ក្រុងទេសចរណ៍ចំនួនពីរ បានសម្ពោធដាក់ឱ្យដំណើរការទីលានទុកដាក់សំរាមជា​ផ្លូវការ​ ដែល​មាន​​សមត្ថភាពប្រតិបត្តិការដល់ទៅ ២០ឆ្នាំ

អត្ថបទដោយ៖
CPA

កំពត៖ ក្រសួងសាធារណការ និងដឹកជញ្ជូន បានសម្ពោធដាក់ឱ្យដំណើរការទីលានទុកដាក់សំរាមក្នុងក្រុងទេ​សចរណ៍នៃ​ខេត្តកំពត និងខេត្តកែប ដើម្បីចូលរួមលើកកម្ពស់សុខភាពសាធារណៈ និងកាត់បន្ថយការបំពុលបរិ​ស្ថា​នផងដែរ។

ពិធីសម្ពោធនេះ ត្រូវបានប្រព្រឹត្តឡើងនាថ្ងៃទី៣០ ខែឧសភា ឆ្នាំ២០២៣នេះនៅ​ទីតាំងផ្សេងគ្នា​ ក្រោមវត្តមានឯកឧត្តមទេសរដ្ឋមន្រ្តី ស៊ុន ចាន់​ថុល រដ្ឋមន្ត្រីក្រសួងសាធារណការ និងដឹកជញ្ជូន, ​រដ្ឋបាលខេត្តកំពត និងខេត្តកែប ក្រុមការងារនៃធនាគារអភិវឌ្ឍន៍អាស៊ី និងមន្ត្រីបច្ចេកទេសគម្រោងជាច្រើនរូបផងដែរ។

ឯកឧត្តម ស៊ុន ចាន់ថុល  បានថ្លែងក្នុងពិធីសម្ពោធទីលានទុ​កដា​ក់​សំរាមក្នុងខេត្តកំពតថា ​​​ទីលានទុកដាក់សំរាមទាំងនេះ នឹងចូលរួមចំណែកក្នុងការលើកកម្ពស់សុខភាពនៃ​ការរស់នៅរបស់​ប្រជាពលរដ្ឋក្នុងតំបន់ និងតំបន់ជុំវិញទីតាំង​នេះ ​ពិសេសខេត្តកំពត​​ជាខេត្តទេស​ចរណ៍។ ដូច្នេះ​ ទីលានចាក់សំរាមនេះ វាក៏ចូលរួមកាត់បន្ថយការចោលសំរាមនៅតាមដងផ្លូវ និងកាត់បន្ថយកា​របំពុលបរិស្ថានជុំវិញខេត្តនេះផងដែរ។

ឯកឧត្តម​មានប្រសាសន៍ថា៖ «នេះជាផ្នែកមួយនៃការថែរក្សាសុខភាព សុខមាលភាពរបស់បងប្អូនប្រជាពលរដ្ឋយើង។ ​យើងមានទីលានទុកដាក់សំរាមសម្រាប់ប្រមូលសំរាមដែលបោះបង់ចោលដែលធ្វើឱ្យប៉ះពា​ល់ដល់សុខភាពសាធារណៈ ហើយមួយវិញទៀតខេត្តកំពតជាខេត្តទេសចរណ៍។ អ៊ីចឹងយើងក៏មិនចង់ឃើញសំ​រាមដាក់ចោលតាមផ្លូវ គ្មានកន្លែងទុកដាក់ត្រឹមត្រូវនោះដែរ»។

បន្ទាប់ពី​ប្រកាស​​បើកសម្ពោធ​ទីលានចាក់សំរាមនៅខេត្តកំពតរួច ឯកឧត្តមរដ្ឋមន្រ្តី និង​ប្រតិភូពាក់ព័ន្ធ បាន​​ចូលរួម​​សម្ពោធទីលានទុកដាក់សំរាមមួយទៀត​ក្នុងខេត្តកែបនាថ្ងៃដដែលនោះដែរ​។

​ឯកឧត្តម ស៊ុន ចាន់ថុល បាន​លើកឡើ​ង​ក្នុង​ពិធីថា ​ទីលានទុកដាក់សំរាមក្នុងខេ​ត្តកែបនេះ អាច​ផ្ទុកសំរាមបា​នដល់ ៦០ម៉ឺនម៉ែត្រគូប ដែលប្រើប្រាស់បានក្នុងរយៈពេល ២០ឆ្នាំ។

លោក ស៊ុន ចាន់ថុល បញ្ជាក់ថា ៖ «ទីលានទុកដាក់សំរាមនេះ ក៏ជាផ្នែកមួយក្នុងការថែរក្សាសុខភាពសាធារណៈរបស់បងប្អូនប្រជាពលរដ្ឋយើងផងដែរ បើសិនគ្មានកន្លែងទីលានទុកដាក់សំរាមត្រឹមត្រូវទេ វានាំឱ្យប៉ះ​ពាល់ដល់សុខភាពបងប្អូនប្រជាពលរដ្ឋយើងដែរ។

ថ្លែងក្នុងពិធីនេះដែរ ឯកឧត្តម សោម ពិសិដ្ឋ អភិបាលខេត្តកែបបានលើកឡើង​ថា​ ទីលានទុកដាក់សំរាមដែ​លមានស្ដង់ដានេះ ​​ជាសមទ្ធិផលមួយដ៏ថ្លៃថ្លា ក្នុងការចូលរួមលើកកម្ពស់សុខភាពរបស់ប្រជាពលរដ្ឋនៅទូទាំ​ងខេត្តឱ្យកាន់តែល្អប្រសើរ ជាពិសេសគឺរួមចំណែកធ្វើបរិស្ថានស្អាត ស្របពេលដែលខេត្តនេះជាខេត្តទេសចរណ៍។

ឯកឧត្តមបានថ្លែងថា ៖ «ទីលានទុកដាក់សំរាមនេះមិនត្រឹមតែអាចប្រើប្រាស់ក្របខ័ណ្ឌរដ្ឋបាលខេត្តប៉ុណ្ណោះទេ ប៉ុន្តែទីលានទុកដាក់សំរាមនេះ ក៏អាចបើកឱ្យប្រើប្រាស់ដើម្បីទុកដាក់សំរាមសំណល់រឹងពីរដ្ឋបាលស្រុកមួយចំនួនក្នុងខេត្តកំពត និងក្បែរៗខេត្តកែបផងដែរ»។

​បើតាមការបញ្ជាក់របស់​ឯកឧត្តមអភិបាលខេត្តកែបបច្ចុប្បន្ននេះ សំរាមសំណល់រឹងដែលបញ្ចេញគ្រប់ទីកន្លែងក្នុងខេត្តកែបក្នុងមួយថ្ងៃប្រហែល ៥០ តោន ដោយមិនគិតបញ្ជូលរួមទាំងថ្ងៃបុណ្យ និងថ្ងៃសម្រាក ដែលលើសពីបរិមាណក្នុងមួយថ្ងៃ។

​ឯកឧត្តម សោម ពិសិដ្ឋ បានបញ្ជាក់​ថា ៖ «ផ្អែកលើបញ្ហានេះ ទីលានទុកដាក់សំរាមក្នុងខេត្តកែបនេះ ពិតជាមា​នសារៈសំខាន់ និងចាំបាច់ក្នុងបរិបទនេះផ្នែកសុខភាព​ ហើយរដ្ឋបាលខេត្ត នឹងយកចិត្តទុកដាក់បន្តទៀ​ត ដើម្បីរៀបចំ និងស្នើសុំកិច្ចសហប្រតិបត្តិការពីក្រសួង ស្ថាប័នជំនាញ ក្នុងការផ្ដល់ការបណ្ដុះបណ្ដាលធ​នធានមនុស្សសម្រាប់គ្រប់គ្រងទីលានទុកដាក់សំរាម»។

យោងតាម​ក្រសួង​សាធារណការ និងដឹកជញ្ជូន ទីលានទុកដាក់សំរាមខេត្តកំពត ចាប់ផ្ដើមសាងសង់ឡើងនៅថ្ងៃទី២០ ខែឧសភា ឆ្នាំ២០​២១ និងបញ្ចប់ការងារសាងសង់នៅថ្ងៃទី៣០ ខែកញ្ញា ឆ្នាំ២០២២ ដែលបា​នសាងសង់អស់ថវិកាជាង ៣លានដុល្លារអាមេរិក ក្រោមកម្ចីឥណទានធនាគារអភិវឌ្ឍន៍អាស៊ី (ADB)។ ​

ទីលានទុកដាក់សំរាមនេះ មានទំហំផ្ទៃដី ១០ហិកតា ដែលអាចទទួលបានបរិមាណសំរាមជាង ៣៤ម៉ឺនម៉ែត្រគូប ហើយអាចប្រើប្រាស់បានក្នុងរយៈពេល ២០ឆ្នាំ។

ចំណែកទីលានទុកដាក់សំរាមក្នុង​ខេត្តកែប ត្រូវបានសាងសង់លើផ្ទៃដីទំហំ ១៤ហិកតា ដែលមានសមត្ថភា​ពផ្ទុកសំរាមបានប្រមាណ ៦០ម៉ឺនម៉ែត្រគូប ហើយប្រើប្រាស់បានក្នុងរយៈពេល ២០ឆ្នាំ។ ទីលានទុកដាក់សំរាមថ្មីនេះ បានប្រើប្រាស់ថវិកាសសាងសង់ជាង ១០លានដុល្លារអាមេរិក ក្រោមកម្ចីឥណទានធនាគារអភិវឌ្ឍន៍អាស៊ី (ADB)៕

ដោយ៖ជា សុខនី

ads banner