ក្នុងមួយខែរាជរដ្ឋាភិបាលបានចំណាយថវិកា ៣០ លានដុល្លារ ដើម្បីផ្ដល់ជូនអតីតយុទ្ធជន ប្រមាណជិត ២០ ម៉ឺននាក់
ភ្នំពេញ៖ មូលនិធិជាតិជំនួយសង្គមបានប្រកាសពីការបើកផ្តល់ប្រាក់របបសន្តិសុខសង្គមជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុកសរុបជិត ២០ម៉ឺននាក់ ដែលត្រូវចំណាយថវិកាក្នុងមួយខែប្រមាណ៣០លានដុល្លារអាម៉េរិក។
លោក ឈួរ សុបញ្ញា អគ្គនាយកមូលនិធិជាតិជំនួយសង្គម បានប្រាប់ឱ្យដឹងនៅថ្ងៃទី១២ ខែមិថុនា ថា មូលនិធិជាតិជំនួយសង្គម បានបើកផ្តល់ប្រាក់របបសន្តិសុខសង្គមជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក ចាប់តាំងពីឆ្នាំ២០១៩មក។
លោកបន្តថា ជារៀងរាល់ខែ រាជរដ្ឋាភិបាលបានចំណាយថវិការដ្ឋជាមធ្យមចន្លោះ ៣០លានដុល្លារអាម៉េរិក ដើម្បីផ្ដល់ជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក ដែលមានចំនួនសរុបប្រមាណជិត ២០ ម៉ឺននាក់ផងដែរ។
លោក ឈួរ សុបញ្ញា មានប្រសាសន៍ថា ចំពោះការបើកផ្ដល់របបនេះ ពួកគាត់បានទទួលអត្ថប្រយោជន៍ដោយថវិកានេះបានចូលរួមចំណែកជួយដល់ពួកគាត់បានមួយកម្រិតដែរ ក្នុងការដោះស្រាយបញ្ហាជីវភាព ការផ្គត់ផ្គង់ក្រុមគ្រួសារ បើទោះបីជារបបនេះតិចតួចក្ដី ប៉ុន្តែវាដោះស្រាយសមល្មមក្នុងការរស់នៅបាន។
លើសពីនេះលោក ឈួរ សុបញ្ញា ក៏បានបញ្ជាក់ដែរថា ក្រៅពីការផ្ដល់ប្រាក់របបសន្តិសុខសង្គមហើយ អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក ពួកគាត់ក៏អាចទទួលបានបណ្ណប.ស.ស សម្រាប់ប្រើប្រាស់ក្នុងការព្យាបាលដោយមិនអស់ថវិកា ដែលរដ្ឋ ជាអ្នកចំណាយថវិកាជូនពួកគាត់ផងដែរ។
លោកបន្ថែមថា ដូច្នេះទាំងអស់នេះ គឺជារបបមួយដែលរាជរដ្ឋាភិបាលបានផ្ដល់ជូនជាការអរគុណ ដឹងគុណ ចំពោះអតីតយុទ្ធជន អតីតមន្ត្រីរាជការស៊ីវិល ប៉ូលិស និងទាហានជាដើម។
យោងតាមសេចក្ដីប្រកាសរបស់មូលនិធិជាតិជំនួយសង្គម ដែលចុះថ្ងៃទី៩ ខែមិថុនា ឆ្នាំ ២០២៣ បានឱ្យដឹងថា ការបើកផ្តល់ប្រាក់របបសន្តិសុខ សង្គមជូន អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក លើកទី១ ប្រចាំខែមិថុនា នឹងត្រូវទៅបើកចាប់ពីថ្ងៃទី១៣ ខែមិថុនានេះ។
ប្រភពដដែលបានឱ្យដឹងទៀតថា សម្រាប់អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក ដែលមានអាស្រ័យដ្ឋាននៅរាជធានីភ្នំពេញ អាចបើកប្រាក់នេះ តាមរយៈប្រព័ន្ធធនាគារកាណាឌីយ៉ា ហើយសម្រាប់អ្នកនៅតាមបណ្ដាខេត្តទាំង២៤ អាចបើកប្រាក់របបសន្តិសុខសង្គមនេះ តាមរយៈធនាគារអេស៊ីលីដា ដោយភ្ជាប់មកជាមួយសៀវភៅគណនីធនាគារ និងអត្តសញ្ញាណបណ្ណសញ្ជាតិខ្មែរ ឬកាតអេធីអ៊ីម។
មូលនិធិជាតិជំនួយសង្គម បានបញ្ជាក់ថា ៖ «ចំពោះប្រាក់គោលនយោបាយរបស់សពអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក នឹងត្រូវបានរៀបចំបើកជូនដល់គេហដ្ឋាន»។
លោក ឈត ប៊ុនថង មន្ត្រីស្រាវជ្រាវនៃរាជបណ្ឌិត្យសភាកម្ពុជា និងអ្នកជំនាញទស្សនវិជ្ជា បានឱ្យដឹងថា ការបើកផ្ដល់ប្រាក់របបសន្តិសុខសង្គមជារឿងចាំបាច់ដែលរាជរដ្ឋាភិបាលគួរតែរៀបចំដូចនេះ ព្រោះពេលដែលអតីតមន្ត្រីរាជការស៊ីវិល នៅមានកម្លាំង ពួកគាត់បានធ្វើការបម្រើជាតិ បម្រើរដ្ឋ។ ហេតុនេះ រដ្ឋត្រូវតែជួយចិញ្ចឹមពួកគាត់វិញ នៅពេលដែលពួកគាត់មានវ័យចាស់។
លោក ឈត ប៊ុនថង ថា ៖ «រដ្ឋត្រូវតែជួយចិញ្ចឹមគាត់នៅក្នុងវ័យចាស់ ដែលជាការតបស្នងសងគុណ ដែលពួកគាត់បានលះបង់សាច់ស្រស់ ឈាមស្រស់ បាត់បង់ទាំងជីវិត និងបាត់បង់ទាំងកាយសម្បទា។ ដូច្នេះរាជរដ្ឋាភិបាល បានបើកផ្ដល់នូវប្រាក់របបសន្តិសុខសង្គមហ្នឹង វាបង្ហាញអំពីការយកចិត្តទុកដាក់ ជាការសងគុណ ជាការតាមថែទាំសុខភាព ជីរភាពរបស់ពួកគាត់»។
លោកបន្ថែមថា ការផ្ដល់ប្រាក់របបសន្តិសុខសង្គមនេះ វាក៏ជាកាយវិការមួយដែលត្រូវលើកទឹកចិត្ត និងត្រូវតែគាំទ្រសកម្មភាពដ៏ល្អមួយនេះជាបន្តទៅទៀតផងដែរ៕
ដោយ៖ជា សុខនី
