ខេត្តកំពង់ឆ្នាំង៖ ឯកឧត្តម រដ្ឋមន្រ្តី ជា វ៉ាន់ដេត បានលើកឡើងថា ការកសាងសាលារៀន វត្តអារាម គឺជាចលនាផ្តើមចេញពីសម្តេចអគ្គមហាសេនាបតីតេជោហ៊ុន សែន ដែលធ្វើឱ្យប្រទេសយើង មានវត្តអារាម អគារអប់រំយ៉ាងច្រើន ហើយសមិទ្ធផលទាំងអស់នេះកើតឡើងដោយសារ សន្តិភាព ដូច្នេះយើងទាំងអស់គ្នាអរគុណសន្តិភាព បើគ្មានសន្តិភាពទេ កំនិយាយអំពីវត្តអារាម វិស័យសាសនា វិស័យអប់រំ ឬសាលារៀន។

ឯកឧត្តម រដ្ឋមន្រ្តី បន្តថា សន្តិភាពមានតំលៃណាស់ សន្តិភាព បាននាំមកនូវអ្វីៗទាំអស់សំរាប់យើង ។ នៅពេលដែលប្រទេសមានសង្រ្គាមយើងបានឆ្លងកាត់ហើយ ជីវិត្តមនុស្សអត់ថ្លៃថ្នូវទេ គឺប្រៀបដូចសត្វ ត្រូវបានបំផ្លាញសំលាប់ ប្លន់ប្រជាពលរដ្ឋយើង គ្រប់ពេលវេលាទាំងអស់ គឺសាលារៀនត្រូវបិទទ្វារ វត្តអារាម ទាំងស្រុងនៅក្នុងសម័យប៉ុលពត ។

ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានលើកឡើងបែបនេះ នៅព្រឹកថ្ងៃទី៥ ខែមិថុនា ឆ្នាំ២០២៣នេះ ក្នុងពិធីសម្ពោធ ដាក់ឱ្យប្រើប្រាស់អគារសិក្សា២ខ្នង និងសមិទ្ធផលនានា នៅក្នុងអនុវិទ្យាល័យក្រាំងស្គារក្នុង ឃុំក្រាំងស្គារ ស្រុកទឹកផុស ខេត្តកំពង់ឆ្នាំង។

ឯកឧត្តម បន្តថា ឥឡូវនេះ នៅក្នុងប្រទេសកម្ពុជាយើង មានសាលារៀនសរុបប្រមាណ ១៣០០០ខ្នង ក្នុងនោះ ២៣០០ខ្នង ជាសាលាឯកជន ដែលនេះជាការរីកចម្រើនធំបំផុតនៅក្នុងវិស័យអប់រំ ។ ជាក់ស្តែងនៅក្នុងឃុំក្រាំងស្គារនេះ គឺមានសាលាបឋមសិក្សារហូតដល់ ៥កន្លែង និង អនុវិទ្យាល័យចំនួន ១ ។

អគារសិក្សា និងសមិទ្ធផលនានា ដែលត្រូវបានដាក់សម្ពោធដាក់ឱ្យប្រើប្រាស់នេះ រួមមាន អគារ១ខ្នងគឺជា ជំនួយរបស់សហគមន៍អ៊ឺរ៉ុប(EU) តាមរយៈក្រសួងអប់រំយុវជននិងកីឡា ចំណាយថវិកា ២៦០លានរៀល និង ១ខ្នងទៀត រួមទាំងសម្ភារការិយាល័យផ្សេងៗ មានតុ កៅអី ក្តារខៀន ជាអំណោយរបស់ ឧបាសិកា ទឹម សាវ៉ាត ព្រមទាំងកូនចៅ ឧបាសិកសា ទឹម ពៅ ឯកឧត្តម នាង ម៉ៅ និងលោកជំទាវ ទឹម ចាន់នី ហើយសំរាប់ការរៀបចំទីធ្លាសាលារៀន សួនផ្កា និងរូបសំណាក់ ត្រូវបានចូលរួមពីក្រុមការងារគណបក្សចុះជួយឃុំក្រាំងស្គារផងដែរ ៕ អត្ថបទ ង៉ាន់ ទិត្យ រូបភាព រិន រចនា