ភ្នំពេញ៖ យោងតាមបណ្ដាញសង្គម Facebook នៅព្រឹកថ្ងៃទី០៧ ខែមិថុនា ឆ្នាំ២០២៣ ប្រជាពលរដ្ឋម្នាក់ នៅស្រុកកៀនស្វាយ ខេត្តកណ្តាល បានបង្ហោះនូវការសម្រេចក្តីស្រមៃរបស់ខ្លួន ក្រោយបានថើបដៃសម្តេចតេជោ ហ៊ុន សែន នាយករដ្ឋមន្ត្រីកម្ពុជា ។

ប្រជាពលរដ្ឋម្នាក់នោះ បានបង្ហោះរូបថត ភ្ជាប់ជាមួយសំណេរលើបណ្ដាញសង្គម Facebook ដូច្នេះថា៖ ថ្ងៃនេះឆ្នាំនេះ២០២៣ អរគុណបានថើបដៃពុកដូចបំណងហើយស្រលាញ់ពុកខ្លាំងៗ , ម្ដាយខ្ញុំប្រាប់ថា គេយកគាត់ទៅដល់រណ្ដៅជិតសំលាប់ហើយ។ ម៉ែយកដីបាចលើក្បាលបន់ថា បើមាននណាមកជួយជីវិតម៉ែៗដឹងគុណមួយជីវិត។ ទេវតារស់បានមករំដោះ បើពេលនោះ គ្មានម៉ែ ក៏ថ្ងៃនេះគ្មានពួកខ្ញុំជាកូនជាចៅ។

ក្នុងសំណេរបន្តថា តាំងពីតូច ស្រលាញ់សំលេងពុក និយាយពិរោះស្តាប់មិនជិនណាយ ពុកចេះ កំប្លែងពេលពុកនិយាយ។ ប្រាថ្នាចង់មានថ្ងៃមួយបានកាន់ដៃពុក, មិនត្រឹមតែកាន់ គឺបានថើបទៀត ដៃពុកទន់ត្រជាក់ ។ អរគុណទេវតា នឹងបងស្រីធំ ផ្តល់ឱ្យកាសឱ្យប្អូន បានដូចបំណង ។

សូមជម្រាបថា នៅព្រឹកថ្ងៃពុធទី៧ ខែមិថុនា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញជាអធិបតី ដ៏ខ្ពង់ខ្ពស់ក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត និងបើកការដ្ឋានសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់ក្បាលស្ពាន ស្ថិតនៅឃុំដីឥដ្ឋ ស្រុកកៀនស្វាយ ខេត្តកណ្ដាល ៕

ដោយ វណ្ណលុក