងមានតម្រូវការជ្រើសរើសក​ម្លាំងពលកម្មបានជួបដើម្បីធ្វើការសម្ភាសជាមួយអ្នកស្វែងរកការងារ។

​ក្រសួង​អះអាង​ថា ៖ «វេទិកានេះក៏មានការចែករំលែកចំណេះដឹង និងបទពិសោធន៍ពីសំណាក់វាគ្មិនជំនា​ញ ជូនដល់អ្នកស្វែងរកការងារ យុវជន និងសិស្ស-និស្សិត អំពីការត្រៀមលក្ខណៈសម្បត្តិចូលទីផ្សារការ​ងារ សម្រាប់ការបង្កើនឱកាសទទួលបានការងារធ្វើកាន់តែប្រសើរ»។

កម្មវិធី វេទិកាទស្សនកិច្ចការងារ នឹងចាប់ផ្តើមដំបូងក្នុងខេត្តបាត់ដំបង នាថ្ងៃពុធ ទី៣១ ខែឧសភា​ នៅក្នុងទីតាំងសាលមហោស្រពស្ទឹងសង្កែ បន្ទាប់មក នៅខេត្តសៀម ថ្ងៃ​ទី២ ខែមិថុនា នៅសាកលវិ​ទ្យាល័យបៀល​ប្រាយ។ ចំណែកឯ ខេត្តកំពង់ធំ  នឹងត្រូវរៀបចំនៅថ្ងៃ​ទី៤ ខែមិថុនា នៅសាកលវិទ្យាល័យឯកទេសនៃកម្ពុជា និងចុងក្រោយនៅខេត្តកំពង់ចាម ថ្ងៃទី៦ ខែមិថុនា នៅអគារសហភាពសហព័ន្ធយុវជនកម្ពុជា។

ក្រសួងបានបញ្ជាក់ថា ៖ «ដូច្នេះ យុវជន សិស្ស/និសិ្សត និងអ្នកស្វែងរកការងារក្នុងខេត្តគោលដៅទាំង បួន កុំ​ភ្លេចត្រៀម CVs ដើម្បីចូលរួមដាក់ពាក្យស្វែងរកការងារជាមួយក្រុមហ៊ុន សហគ្រាស ដែលខ្លួនពេញចិ​ត្ត»។​

ពាក់ព័ន្ធនឹងឱកាសការងារនេះដែរ ប្រ​ធាន​វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យសភាកម្ពុជា​បណ្ឌិត គិ​ន ភា បានប្រាប់ឱ្យដឹងថា​ ​នេះ​ជាឱកាសដ៏ល្អប្រសើរ សម្រាប់យុវជនកម្ពុជា ក្នុងការស្វែងរកកា​រងារ និងចង់ផ្លាស់ប្តូរការងារមួយដែលសមរម្យ និងមានប្រាក់ចំណូលបន្ថែម។ លោកមើលឃើញថា ​កន្លងមកយើងឃើញថា នៅស្រុកយើង អ្នកដែលត្អូញត្អែរពីអត់កា​រងារធ្វើនៅតែមាន ឯក្រុមហ៊ុនដែលត្រូវការកម្លាំងពលកម្មបុគ្គលិកក៏នៅតែមាន។ចំណុចនេះប្រហែលម​កពីកង្វះព័ត៌មាន និងការផ្សព្វផ្សាយបានទូលំទូលាយនៅឡើយ។

លោកបានបន្តដោយ​លោក​​លើកទឹកចិត្តឱ្យបង្កើតពិព័រណ៍ឱកាសការងារបែបនេះឱ្យបានច្រើននៅកម្រិតទូទាំងប្រទេស ដើម្បីឱ្យពលរដ្ឋ និងយុវជនកម្ពុជា ចាប់បានឱកាសការងារសមរម្យមួយ។

ជាមួយគ្នានេះ បណ្ឌិត គិន ភា ក៏បានជំរុញឱ្យយុវជនកម្ពុជា គួរតែខិតខំប្រឹងប្រែងចាប់យកជំនាញវិជ្ជាជីវៈ និ​​​ងចំណេះដឹងពិតប្រាកដទៅលើជំនាញណាមួយ ចៀសវាងយកតែសញ្ញាប័ត្រខ្ពស់ ប៉ុន្តែមិនអាចបំពេញការងារកើត។ ហេតុនេះ ការមានជំនាញមួយច្បាស់លាស់ បូករួមនឹងចំណេះដឹងភាសាបរទេស ចំណេះព័​ត៌មានវិទ្យា ភាពស្មោះត្រង់ តស៊ូ និងអំណត់ជាដើមនោះ នឹងធ្វើឱ្យយុវជនកម្ពុជា អាចទទួលបានការងារល្អ និងប្រាក់បៀវត្សន៍ខ្ពស់៕ ដោយ៖ បូរ ពេជ្រហ្សាលីន