ក្រសួងការបរទេសបង្ហាញលទ្ធផលផ្លូវការ នៃព្រះរាជដំណើរទស្សនកិច្ចផ្លូវរដ្ឋរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី នៅសាធារណរដ្ឋឥណ្ឌា

ភ្នំពេញ៖ នៅរសៀលថ្ងៃទី៣១ខែឧសភាឆ្នាំ២០២៣បស់ព្រះករុណាព្រះបាទសម្តេចព្រះបរមនាថ នរោត្តម សីហមុនី បានយាងនិវត្តន៍មក ដល់ព្រះរាជាណាចក្រកម្ពុជាបន្ទាប់ពីស្តេចយាងបំពេញព្រះរាជទស្សនកិច្ចផ្លូវរដ្ឋ នៅសាធារណរដ្ឋឥណ្ឌា ពីថ្ងៃទី២៩ ដល់ថ្ងៃទី ៣១ ខែឧសភា ឆ្នាំ២០២៣ ដើម្បីរួមគ្នាប្រារព្ធខួបលើកទី៧០ នៃការបង្កើតទំនាក់ទំនងការទូតរវាងប្រទេសទាំងពីរ។

ស្របពេលជាមួយគ្នានេះដែរក្រសួងការបរទេសនិងសហប្រតិបត្តិការអន្តរជាតិបានចេញសេចក្តីប្រកាសព័ត៌មានស្តីពីលទ្ធផលផ្លូវការនៃព្រះរាជដំណើរទស្សនកិច្ចផ្លូវរដ្ឋរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី នៅសាធារណរដ្ឋឥណ្ឌា ។

សេចក្តីប្រកាសព័ត៌មានបានបញ្ជាក់ថា តបតាមការអញ្ជើញរបស់លោកជំទាវ ដ្រៅផាឌី មួរមូ ប្រធានាធិបតីនៃសាធារណរដ្ឋឥណ្ឌា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានស្តេចយាងបំពេញ ព្រះរាជទស្សនកិច្ចផ្លូវរដ្ឋ នៅសាធារណរដ្ឋឥណ្ឌា ពីថ្ងៃទី២៩ ដល់ថ្ងៃទី ៣១ ខែឧសភា ឆ្នាំ២០២៣ ដើម្បីរួមគ្នាប្រារព្ធខួបលើកទី៧០ នៃការបង្កើតទំនាក់ទំនងការទូតរវាងប្រទេសទាំងពីរ។

ក្នុងអំឡុងព្រះរាជទស្សនកិច្ច ព្រះករុណាព្រះបាទសម្តេចព្រះបរមនាថ នរោត្តម សីហមុនី ទ្រង់មានព្រះរាជសវនាការជាមួយលោកជំទាវ ដ្រៅផាឌី មួរមូ ប្រធានាធិបតី និងឯកឧត្តម ណារិនដ្រា ម៉ូឌី នាយករដ្ឋមន្រ្តីនៃសាធារណរដ្ឋឥណ្ឌា និងសព្វព្រះរាជហឫទ័យប្រោស​ព្រះរាជទាន ឯកឧត្តម ច៉ាកឌីប ដាន់ខា អនុប្រធានាធិបតី និងឯកឧត្តមបណ្ឌិត ស៊ូប្រាម៉ាន់យ៉ាំ ចៃហ្សានកា រដ្ឋមន្រ្តីការបរទេស​​នៃ​សាធារណរដ្ឋឥណ្ឌា ចូលក្រាបបង្គំគាល់ដាច់ដោយឡែកពីគ្នា។ ព្រះករុណា ព្រះមហាក្សត្រ សព្វព្រះរាជហឫទ័យស្ដេចយាង ប្រទានកម្រង​ផ្កាគោរពវិញ្ញាណក្ខន្ធលោកមហាត្មៈគន្ធី នៅមណ្ឌបរ៉ាចហ្កាត់។ លោកជំទាវ ដ្រៅផាឌី មួរមូ ក៏បានរៀបចំ ព្រះរាជពិធីលៀង​សាយភោជន៍​ផ្លូវរដ្ឋជា កិត្តិយសថ្វាយ ព្រះករុណា ព្រះមហាក្សត្រ ព្រមទាំងគណៈប្រតិភូដង្ហែព្រះរាជដំណើរ នៅវិមានប្រធានាធិបតី រ៉ាសត្រាផាទី ប៉ាវ៉ាន់។

ព្រះករុណាព្រះបាទសម្តេចព្រះបរមនាថ នរោត្តម សីហមុនី និងថ្នាក់ដឹកនាំឥណ្ឌាបានរំលឹកពីទំនាក់ទំនងដ៏ជិតស្និទ្ធ និងជាពិសេសរវាង​ព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ និងឯកឧត្តម ចាវ៉ាហាឡាល នេហ៍រុ នាយករដ្ឋមន្រ្តីទីមួយនៃ​សាធារណរដ្ឋ​​ឥណ្ឌា ដែលបានកសាងមូលដ្ឋានគ្រឹះដ៏រឹងមាំសម្រាប់ទំនាក់ទំនងមិត្តភាពដ៏កក់ក្តៅ និងកិច្ចសហប្រតិបត្តិការជិតស្និទ្ធ ដែល​កំពុងរីកចម្រើន និងត្រូវបានចាក់ឫសយ៉ាងជ្រៅនៅក្នុងកេរដំណែលរួមនៃប្រវត្តិសាស្ត្រសាសនា វប្បធម៌ និងអក្សរសាស្ត្ររវាងប្រទេស​ទាំងពីរ។

លោកជំទាវ ដ្រៅផាឌី មួរមូ និងថ្នាក់ដឹកនាំឥណ្ឌាផ្សេងទៀត បានថ្វាយព្រះពរស្វាគមន៍យ៉ាងកក់ក្តៅចំពោះព្រះរាជទស្សនកិច្ចផ្លូវរដ្ឋរបស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី នៅប្រទេសឥណ្ឌា ដោយចាត់ទុកថាជាមហាព្រឹត្តិការណ៍ដ៏សំខាន់​ជាប្រវត្តិសាស្ត្រ និងមានជំនឿយ៉ាងមុតមាំថា ទស្សនកិច្ចនេះនឹងលើកកម្ពស់ចំណងទាក់ទងដ៏ល្អប្រសើររវាងប្រទេសជា​មិត្តទាំងពីរឱ្យកាន់​តែខ្ពស់ និងជំរុញកិច្ចសហប្រតិបត្តិការប្រកបដោយផ្លែផ្កា បន្ថែមទៀត។ ភាគីឥណ្ឌា ក៏បានកត់សម្គាល់ដោយក្ដីរីករាយចំពោះការផ្លាស់ប្ដូរ ទស្សនកិច្ច និងកិច្ចសហប្រតិបត្តិការរវាងសភានៃប្រទេសទាំងពីរផងដែរ។

ព្រះករុណាព្រះបាទសម្ដេចព្រះបរមនាថ នរោត្តម សីហមុនី បានមានព្រះបន្ទូលរំលឹកដោយថ្លែងអំណរគុណយ៉ាងជ្រាលជ្រៅចំពោះ​ការទទួលស្គាល់ និងការគាំទ្ររបស់ឥណ្ឌាដល់កម្ពុជា ក្នុងគ្រាដ៏លំបាកបំផុត ទាំងផ្នែកសេដ្ឋកិច្ច និងនយោបាយ បន្ទាប់ពីកម្ពុជា ទើបត្រូវ​បានរំដោះចេញ ពីរបបប្រល័យពូជសាសន៍ ប៉ុល ពត និងការបញ្ជូនកងកម្លាំងរក្សាសន្ដិភាព របស់ឥណ្ឌាចូលរួមក្នុងបេសកកម្មនៃ​អាជ្ញាធរ​បណ្ដោះអាសន្នរបស់អង្គការសហប្រជាជាតិនៅកម្ពុជា (អ៊ុនតាក់) សម្រាប់ដំណើរការសន្ដិភាពនៅកម្ពុជា ក្នុងអំឡុងដើមទសវត្សរ៍ ៩០។

ព្រះករុណាព្រះបាទសម្ដេចព្រះបរមនាថ នរោត្តម សីហមុនី និងថ្នាក់ដឹកនាំឥណ្ឌា បានវាយតម្លៃខ្ពស់ចំពោះទំនាក់ទំនង និងកិច្ច​សហប្រតិបត្តិការ​​ទ្វេភាគីដែលកំពុងតែមានការរីកចម្រើន និងកំពុងត្រូវបានពូនជ្រុំឥតឈប់ឈរដោយថ្នាក់ដឹកនាំ និងប្រជាជននៃប្រទេស​ទាំងពីរ​ក្នុងរយៈពេល ៧០ ឆ្នាំកន្លងមកនេះ លើវិស័យជាច្រើនដែលជាផលប្រយោជន៍រួម រួមមាន នយោបាយ សេដ្ឋកិច្ច ពាណិជ្ជកម្ម វិនិយោគ ទេសចរណ៍ អប់រំ វប្បធម៌ ការផ្សារភ្ជាប់រវាងប្រជាជន និងប្រជាជន និងវិស័យការពារជាតិ តាមរយៈការផ្លាស់ប្តូរទស្សនកិច្ច​ជាទៀងទាត់ និងការប្រាស្រ័យទាក់ទងដ៏ជិតស្និទ្ធរវាងថ្នាក់ដឹកនាំ និងមន្ត្រីជាន់ខ្ពស់នៃប្រទេសទាំងពីរ។

ព្រះករុណា ព្រះមហាក្សត្រ បានថ្លែងអំណរគុណយ៉ាងជ្រាលជ្រៅចំពោះការចូលរួមចំណែករបស់ឥណ្ឌាក្នុងការអភិវឌ្ឍសេដ្ឋកិច្ច-សង្គម​កម្ពុជាតាមរយៈ ការផ្ដល់ឥណទាន និងហិរញ្ញប្បទានឥតសំណង ខណៈភាគីឥណ្ឌាបានបញ្ជាក់ជាថ្មី ពីការបន្តគាំទ្រកម្ពុជាក្នុងការស្ដារ និងអភិរក្សប្រាសាទបុរាណ និងសកម្មភាពសម្អាតមីននៅកម្ពុជា ព្រមទាំងកិច្ចសហប្រតិបត្តិការផ្សេងទៀត ដែលផ្ដល់ផលប្រយោជន៍​ទៅវិញទៅមកសម្រាប់ប្រទេសទាំងពីរ នៅក្នុងបណ្ដាឆ្នាំខាងមុខ។ ក្នុងអំឡុងព្រះរាជសវនាការជាមួយ ព្រះករុណា ព្រះមហាក្សត្រ ឯកឧត្តម នាយករដ្ឋមន្រ្តី ណារិនដ្រា ម៉ូឌី បានថ្វាយសំណើជួសជុលគំនូរនៅលើថែវស្ដីពីរឿងរាមាយណៈ នៅក្នុងព្រះបរមរាជវាំង។

ភាគីទាំងពីរ បានសម្ដែងនូវទំនុកចិត្តយ៉ាងមុតមាំថា មូលដ្ឋានដ៏រឹងមាំ នៃទំនាក់ទំនងទ្វេភាគី នឹងក្លាយជាកម្លាំងចលករដ៏សំខាន់ ដើម្បីបន្តជំរុញឱ្យកិច្ចសហប្រតិបត្តិការដ៏ល្អប្រសើរលើគ្រប់វិស័យដែលជាផលប្រយោជន៍រួមកាន់តែមានភាពរីកចម្រើន និងស៊ីជម្រៅ សំដៅឆ្ពោះទៅរកអនាគតដ៏ត្រចះត្រចង់ និងប្រកបដោយវិបុលភាពសម្រាប់ប្រទេសទាំងពីរក្រៅពីទំនាក់ទំនងទ្វេភាគី ភាគីទាំងពីរ​​ក៏បាន​​សម្ដែងនូវការគាំទ្រគ្នាទៅវិញទៅមក នៅក្នុងក្របខ័ណ្ឌតំបន់ និងនៅលើឆាកអន្តរជាតិ រួមមាន កិច្ចសហប្រតិបត្តិការមេគង្គ-គង្គា អាស៊ាន និងអង្គការសហប្រជាជាតិ។

ព្រះករុណាព្រះបាទសម្តេចព្រះបរមនាថ នរោត្តម សីហមុនី បានថ្លែងអំណរគុណយ៉ាងជ្រាលជ្រៅ ចំពោះលោកជំទាវប្រធានាធិបតី ដ្រៅផាឌី មួរមូ ថ្នាក់ដឹកនាំ និងប្រជាជនឥណ្ឌា សម្រាប់ការស្វាគមន៍យ៉ាងកក់ក្តៅ និងបដិសណ្ឋារកិច្ចដ៏ល្អប្រសើរ ថ្វាយព្រះករុណា ព្រះមហាក្សត្រ និងជូនគណៈប្រតិភូដង្ហែព្រះរាជដំណើរ ក្នុងអំទ្បុងពេលគង់ប្រថាប់ និងស្នាក់នៅក្នុងប្រទេសឥណ្ឌា។

ព្រះករុណា ព្រះមហាក្សត្រ ទ្រង់សព្វព្រះរាជហឫទ័យសូមអញ្ជើញលោកជំទាវ ដ្រៅផាឌី មួរមូ ទៅបំពេញទស្សនកិច្ចផ្លូវរដ្ឋនៅ​ព្រះរាជាណាចក្រកម្ពុជា តាមពេលវេលាសមស្រប។ លោកជំទាវ ដ្រៅផាឌី មួរមូ បានសម្ដែងនូវអំណរព្រះរាជគុណថ្វាយ ព្រះករុណា ព្រះមហាក្សត្រ និងទទួលយកការអញ្ជើញដោយសេចក្តីសោមនស្សរីករាយ៕ ដោយ៖ សួង ពិសិដ្ឋ

សួង ពិសិដ្ឋ
សួង ពិសិដ្ឋ
អ្នកថតពត៌មានចូលបំរើការងារនៅទូរទស្ស៏អប្សរាឆ្នាំ1998រហូតដល់បច្ចុប្បន្នឆ្នាំ2022តាមសម្ដេចតេជោនឹងក្រសួងការបរទេស
ads banner
ads banner
ads banner